Naʻá Ku Moʻui Taau Nai?

ʻIkai fakahā e hingoá

Ko ha tokotaha au ne u aʻusia ʻa e ngaohikoviá ʻi ha vahaʻataimi fuoloa. Naʻe uesia nai ai ʻa e anga ʻo e ʻafio mai ʻa e ʻEikí kiate aú?

finemui ʻoku sio ki lalo

Tā fakatātaaʻi ʻe Trent Gudmundsen

ʻI he vakai ʻa e kakaí, naʻe angamaheni pē ʻeku kei siʻí.

Naʻa mau ʻalu ki he lotú mo kau ki he kotoa ʻo ʻemau ngaahi fakataha mo e ʻekitivitī faka-Siasí. Naʻá ku ʻalu ki he akó peá u vaʻinga mo hoku ngaahi kaungāmeʻá. ʻI heʻeku taʻu hongofulu tupú, naʻá ku fai ʻa e ngaahi meʻa kotoa ne angamaheni ki ai e kau taʻu hongofulu tupú. Naʻá ku ʻeva mo hoku ngaahi kaungāmeʻá peá u kau ki he kuaeá mo e kulupu tulamá. Naʻá ku ʻalu ki he hulohula ʻa e akó. Ka naʻe ʻi ai ha fakapulipuli fakalilifu ʻi he tuʻa ʻo e fofonga fiefia mo angamaheni ko iá.

Talu mei he taimi naʻá ku taʻu ua aí, ne u foua ʻa e ngaohikovia fakasekisualé mei hoku ongo tuongaʻane lalahí. Naʻá na ngaohikovia foki mo hoku ngaahi tokouá. Naʻa mau fuʻu kei iiki ke mahino kiate kimautolu ʻa e meʻa naʻe hokó, ka ʻi heʻeku tupu ʻo matuʻotuʻa angé, naʻe kamata ke kiʻi mahino kiate au. Naʻá ku ʻi ha tuʻunga fakapoʻuli mo taʻetaau ʻi he taimi ne u nofo fakataha ai mo hoku ongo tuongaʻané.

Naʻe Fakautuutu ʻeku Puputuʻú

Hili ʻeku kau atu ki he kalasi Finemuí ʻa ia ne nau akoʻi ai fekauʻaki mo e angamaʻá, naʻe mahino kiate au ʻa e ʻuhinga ʻo e ʻulungaanga maʻá mo e angamaʻá. Naʻá ku fanongo ki he kole mai ʻa ʻeku kau takí kiate au mo e niʻihi ʻi he kalasí ke mau moʻui angamaʻá.

Naʻá ku fifili, “Te u lava fēfē ʻo moʻui angamaʻá?” Ko e meʻa pē ne u manatuʻí, naʻe ngaohikovia fakasekisuale au. Naʻá ku fifili pe ko e hā e fakakaukau mai ʻa e ʻEikí kiate aú. Ko ha finemui angamaʻa nai au? Naʻá ku taau nai ke teiti mo e talavou angamāʻoniʻoni ʻi hoku uōtí mo e ʻapiakó? ʻE tupu nai mei he ngaohikovia ne u fouá haʻaku taʻetaau ki ha mali temipale?

Naʻá ku fakakaukau lahi ki he meʻá ni. Naʻe ʻikai ʻuhingamālie kiate au ke pehē ʻoku ʻikai ke u maʻa koeʻuhí naʻe ʻikai ko haʻaku fili ʻa e meʻa ne hoko kiate aú. Ko e hā ʻoku ʻikai totonu ai ke u ongoʻi maʻá? ʻOku ou taʻetaau nai ke maʻu e ʻofa ʻa e ʻEikí? Naʻe fie maʻu nai kiate au ʻa e fakatomalá?

Naʻá Ku Feinga Pē ke Fakangaloki

Ko hono moʻoní ne ʻikai te u ʻilo. Naʻá ku ongoʻi naʻe ʻikai ko haʻaku foʻui, ka ʻi he taimi tatau, naʻá ku ongoʻi taʻetaau mo taʻemahuʻinga peá u matuʻaki mā ʻaupito. Naʻe ʻikai ke u loto-toʻa ke talaange ki heʻeku mātuʻá pe ko ha taha kehe. Naʻe tā tuʻo lahi ʻeku feingá, ka naʻá ku fuʻu ongoʻi mā pea ʻikai ke u ʻilo e founga ke tala ai ki ha tahá. Naʻá ku feinga pē ke fakangaloki ʻene hokó.

ʻI hoku taʻu 15, naʻe maʻu ʻe hoku ngaahi tokouá ʻa e loto-toʻa naʻe ʻikai ke u maʻú. Naʻa nau talanoa ki ha tokotaha faifaleʻi ʻi he akó. Hili ha taimi nounou, naʻe puke pōpula ha taha ʻo hoku ongo tuongaʻané pea tauteaʻi ke ngāue pōpula taʻu ʻe tolu. Ka neongo ia, hili ha ngaahi taʻu, naʻá ku foua e manavasiʻi tatau, ʻo pehē ʻoku ʻikai ke u maʻa pe taau.

Ne U Maʻu ha Loto-Toʻa ke Kumi Tokoni

Naʻe faifai peá u maʻu ha loto-toʻa ʻi ha ʻaho ʻe taha ke u ʻalu ai ʻo talanoa mo ʻeku pīsopé. Naʻá ne fakamatalaʻi mai ʻoku ʻikai fakamaauʻi au ʻe he ʻEikí ʻi he ngaahi tōʻonga fakasekisuale naʻe fakamālohiʻi kiate au ʻi heʻeku kei siʻí mo ʻeku hoko ko ha finemuí. Naʻá ne fakapapauʻi mai naʻe ʻikai ko haʻaku foʻui ia. Naʻá ku tuʻu taʻehalaia ʻi he ʻao ʻo e ʻEikí. Naʻá ku kei angamaʻa pē!

Kuó u lava ʻo siʻaki ʻa e ngaohikoviá—mo e mamahi mo e faingataʻa naʻá ne fakatupú—ʻi he tokoni ʻa e faleʻi mei ha kau palofesinale mo e tokoni mei heʻeku pīsopé. ʻOku ou maʻu he taimí ni ha moʻui fiefia mo angamaheni. Naʻá ku mali ʻi he temipalé ki ha tangata māʻoniʻoni, pea ne ma ohi fiefia hake homa fāmilí.

Taimi ʻe niʻihi ʻoku ou manatuʻi e meʻa naʻe hokó, ka neongo ia, ʻoku ou lava ʻo manatuʻi ʻa e loto-mamahi ne u ongoʻi ʻi heʻeku fakalaulauloto atu ki hoku tuʻunga tāú.

ʻOku ou fifili pe ko e kakai kei talavou ʻe toko fiha ʻoku nau ʻi ha tuʻunga tatau mo ia ne u ʻi aí, ʻa e ongoʻi maá mo e fakamāʻiá, ʻa e fifili ki honau tuʻunga angamaʻá pea mo ʻenau tuʻunga taau ki he palani ʻa e ʻOtuá.

ʻOku ou fie lea atu ki he niʻihi kei talavou ko ʻení, ʻoku ʻofeina kimoutolu ʻe he ʻEikí.

ʻOkú Ne mamahi ʻi he meʻa ne hoko kiate kimoutolú.

ʻOkú Ne ʻafioʻi ʻoku ʻikai ko haʻo foʻui.

ʻOkú Ne ʻafioʻi ʻokú ke angamaʻa moʻoni.

Te Ne tokoni atu ke ke maʻu ha loto-toʻa mo ha mālohi ke moʻui fiefia.

Ngaahi Maʻuʻanga Tokoni ki Hono Maʻu ha Tokoni mo e ʻAmanaki Leleí

Kapau kuó ke aʻusia ʻa e ngaohikoviá, fekumi ki ha tokoni mo ha ʻamanaki lelei ʻaki hoʻo:

• ʻAlu ki he ngaahi maʻuʻanga tokoni ʻa e Siasí ʻi he ʻinitanetí ʻi he ChurchofJesusChrist.org/get-help/abuse mo e “Ngaohikoviá” ʻi he topics.ChurchofJesusChrist.org.

• Talanoa ki hoʻo pīsopé pe ko ha taki ʻokú ke falala ki aí.

• ʻE tokoni atu hoʻo talanoa ki ha tahá. ʻOku faʻa fakamanamanaʻi ʻe kinautolu ʻoku nau fai ʻa e ngaohikoviá ki he niʻihi ʻoku fakahoko ki aí, ke ʻoua naʻa nau tala ki ha taha kau ki he ngaohikoviá. ʻOua naʻa mou fakafanongo ki heʻenau ngaahi loí.

• ʻIloʻi ʻoku ʻikai ko haʻo foʻui pea ʻoku ʻofeina koe ʻe he ʻEikí.

ʻOku ʻIkai ko Haʻo Foʻui ʻa ʻEnau Ngaahi Tōʻongá

“ʻOku ou fakamoʻoni ʻi he loto fakamātoato ʻoku ʻikai ke ke haʻisia pea kuo pau ke ʻoua naʻá ke ongoʻi halaia ʻi hano fakamamahiʻi lahi koe ʻo ʻikai ke ke loto ki ai ʻe ha tōʻonga fakamamahi, tōʻonga taʻetaau, pe hia fakamalaʻia ʻa ha taha kehe.”

ʻEletā Richard G. Scott (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá, konifelenisi lahi ʻo ʻEpeleli 1992 (Ensign, Mē 1992, 32).