“Ngaahi Lotu maʻá e Sioʻata Kakaú,” Ki Hono Fakamālohia ʻo e Toʻu Tupú, Siulai 2021, 27.
Ngaahi Makatuʻunga Mālohí
Ngaahi Lotu maʻá e Sioʻata Kakaú
Tā fakatātā ʻe Toby Newsome
Ne u ʻalu mo ʻeku tamaí ki Singatoka, Fisi—ko ha feituʻu lelei ke kakau ai ʻi he tahí. Naʻe vete ʻeku ongomātuʻá, ko ia, naʻe ʻikai ke mau ʻalu mo ʻeku fineʻeikí. Kimuʻa pea mau mavahé, naʻá ne ʻomai haʻaku kiʻi sioʻata kakau lanu vāleti. ʻIo ko ha sioʻata kakau pē ia, ka naʻá ne fakaʻamu ke tokangaʻi lelei ia ke toe foki mai mo ia.
ʻI he fakaʻosinga ʻo e ʻaho hono ua ʻi Singatoká, naʻá ku fakatokangaʻi ʻoku ʻikai ʻiate au ʻeku sioʻata kakaú. Ne u hohaʻa naʻa kuó u fakamoleki ia ʻi tahi. Ko e ʻuluaki meʻa ne u faí ko e lotu ke u lava ʻo maʻu ʻeku sioʻatá. Naʻá ku ongoʻi nonga peá u ʻiloʻi ʻe lelei pē ʻa e meʻa kotoa.
Ko e tokotaha pē naʻá ku talaange ki aí, ko hoku tuongaʻané. ʻOku ʻikai ke tui ki he ʻOtuá pea ʻokú ne faʻa fakaangaʻi ʻeku tuí koeʻuhí ko au tokotaha pē ʻi homau fāmilí ʻoku kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ne pehē mai, “ʻIo, he ʻikai te ke toe maʻu ia ʻe koe.” Naʻá ku talaange ki ai, “Naʻá ku lotua ia, pea ʻoku ou ʻiloʻi ʻe tali ʻeku ngaahi lotú.”
ʻI he ʻaho hono hokó, naʻá ku fakasio ʻi he tahí lolotonga ʻeku kakaú. ʻI he hokosia e taimi ke mau foki aí, naʻe teʻeki pē ke u maʻu e sioʻatá. Naʻá ku tali lelei mahalo he ʻikai ke u maʻu ia peá u fakamālō ki he Tamai Hēvaní ʻi Heʻene fakafiemālié mo e fakanongá.
Pea fakafokifā kuo kaila mai hoku tuongaʻané. Naʻá ne pukepuke hake ʻa e sioʻata lanu vāletí!
ʻOku teʻeki ai pē ke tui hoku tuongaʻané ki he ongoongoleleí, ka ʻoku ou houngaʻia ʻi he fiemālie, mālohi, mo e fakapapau ʻoku maʻu ʻi he taimi ʻoku ou tui ai ki he Tamai Hēvaní mo Sīsū Kalaisí.
Shreya S., Suva, Fisi