“Fakahoko ʻa e Tohí,” Ki Hono Fakamālohia ʻo e Toʻu Tupú, Siulai 2021, 18–19.
Fakahoko ʻa e Tohí
ʻE lava ke tokoni atu ʻa hono tohi hoʻo ngaahi fakakaukaú lolotonga hoʻo ako ʻa e folofolá, ke ke ako ai.
Naʻe talaange ʻe ha faifekau ʻe taha ki heʻene palesiteni fakamisioná, “Ko e taimi kotoa pē ʻoku ou kamata lau ai ʻa e folofolá, ʻoku ou tulemohe!” ʻOku hangē ʻa e folofolá ha foʻiʻakau fakamohé!”
Naʻe tali ange ʻe heʻene palesitení, “ʻOkú ke faʻa tohi nai ha fanga kiʻi fakamatala ʻi he taimi ʻokú ke laukonga aí?”
Naʻe tali ange ʻe he faifekaú, “ʻIkai.”
Naʻe pehē ange ʻe he palesitení, “ʻOku faingofua ke tulemohe pe fakakaukau ki ha ngaahi meʻa kehe ʻi he taimi ʻokú ke laukonga ʻataʻatā ai peé, ka ʻe faingataʻa ia ke tulemohe ʻi he taimi te ke tohi aí!”
Naʻe fakahoko ʻe he faleʻi naʻe ʻoange ʻe he palesiteni fakamisioná ki heʻene faifekau ne faingataʻaʻiá, ha liliu lahi. Ko ia ai, kapau ʻokú ke fekumi ki he founga foʻou ke fakamālohia ai hoʻo ako folofolá, kiʻi ʻahiʻahi fakahoko ange iá. ʻI hoʻo tohi kau ki he meʻa ʻokú ke laú, ʻe malava ke ke tokanga lahi ange mo ako lelei ange ai foki.
Ko ha ngaahi founga ʻeni kuo mau ʻiloʻi ʻoku ʻaonga moʻoni.
Misa Sitīveni Lanitī:
ʻOku ou tauhi ha kiʻi pepa telia naʻa ʻaonga ʻi he taimi ʻoku ou laukonga aí. ʻI he taimi ʻoku ueʻi ai au ʻe he Laumālié lolotonga ʻeku akó, ʻoku ou hikiʻi hifo ʻa e ngaahi ueʻi ko iá.
Naʻá ku maʻu ʻa e fakakaukaú meia ʻEletā Lisiate G. Sikoti (1928 – 2015) ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻa ia naʻá ne pehē: “Hiki ʻi ha feituʻu malu e ngaahi meʻa mahuʻinga ʻokú ke ako mei he Laumālié. Te ke ʻilo ʻi hoʻo hiki e ngaahi ongo mahuʻinga ʻokú ke maʻú, ʻe lahi leva ʻene toutou hoko maí. Ko e meʻa foki ʻe tahá, te ke maʻu ʻi hoʻo moʻuí kotoa ʻa e ʻilo te ke maʻu aí” (“To Acquire Knowledge and the Strength to Use It Wisely,” Ensign, Sune 2002, 32).
ʻOku ou ʻiloʻi ʻoku moʻoni ʻa e ngaahi lea ko iá. ʻI heʻeku teuteu ha ngaahi lea mo ha ngaahi lēsoní, ʻoku ʻikai ngata pē ʻi heʻeku ʻalu ki he folofolá ka ki he meʻa foki ne u hiki lolotonga ʻeku laukongá.
Misa ʻĀmata Kōpita:
ʻOku ou manako ʻi he ako fakatatau ki he kaveingá. ʻOku ou lau ʻa e folofolá mei he kamataʻangá ki he ngataʻangá, ka ʻoku ou saiʻia foki ʻi he hiki takai ʻeku laukongá ʻo ako e ngaahi kaveingá. Hangē ko ʻení, te u fakaʻaongaʻi ʻa e Fakahinohino ki he Ngaahi Folofolá ke maʻu ha ngaahi potufolofola ki he tuí pe ki hono tānaki fakataha ʻo ʻIsilelí. Pea ʻoku ʻikai ke u hiki fakamatala pē, ka ʻoku ou hiki ʻa e meʻa ʻoku ou akó ke fakapapauʻi ʻoku mahino moʻoni kiate au. ʻOku ou faʻa ofo maʻu pē ʻi he mahino lelei ange kiate au e ngaahi meʻá ʻi he taimi ʻoku ou fai ai ʻení. ʻOku ou fili foki ha ngaahi potufolofola ʻe niʻihi ke ako maʻuloto.
Misa Peletilī Uilakosa:
ʻOku ou tauhi ha tohinoa ako ʻa ia ʻoku ou tohi ai ʻa e ngaahi potufolofolá ʻi he ngaahi lea pē ʻaʻaku. Hangē ko ʻení, “He ko e tangata fakakakanó ko e fili ia ki he ʻOtuá” (Mōsaia 3:19) ʻoku ou hiki ia ko e “He ʻoku fili ʻa e tangata fielahí mo ʻikai fakatomalá, ke hoko ko ha fili ki he ʻOtuá, ka ʻoku ʻikai ko ha fili ia ʻa e ʻOtuá. Ko e ʻOtuá ʻa hono kaungāmeʻa lelei tahá.”
ʻOku ou hiki foki ha ngaahi fehuʻi. ʻE malava pē ko ha ngaahi fehuʻi ʻoku ou fakakaukau ki ai kimuʻa peá u laú, pe ko ha ngaahi fehuʻi naʻe makatuʻunga ʻi ha meʻa ne u lau. Tatau ai pē, ʻokú ne tokoniʻi au ke u tokanga.
Ko e Mālohi ʻo Hono Hiki Hoʻo Ngaahi Fakakaukaú
Ko kimautolu takitaha ʻi heʻemau kau palesitenisií, ʻoku mau ako ʻa e folofolá ʻi ha founga kehekehe, ka ʻoku mau hiki kotoa ia lolotonga ʻemau laukongá!
ʻOku tokoni ʻa e laukongá ke tau tukulotoʻi ʻa e ngaahi fakakaukaú mo e ngaahi ongó. ʻOku mahuʻinga ia. Pea ko e taimi ʻoku tau lea pe tohi aí, ʻoku tau ʻiloʻi mo fakahaaʻi ai ʻa e ngaahi fakakaukaú mo e ngaahi ongó ʻo kamata ʻi loto ʻo aʻu ki hono fakafōtunga ʻi tuʻá. ʻOku tau ongoʻi ʻokú ne tokoni ke tau fakaʻaongaʻi fakataautaha lelei ange ʻa e ngaahi moʻoni ʻo e ongoongoleleí.
Naʻe ʻiloʻi ʻe ha talavou ʻe taha ʻa e moʻoni ko ʻení ʻiate ia ʻi he kole ange ke ne fai ha lea ʻi he houalotu sākalamēnití. Kuó ne fanongo ki ha niʻihi tokolahi kuo nau lea ka naʻe ʻikai ke ne manatuʻi ʻa e ngaahi fakaikiikí. Ko e taimi ʻeni ia naʻe kehe. ʻI he taimi naʻá ne fokotuʻutuʻu ai ʻene leá, naʻe ʻikai ngata pē ʻene tokoni ke ne fai ha lea leleí, ka naʻá ne manatua foki ia ʻi ha taimi lōloa.
ʻE lava ke hoko ʻa e meʻa tatau ʻi hoʻo ako ʻa e folofolá. Kapau ʻokú ke tulemohe ʻi hoʻo fakaava hoʻo folofolá, kuo taimi ke ke ʻā. ʻAhiʻahi toʻo hake ha peni vahevahe, peni, telefoni, pe komipiuta pea kamata tohi. Te ke ofo ʻi he faikehekehe ʻokú ne lava ke fakahokó!