“Te Ke Lavaʻi Ia!” Ki Hono Fakamālohia ʻo e Toʻu Tupú, Siulai 2021, 24–26.
Haʻu, ʻo Muimui ʻIate Au
Te Ke Lavaʻi Ia!
ʻOku fie maʻu ke tau manatuʻi e meʻa kotoa kuo fakahoko ʻe he Tamai Hēvaní mo Sīsū Kalaisi—mo e meʻa ʻokú Na kei fakahoko—ke tokoni ke tau aʻusia ʻa e puleʻanga fakasilesitialé.
Tokāteline mo e Ngaahi Fuakava 76
“ʻA au? ʻI he puleʻanga fakasilesitialé? ʻOku ʻikai ke u tui te u lavaʻi ia.”
Kuó ke maʻu nai ha fakakaukau pehē? ʻOku angamaheni ke tau fifili pe ʻoku tau lelei feʻunga tautautefito ʻi he taimi ʻoku tau ngali taumamaʻo ai mei he moʻui haohaoá. Taimi ʻe niʻihi ʻoku hangē he ʻikai malava ke tau aʻusia ʻa e puleʻanga fakasilesitialé.
Kae ʻoua ʻe loto-foʻi. Ko e taumuʻa mahuʻinga ʻo e palani ʻa e Tamai Hēvaní ke tokoniʻi koe ke ke hoko ʻo hangē ko e Tamai Hēvaní mo Sīsū Kalaisi pea nofo mo Kinaua ʻi he puleʻanga fakasilesitialé. Pea ʻokú ke ʻi ha tuʻunga lelei ke lava ʻo fakahoko ia ʻo lelei ange ʻi he meʻa ʻokú ke fakakaukau ki aí. Kuo fakamanatu mai ʻe Palesiteni M. Lāsolo Pālati, ko e Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá, ko e toe nofo mo Kinauá “ʻoku mahulu atu ia ʻi haʻane hoko pē ko haʻatau taumuʻa—ʻoku toe hoko pē ia ko ʻEnau taumuʻa.”1
ʻOku finangalo ʻa e Tamai Hēvaní mo Sīsū Kalaisi ke tau nofo kotoa mo Kinaua ʻi he puleʻanga fakasilesitialé mo hotau ngaahi fāmilí, ʻo mahulu hake ʻi ha toe meʻa. Ko e ongoongo fakafiefiá, ʻoku ʻikai fie maʻu ke tau feinga toko taha pē ʻiate kitautolu ki ai. ʻI heʻetau haʻu kia Kalaisi pea muimui ʻiate Iá, ʻoku tau maʻu ʻa e mālohi mo e tokoni ʻoku tau fie maʻú. Koeʻuhi ko ʻEne Fakaleleí, ʻoku ʻikai ngata pē ʻa e ʻatā ke aʻusia ʻa e puleʻanga fakasilesitialé, ka ʻoku malava.
Pea ʻi Heʻene tokoní, te ke lava ke fakahoko ʻeni! Te ke lavaʻi ia!
Ko e Palani ʻa e ʻOtuá Maʻá e Tokotaha Kotoa Pē
Ke hū ki he puleʻanga fakasilesitialé, ʻoku fie maʻu ke tau maʻu ʻa e tui kia Sīsū Kalaisí pea fekumi ke fakalahi ʻa e tui ko iá. ʻOku fie maʻu ke tau feinga ke liliu pea fakatomala fakaʻaho. ʻOku fie maʻu ke tau papitaiso pea maʻu e meʻafoaki ʻo e Laumālie Māʻoniʻoní—pea manatuʻi maʻu pē ʻa Sīsū Kalaisi pea fakafoʻou ʻetau ngaahi fuakavá. ʻOku fie maʻu ke tau kātaki ki he ngataʻangá. Kapau ko e ngaahi meʻa ʻeni ʻokú ke holi mo feinga ki aí, ʻokú ke fononga atu ʻi he hala ʻo e tokotaha te ne aʻusia ʻa e puleʻanga fakasilesitialé.
ʻIkai ngata aí, kuo akoʻi mai ʻe Palesiteni Tāleni H. ʻOakesi, ko e Tokoni ʻUluaki ʻi he Kau Palesitenisī ʻUluakí, ko kinautolu ʻoku nau taau ki he nāunau māʻolunga taha ʻo e puleʻanga fakasilesitialé, ʻa “kinautolu kuo nau fakahoko ʻa e ngaahi fiemaʻu māʻolunga taha ki he puleʻanga ko ʻení, kau ai ʻa e tauhi faivelenga ʻo e ngaahi fuakava naʻe fakahoko ʻi he temipale ʻo e ʻOtuá mo mali ki he taʻengatá.”2 (Te ke lava ʻo ako lahi ange kau ki heni ʻaki hono lau ʻa e Tokāteline mo e Ngaahi Fuakava 76:50–70, 92–96).
Kapau ʻoku ngaohi koe ʻe he meʻá ni ke ke fifili—pe hohaʻa—kau ki hoʻo ngaahi teuteu ke aʻusia ʻa e puleʻanga fakasilesitialé, manatuʻi ko ha fonongaʻanga ia. Ko e ʻaho kotoa pē ʻoku tau fili ai ke hoko ʻo hangē ko ʻetau Tamai Hēvaní mo Sīsū Kalaisi, ko ha ʻaho ia ʻoku tau ʻunu ke ofi ange ai ki he hoko ʻo hangē ha tokotaha fakasilesitialé—pea ofi ange ai ki he puleʻanga fakasilesitialé. Ko e moʻoni ʻe ʻi ai ʻetau ngaahi fehalaaki mo e ngaahi faiangahala. Ko e kií ke tau falala kia Sīsū Kalaisi ʻi heʻetau fakatomala fakaʻahó. Ko ha fonongaʻanga ʻeni ʻoku tau ʻamanaki lelei ki ai koeʻuhí ko e meʻa kotoa kuó Na fakahoko mo ʻetau Tamai Hēvaní—mo e meʻa ʻokú Na kei fakahoko—ke tokoniʻi kitautolu ke tau aʻu ki aí.
ʻOku Tau Maʻu ʻa e Fakamoʻuí
ʻOku teuteuʻi ʻe he Fakamoʻuí ʻa e hala ke tau foki ai ki heʻetau Tamai Hēvaní. Naʻe fakamatalaʻi ʻe Siosefa Sāmita ʻa e niʻihi ʻoku nofo ʻi he puleʻanga fakasilesitialé, kuo nau “maʻu e fakamoʻoni ʻo Sīsuú” pea “kuo fakahaohaoaʻi ʻia Sīsū … ʻa ia naʻá ne fakahoko ʻa e fakalelei haohaoa ko ʻení ʻi he lilingi hono taʻataʻa ʻoʻoná” (Tokāteline mo e Ngaahi Fuakava 76:51, 69).
ʻOku ʻikai ʻuhinga e hoko ʻo haohaoa ʻia Sīsū Kalaisí he ʻikai ʻaupito te tau fai ha fehalaaki. ʻOku ʻuhinga ia te tau fakatomala pea feinga ke toe lelei ange he ʻaho takitaha, falala ki he Fakamoʻuí pea mo e mālohi ʻo ʻEne Fakaleleí ke tokoniʻi kitautolu ke tau liliu. ʻI heʻetau fakahoko ʻení, ʻe fakaʻatā ʻe Heʻene ʻaloʻofá ke tau fakalakalaka atu ki muʻa ki he nāunau māʻolunga taha ʻo e puleʻanga fakasilesitialé ʻa ia te tau nofo fakataha ai mo Ia, Tamai Hēvaní, mo hotau ngaahi fāmilí ʻo taʻengata. Te tau maʻu foki ʻa e meʻa kotoa ʻoku maʻu ʻe heʻetau Tamai ʻi Hēvaní. Ne ʻikai mei malava ʻeni ka ne taʻeʻoua ʻa e Fakamoʻuí.
ʻOku Tau Maʻu ʻa e Siasí
Naʻe akoʻi mai ʻe Palesiteni ʻOakesi, ʻoku ʻi heni foki ʻa e Siasí “ke tokoniʻi ʻa e fānau kotoa ʻa e ʻOtuá ke mahino kiate kinautolu ʻa e meʻa te nau malavá pea aʻusia ʻa e ikuʻanga māʻolunga tahá. ʻOku ʻi heni ʻa e siasí ke tokonaki maʻá e ngaahi foha mo e ngaahi ʻofefine ʻo e ʻOtuá, ʻa e ngaahi founga ke hū atu ai mo maʻu e hākeakiʻí ʻi he puleʻanga fakasilesitialé.”3 ʻOku fakahoko ʻeni ʻo fakafou ʻi he talangofua ki he ngaahi ouau mo e ngaahi fuakava ʻo e ongoongoleleí.
ʻOku fie maʻu ki he ngaahi ouau mo e ngaahi fuakava ko ʻení ʻa e lakanga fakataulaʻeikí, ʻa ia ʻoku maʻu ʻi he Siasi moʻoni pē taha ʻa e ʻOtuá. ʻI he ngaahi founga ko ʻení mo ha ngaahi founga kehe, ʻoku tokoni mai ʻa e ʻEikí mo Hono Siasí ʻi heʻetau fonongá ke tau aʻusia ʻa e lelei taha te tau ala aʻusiá koeʻuhi ke mateuteu ʻa hotau ngaahi lotó ke maʻu ai ʻi ha ʻaho ʻa e ngaahi meʻa kotoa pē ʻoku maʻu ʻe he Tamai Hēvaní mo maʻu ʻa e moʻui taʻengatá.
Laka Atu, pea ʻOua ʻe Foʻi!
ʻOku fakatupu ʻamanaki lelei ʻa e fononga ki he puleʻanga fakasilesitialé, ka ʻoku ʻikai ke faingofua maʻu pē. ʻOku ʻafioʻi ia ʻe he Tamai Hēvaní Kuó Ne talaʻofa mai mo Sīsū Kalaisi ke tokoni mo fakamālohia kitautolu ʻi he foʻi laka kotoa pē.
Laʻitā mei he Getty Images
Ko ia ai, laka atu, pea ʻoua naʻá ke foʻi. Te tau maʻu ha tokoni ʻi heʻetau feinga ke muimui ki he Fakamoʻuí, moʻui koeʻuhí ke tau taau ke maʻu pea ngāue fakatatau ki he ngaahi ueʻi mei he Laumālie Māʻoniʻoní, pea fakatokangaʻi e tafaʻaki ke tau fakaleleiʻí. ʻI heʻetau fononga ʻi he moʻuí ʻaki ʻa e tui kia Sīsū Kalaisi pea fakatomala ʻi he taimi ʻoku fie maʻu aí, ʻe tokoniʻi kitautolu ʻe he Tamai Hēvaní ke tau liliu ki he lelei angé.
ʻOku ʻikai maʻu ʻa e taau ki he puleʻanga fakasilesitialé ʻi ha foʻi ngāue maʻongoʻonga pē ʻe taha. Ko e ola ia ʻo e fili maʻu pē ke muimui ki he Fakamoʻuí mo falala ki he ʻamanaki lelei mo e ʻilo fakapapau ʻoku maʻu mei Heʻene ongoongoleleí.
Ko ia, kapau te ke feinga ke muimui ki he Fakamoʻuí pea kei hohaʻa pē pe te ke aʻu ki he puleʻanga fakasilesitialé pe ʻikai, ʻoku fakapapauʻi mai ʻe he ngaahi fakaʻilonga kotoa pē “ʻIo! Te ke lavaʻi ia!” Ko e taumuʻa eni ʻa e Tamai Hēvaní maʻatautolu kotoa! Pea hangē ko hono akoʻi mai ʻe Palesiteni ʻOakesí, ʻoku malava kotoa pē “koeʻuhi ko e ʻofa ʻa e ʻOtuá ki heʻene fānaú pea koeʻuhi ko e fakalelei mo e toetuʻu ʻa Sīsū Kalaisí, ʻʻa ia ʻokú ne fakaongoongoleleiʻi ʻa e Tamaí, mo fakamoʻui ʻa e ngaahi meʻa kotoa pē kuo ngaohi ʻe hono nimá’ [Tokāteline mo e Ngaahi Fuakava 76:43].”4