“O le Fuafuaga Paia o le Avea Atili,” Mo le Malosi o le Autalavou, Iulai 2021, 2–5.
O Le Fuafuaga Paia o le Avea Atili
Pe a tatou vaai i le olaga faaletino i le atoaga, tatou te iloa ai e le o se fesili o le “ia avea po o le le avea?” ae nai lo lena “ia avea atili po o le le avea atili?”
Sa faamanuiaina a’u e faatasi ma lo’u toalua i le fanau mai o le ma fanau taitoatasi ma auai foi i le oti o o’u matua taitasi. Sa ou te’i i le lagonaina o le mea na ou lagonaina i le taimi o le fanau mai ma le taimi o le oti. Sa ou lagonaina sa tupu se mea paia. O lo tatou taimi i le lalolagi o se vaega taua e faavavau o lo tatou olaga. O le lagi e faailoga ai le amataga ma le faaiuga o olaga taitasi faaletino.
O le mea e tatau ona tatou faia a o tatou i ai iinei i le lalolagi e faatoa malamalama i ai i le iloaina o le mea na tupu a o lei fanau mai ma le mea o le a tupu pe a mavae le oti. Afai o lo tatou olaga i le lalolagi ua na o le pau lena, tatou te ono “aai ma feinu, ma fiafia” (2 Nifae 28:7) e aunoa ma le popole tele mo isi. Ae a tatou vaai i le olaga faaletino i le atoaga, tatou te iloa ai e le o se fesili o le “ia avea po o le le avea?” ae nai lo lena “ia avea atili po o le le avea atili?”1
O le malamalama i le fuafuaga o le faaolataga—lo tatou olaga a o lei fananau mai, le faamoemoega o lo tatou olaga i le lalolagi, o lo tatou olaga pe a mavae le oti—ma o le matafaioi autu o lo tatou Faaola, o Iesu Keriso, o loo faatinoina i lena fuafuaga ua faaalia ia i tatou faapea o le a Ia fesoasoani ia i tatou i lenei olaga. A o tatou osia feagaiga ma Ia, tatou te tuuina i tatou lava i luga o le ala o le feagaiga—ma avea atili i tatou e faapei o Ia ma lo tatou Tama Faalelagi, e ala i laasaga taitasi.
O lo Tatou Olaga Ae Le’i I ai le Lalolagi
Ua a’oa’o mai e faaaliga o i tatou o fanau agaga a le Atua ma sa tatou nonofo faatasi ma Ia mo se taimi umi ae tatou te le’i o mai i le lalolagi. Sa saunia e lo tatou Tama Faalelagi se ala e avea atili ai i tatou faapei o Ia. O i latou na filifilia le fuafuaga a lo tatou Tama o le faaolataga po o le fuafuaga o le fiafia i le muai olaga—o i tatou uma lava—sa filifili e “avea atili.”
Elder Christofferson ma lona faletua ma le fanau.
O lo Tatou Olaga i le Lalolagi
Na tatou o mai i se lalolagi na foafoaina e le Atua ma lona Alo, o Iesu Keriso. Sa tatou mauaina se tino faaletino. O le i ai o se tino e taua i le mauaina o le mamalu e olioli ai le Atua. Afai tatou te faailoa atu o le a tatou tausia poloaiga a le Atua, o le a “faaopoopoina i luga o [tatou] ulu le mamalu e faavavau ma faavavau lava” (Aperaamo 3:26). O le uiga o lenei mea, o le a avea i tatou e pei o o tatou matua faalelagi ma ola faatasi ma i la’ua e faavavau. Sa tatou alalaga fiafia i nei avanoa mamalu.
Sa umi se taimi o ta faatalitali, ae ua ta i ai nei i le lalolagi. Tatou te tulimata’i atu i le taimi tatou te toetutu mai ai ma se tino ola pea atoatoa ma ulu atu i le malo selesitila e olioli ai i le ola e faavavau—o se mea e matua ofoofogia lava e le mafai ona tatou mafaufauina. I le taimi nei, o loo tatou a’oa’o ma taumafai e “fai mea uma o soo se mea e poloaiina ai [ tatou]e le Alii [lo tatou] Atua” (Aperaamo 3:25). Talu ai ua tatou iloa le fuafuaga a le Atua, ua tatou iloa ai o nei poloaiga e le o tuuina mai e faatapulaaina ai lo tatou saolotoga po o le fiafia—na o le faafeagai lava. O poloaiga o lo tatou taiala lea i le saolotoga ma le olioli maoae.
Na ia saunia se Faaola
Ae, e faigata pea le olaga. Tatou te tautevateva uma lava a o tatou a’oa’o e ola i le faatuatua. Ae na folafola mai e le Atua ia i tatou a o le’i foafoaina le lalolagi o le a Ia saunia se Faaola e lavea’i i tatou mai le agasala ma le oti. E ala i Lona lava puapuaga ma le maliu—o Lana Togiola—na totogi ai e Iesu Keriso a tatou agasala ma ofoina mai ia i tatou le meaalofa o le salamo. O lea, a tatou salamo, Na te faamagaloina a tatou agasala ma faamamaina i tatou mai o latou aafiaga. Ma e ala i Lona Toetu, ua tuu mai ai e le Faaola ia i tatou le meaalofa o lo tatou lava toetu ma le tino ola pea.
Ia Tootutuli Tulivae Uma, saunia e J. Kirk Richards
Savavali i le Ala o le Feagaiga
E pei lava ona tatou fananau mai faaletino i lenei lalolagi faaletino, e ao ona toe fanauina i tatou faaleagaga i le malo o le lagi. Tatou te faia lenei mea e ala i le faaaogaina o le faatuatua ia Keriso, salamo, papatisoina, ma maua le Agaga Paia. O le amataga lenei o se liua faaleagaga lea e oo mai i lo tatou olaga atoa i le lalolagi. O nisi taimi tatou te ta’ua ai o le “tumau e oo i le iuga,” o lona uiga, tatou te taumafai e tausia a tatou feagaiga o le papatisoga i le usiusitai i o tatou olaga atoa, salamo pe a manaomia ai ma toe agai i luma. “Ioe, ma o le tele o taimi e salamo ai loʼu nuu,” ua fetalai ai Iesu, ‘Ou te faamagalo ai i latou ia latou solitulafono faasaga mai ia te aʼu” (Mosaea 26:30).
E Mafai Ona E Faalagolago i le Fesoasoani a le Atua
I lou olaga a o le’i fanau mai, na e filifilia ai le Atua, na e filifilia Keriso, na e filifili e “avea atili” faatasi ma le La fesoasoani. Ma e mafai ona e faalagolago i le La fesoasoani. O sui o le aiga Atua e le na o le maimoa mai ma lē ano mai i o tatou olaga. Latou te alolofa tele ia i tatou ma faaaoga lo latou mana e fesoasoani ai ia i tatou, pe afai o le a tatou faatagaina. Latou te faaaloalo e le aunoa i lo tatou faitalia, ae ua Latou naunau e faamanuia i tatou. Ua faamautinoa mai e Iesu ia i tatou, “O le a le galo ia te a’u oe, le aiga e o Isaraelu. “Faauta, ua Ou togitogia oe i luga o alofilima o o’u lima.” (1 Nifae 21:15--16).
Avea ma Tagata Sili Atu i lea Laasaga i Lea Laasaga
E lagona e nisi o le malo selesitila o se faamoemoega e tatau ai mo isi ae e le mo i latou. O le mea moni, e leai se tasi e agavaa e aunoa ma le alofa tunoa o Iesu Keriso. O le mea e faafetai ai, e mafai ona e maua Lona alofa tunoa. Sa ta’u mai e Iesu ia i tatou ua Ia manumalo i le lalolagi. Faatasi ai ma lou papatisoga ma isi feagaiga, ua e fusia ai oe lava ia te Ia, ina ia e manumalo foi i le lalolagi faatasi ma Ia.
E te le tau ausia le atoatoaga iinei i le lalolagi. Na faatusa e le Perofeta o Iosefa Samita i le a’ea o se apefai: e te amata i le pito i lalo ma ae i luga i lea laasaga ma lea laasaga i le a’oa’oina ma ola ai i mataupu faavae o le talalelei. Ma o lena a’oa’oga, sa ia a’oa’o mai ai, o loo faaauau pea i tua atu o lenei olaga—“e le o mea uma e mafai ona malamalama i ai i lenei lalolagi.”2
Po o a lava vaivaiga, faigata, po o mafatiaga tatou te feagai i le lalolagi, ua folafola mai e le Atua i Ana fanau faamaoni e leai se faamanuiaga o le a taofia pe afai tatou te tumau i luga o le ala o le feagaiga (pe vave foi ona toe foi i ai). Ona lelei lea o mea uma. O le fuafuaga paia lena o le avea atili!