Tausia o a Tatou Folafolaga

Saunia e Elder Ronald A. Rasband

O Le Korama a Aposetolo e Toasefululua

Mai se lauga o le konafesi aoao ia Oketopa 2019.

tamaitiiti o loo toe tuuina atu le atotupe, teineitiiti ma le tusi faamaonia, ma le tamaitiiti o loo a’e i le mauga

I se tasi afiafi a o o’u talavou, sa ma saofafa’i ma lo’u tina i vae o le moega ma talanoa ma le faamaoni i le taua o le ola i le Upu o le Poto. Sa ia pulato’a i o’u mata, ma sa ou lagonaina ana upu ua tuia ai lo’u loto: “Folafola mai ia te a’u, Ronnie, i le aso nei, o le a e ola i aso uma i le Upu o le Poto.” Sa ou faia ma le faamaoni lena folafolaga ia te ia, ma sa ou piimau ai i nei tausaga uma lava.

Sa ou muai faia se faaiuga e mulimuli i tulafono a le Atua, ma ou te le’i toe tau mafaufau faalua i ai. Na fetalai mai le Alii, “E noatia a’u, le Alii, pe a outou faia mea ou te fai atu ai; ae pe a outou le faia mea ou te fai atu ai, e leai sa outou folafolaga” (Mataupu Faavae ma Feagaiga 82:10).

I le avea ai ma se Aposetolo a le Alii o Iesu Keriso, ou te valaaulia outou ia mafaufau i folafolaga ma feagaiga ua outou osia ma le Alii, ma faatasi ai ma isi, ma le amio sa’o tele, ma le iloaina o le a outou savavali ia outou upu. Ou te folafola atu ia te outou, a outou faia lenei mea, o le a faamautuina e le Alii a outou upu ma faapaiaina a outou galuega a o outou tauivi ai ma le filiga e le faavaivai e atiae o outou olaga, o outou aiga, ma Le Ekalesia a Iesu Keriso o le Au Paia o Aso e Gata Ai. O le a faatasi o Ia ma outou, ma e mafai ona outou tulimatai atu i le “taliaina i le lagi, ina ia [e] mafai ona mafuta ai ma le Atua i se tulaga o le fiafia e le gata” (Mosaea 2:41).