Tatalo e uiga i le Mata ‘Aau

Sa i ai se taimi na ma o ai ma lo’u tama i Sigatoka, Fiti—o se nofoaga sili lea e aau ai i totonu o le vasa. Sa tete’a o’u matua, o lea sa le sau ai lo’u tina faatasi ma i matou. Ae ma te le’i o ese, sa ia faatauina mo a’u se mata aau viole. O le mea moni, ua na o se mata aau, ae na ia faamoemoe ou te tausia faalelei ma toe aumaia.

I le faaiuga o le aso lona lua i Sigatoka, na ou iloaina ai e le o i ai la’u mata aau. Sa ou popole na leiloa i le vasa. O le mea muamua lava sa ou faia o le tatalo ia mafai ona ou maua la’u mata aau. Sa ou lagona le filemu ma iloa ai o le a SEKI mea uma.

Na pau lava le tagata na ou ta’ua i ai o lo’u tuagane. Na te le talitonu i le Atua ma e masani ona faitioina o’u talitonuga ona e na o a’u le tagata O Le Ekalesia a Iesu Keriso o le Au Paia o Aso e Gata Ai i lo’u aiga. Sa ia fai mai, “Ioe, o le a e le toe mauaina.” Sa ou fai atu ia te ia, “Sa ou tatalo e uiga i ai, ma ou te iloa o le a taliaina a’u tatalo.”

O le aso na sosoo ai sa ou vaavaai solo ai i le vai a o matou feausi. Ina ua oo i le taimi matou te o ai, ou te le’i maua lava la’u mata aau. Sa ou taliaina atonu o le a ou le mauaina lava ma faafetai atu i le Tama Faalelagi mo Lona mafanafana ma le filemu.

Ona faafuasei lea ona ‘e’ē mai lo’u tuagane. Sa ia uuina i luga le mata aau viole!

E le talitonu lava lo’u tuagane i le talalelei, ae ou te faafetai mo le mafanafana, malosi, ma le faamautinoaga lea e oo mai pe a ou tuu lo’u faatuatua i le Tama Faalelagi ma Iesu Keriso.

Shreya S., Suva, Fiti