‘E Mafai Ona E Faia!” Mo le Malosi o le Autalavou, Iulai. 2021, 24–26.
Sau, Mulimuli Mai ia te A’u
E Mafai Ona E Faia!
E tatau ona tatou manatua mea uma ua faia e le Tama Faalelagi ma Iesu Keriso—ma mea ua faaauau ona La faia—e fesoasoani ia i tatou e mautofi ai i le malo selesitila.
Mataupu Faavae ma Feagaiga 76
“O a’u? I le malo selesitila? Ou te le manatu e mafai ona ou faia.”
Pe na i ai se taimi na e manatu faapea ai? Ia, o se mea masani le mafaufau pe o lava lo tatou lelei ae maise lava pe a foliga mai ua tatou mamao lava mai le atoatoa. O nisi taimi e lagona ai e pei o le malo selesitila e le mafai ona ausia!
Ae aua le faavaivai. O le faamoemoe atoa lava o le fuafuaga a le Tama Faalelagi o le fesoasoani lea ia te oe ia avea e faapei o le Tama Faalelagi ma Iesu Keriso ma ola faatasi ma i Laua i le malo selesitila. Ma ua e i ai i se tulaga e sili atu ona lelei nai lo le mea e te manatu o loo e i ai. Na faamanatu mai ia i tatou e Peresitene M. Russell Ballard, o le Sui Peresitene o le Korama a Aposetolo e Toasefululua, o lo tatou toe nonofo faatasi ma i Laua “e sili atu nai lo le na la tatou sini—o le La sini foi.”1
E sili atu i lo se isi lava mea, e finagalo le Tama Faalelagi ma Iesu Keriso ia i tatou uma ina ia nonofo i le malo selesitila faatasi ma i Laua ma o tatou aiga. O le tala fiafia e faapea e le tatau lava ona tatou oo iina na o i tatou lava. Pe a tatou o mai ia Keriso ma mulimuli ia te Ia, tatou te maua le malosi ma le fesoasoani tatou te manaomia. Ona o Lana Togiola, o le mautofi i le malo selesitila e le gata ina mafai, ae e oo i ai.
O lea la, faatasi ai ma Lana fesoasoani, e mafai ona e faia lenei mea! E mafai ona e faia!
O le Fuafuaga a le Atua E mo Tagata Uma
Ina ia ulu atu i le malo selesitila, e tatau ona i ai lo tatou faatuatua ia Iesu Keriso ma saili e faateleina lena faatuatua. E tatau ona tatou taumafai e sui ma salamo i aso uma. E manaomia ona papatisoina i tatou ma maua le meaalofa o le Agaga Paia—ma ia manatua e le aunoa ia Iesu Keriso ma faafou a tatou feagaiga. Ona tatau ona tatou tumau e oo i le iuga. Afai o mea nei e te manao i ai ma o loo tauivi i ai, ua e i ai i lou ala e avea ai ma se tasi e mautofi i le malo selesitila.
Ma le isi, na a’oa’o mai Peresitene Dallin H. Oaks, le fesoasoani muamua i le Au Peresitene Sili, faapea o i latou o e agavaa mo le tikeri aupito maualuga o le malo selesitila o “i latou o e ua ausia tulaga manaomia aupito maualuluga mo lenei malo, e aofia ai le faamaoni i feagaiga na osia i se malumalu o le Atua ma le faaipoipoga mo le faavavau.”2 (E mafai ona e a’oa’o atili e uiga i lenei mea i le faitauina o le Mataupu Faavae ma Feagaiga 76:50 – 70,92 – 96).
Afai o lenei mea e te ofo ai—pe popole ai—i au sauniuniga e mautofi i le malo selesitila, ia manatua o se malaga. O aso taitasi tatou te filifili ai e avea atili e faapei o lo tatou Tama Faalelagi ma Iesu Keriso o se aso tatou te latalata atili ai i le avea ma se tagata selesitila sili atu—ma latalata atili atu ai i le malo selesitila. Ioe, o le a i ai ni sasi, mea sese, ma agasala mo i tatou uma. O le faalagolago ia Iesu Keriso pe a tatou salamo i aso taitasi o le ki lea. O lenei malaga o se tasi o faamoemoega o mea uma na faia e Ia ma lo tatou Tama Faalelagi—ma mea ua faaauau ona La faia—e fesoasoani ia i tatou ina ia oo atu iina.
Ua Ia i Tatou le Faaola.
Ua saunia e le Faaola le ala mo i tatou e toe foi atu ai i lo tatou Tama Faalelagi. Na faamatala e Iosefa Samita i latou o e nonofo i le malo selesitila na “taliaina le molimau ia Iesu” ma ua “faaatoatoaina e ala ia Iesu … o le na faia lenei togiola ua atoatoa e ala i le faamaligiina o lona lava toto ”(Mataupu Faavae ma Feagaiga 76:51, 69).
O le faaatoatoaina ia Iesu Keriso e le faapea tatou te le faia lava ni mea sese. O lona uiga tatou te salamo ma taumafai ina ia lelei teisi atu i aso uma, ma faalagolago i le Faaola ma le mana o Lana Togiola e fesoasoani ia i tatou ina ia suia. A’o tatou faia lenei mea, o Lona alofa tunoa e mafai ai ona tatou agai i luma i le tikeri aupito maualuga o le malo selesitila lea o le a tatou ola faatasi ai ma Ia, le Tama Faalelagi, ma o tatou aiga e faavavau. O le a tatou mauaina foi mea uma o loo i ai i le Tama Faalelagi. E leai se tasi o nei mea e mafai ona faia e aunoa ma le Faaola.
Ua Ia I Tatou le Ekalesia
Sa a’oa’o mai Peresitene Oaks faapea ua i ai foi le Ekalesia iinei “e fesoasoani i fanau uma a le Atua ia malamalama i lo latou gafatia ma ausia lo latou taunuuga silisili ona maualuga. Ua i ai lenei Ekalesia e tuuina atu i atalii ma afafine o le Atua mea e manaomia e ulufale atu ai ma le faaeaga i le malo selesitila. “3 E faia lenei mea e ala i le usiusitai i sauniga ma feagaiga o le talalelei.
O na sauniga ma feagaiga e manaomia ai le perisitua—lea na o le Ekalesia moni a le Atua e maua ai. I nei auala ma isi, e fesoasoani mai le Alii ma Lana Ekalesia ia i tatou i la tatou malaga ia avea ma tagata sili e mafai ona avea ai i tatou ina ia saunia o tatou loto ina ia i ai se aso e mautofi ai i mea uma o loo i ai i le Tama Faalelagi ma maua ai le ola e faavavau.
Alu Pea, ma Aua le Fiu!
O lenei malaga agai atu i le malo selesitila e i ai faamoemoega, ae e le faigofie i taimi uma. E silafia e le Tama Faalelagi lena mea. Ua Ia folafola mai ia i tatou ma Iesu Keriso e fesoasoani ma faamalosia i tatou i laasaga uma o le ala.
Atapue mai le Getty Images
Ia faaauau pea, ma aua le fiu. O le a tatou maua le fesoasoani a’o tatou taumafai e mulimuli i le Faaola, ola ina ia tatou agavaa e maua ma faatino i luga o uunaiga mai le Agaga Paia, ma iloa ai le mea e mafai ona tatou faaleleia ai. A o tatou ola i le olaga ma le faatuatua ia Iesu Keriso ma salamo pe a tatou manaomia, o le a fesoasoani mai lo tatou Tama Faalelagi ia i tatou ia suia mo le lelei sili atu.
O le agavaa mo le malo selesitila e le faataunuuina i se faatinoga sili se tasi. O le taunuuga o le filifili e le aunoa e mulimuli i le Faaola ma faalagolago i le faamoemoe ma le faamautinoaga lea e sau mai Lana talalelei.
O lea, afai e te taumafai e mulimuli i le Faaola ma e popole pea pe e te oo atu i le malo selesitila, o faailoga uma e faasino i se “Ioe! E mafai ona e faia!” O le mea lenei ua faamoemoeina e le Tama Faalelagi mo i tatou uma! Ma e pei ona a’oa’o mai Peresitene Oaks, ua mafai mea uma “ona o le alofa o le Atua mo ana fanau ma ona o le togiola ma le toetu o Iesu Keriso, ‘ o le faamamaluina le Tama, ma faasaoina uma galuega a ona aao ’ [Mataupu Faavae ma Feagaiga 76:43].”4