“Olioli o Kosei,” Mo le Malosi o le Autalavou, Iulai. 2021, 12–15.
Olioli o Kosei
O lenei alii talavou mai Iapani e fiafia e faasoa atu le talalelei.
Atapue mai le Getty Images
E ta piano o ia. E tamoe o ia i tuuga. E puna umi foi o ia! Ae e le na o le pau ia o mea mataina e uiga ia Kosei H., o se alii talavou e 17 tausaga le matua mai Nagasaki, Iapani.
“O ia o se tasi o faifeautalai silisili ua ou iloaina,” o le tala lea a Sister McKenna Frasure, o se faifeautalai faatoa foi mai o le sa auauna atu i Iapani lea e nofo ai Kosei. “E le misi lava se avanoa ia Kosei e faatasi ai ma faifeautalai pe molimau atu ia Keriso e ala i gaoioiga a le Ekalesia ma ala o faasalalauga faaleagafesootai,” o lana tala lea.
Ua manatu Kosei o faifeautalai o nisi ia o ana uo mamae. Ma e le o se mea e faate’ia ai lona lagonaina faapea i le taimi e te iloa ai lona fiafia e faasoa atu le talalelei.
“O le galuega faafaifeautalai o lo’u olioli lea,” o le tala lea a Kosei. “Ua a’oa’o mai Nifae ia i tatou e faapea o le fua o le laau o le ola ‘o le mea lea ua silisili atu ona manaomia i mea uma’ (1 Nifae 11:22). O nisi tagata e ono teena lenei fua. Ae peitai, i le avea ai ma se tasi e iloa le suamalie o le fua, ou te manao e faasoa atu le talalelei ia i latou o siomia au.”
O le faasoaina atu o faamanuiaga o le talalelei atonu o le taleni sili ona tele lea a Kosei.
Faamanuiaina i Ala o Faasalalauga Faaleagafesootai
Ina ua mae’a ona aveina se vasega o le sauniuniga a le faifeautalai, sa lagona e Kosei se manao sili atu e aumaia le olioli o le talalelei i ana uo. Sa ia amata i le alu i le Initoneti. O se tasi o meafaigaluega autu o loo ia faaaogaina e faasoa atu ai savali ma anotusi e faatatau i le talalelei o faasalalauga faaleagafesootai.
E toatele nisi o ana uo na tali atu i nei manatu i ala o faasalalauga. O se tasi o uo faapitoa na sau lava ia Kosei ma fai mai, “E i ai so’u fiafia i lau lotu.”
O lenei uo sa na o se paaga i le taimi muamua, ae na vave lava ona faaleleia le la faigauo. “Sa amata ona ia fesili mai ia te a’u i le eseesega o lona faatuatua ma a’u,” o le tala lea a Kosei. “E ui lava ou te le’i talanoa so’o ia te ia, sa avea i ma’ua ma se uo lelei ina ua uma ona ou faasoaina atu le talalelei i luga o ala o faasalalauga faaleagafesootai.”
Taaloga, Mea e Fiafia ai, ma Faigauo e Faavavau
O ala o faasalalauga faaleagafesootai e le na o le pau lea o le auala a Kosei e faasoa atu ai lona faatuatua. Manatua, e i ai sona olaga pisi tele e tumu i gaoioiga. E tele avanoa na te maua e feiloai ai ma tagata ma faia ni uo. Ma na te faaaogaina na avanoa e faasalalau ai le olioli o le talalelei.
“I se tasi taimi, sa ou valaaulia ai se uo i le kalapu o taaloga i le vasega Igilisi sa faiaoga ai faifeautalai i le lotu,” o le tala lea a Kosei. “Sa avea o ia ma faifeautalai o ni uo lelei ma le tasi a o ia a’oa’oina le Igilisi.”
Ae peitai, sa le’i gata ai talanoaga i lesona Igilisi.
“Na amata ona mafaufau la’u uo pe aisea na faia ai e nei faifeautalai, o e sa toetoe lava a tutusa o latou tausaga, ia galuega volenitia ma auauna atu o ni faifeautalai i Iapani. O le isi ana fesili o le fesili lea po o le a le mea ua uunaia ai faifeautalai e auauna atu. Ua faalogo nei o ia i lesona a faifeautalai ma o loo i ai pea se fesootaiga ma faifeautalai e ala i talanoaga faavitio.”
Soo se taimi lava na te talanoa ai i le talalelei i ana uo, e taumafai Kosei e faafetaui mea na te faasoa atu i o latou tulaga o le naunau i ai. “Mo se faataitaiga, ou te muai talanoa e uiga i le mea e tupu pe a mavae le oti, o le a le faamoemoega o le olaga, po o le i ai o se Atua,” o lana tala lea. “Ona mafai lea ona ou fetuunaia, e fuafua i mea latou te fiafia i ai.”
Ioe, na te iloa lava e le o tagata uma o le a fiafia mai. Na ia te ia mea faalavefau, e pei lava o isi. I se tasi aso, ina ua uma ona fesili atu nisi o ana uo ia te ia i ni fesili e uiga i le Ekalesia, sa taumafai Kosei e faasoa atu se tamaitusi o le Ekalesia faatasi ma se tasi o i latou. “Ae peitai, sa tamoe atu lena uo i fafo o le potuaoga ma ata leotele mai ia te a’u i le faapaologa.
“Na mafua ai ona ou faanoanoa tele,” o le tala lea a Kosei.
Ae na te le faatagaina le lotovaivai e taofia o ia. Ua ia iloa o mea o loo ia faasoa atu o le a faamanuiaina ai o latou olaga e faavavau pe a latou faalogo.
O le Olioli Lena e Uunaia o Ia
“Ou te lagona le olioli i a’oa’oga a Keriso,” o le tala lea a Kosei. “Ana faapea ou te le iloa na a’oa’oga, semanu ou te maua se olaga e aunoa ma le olioli moni.”
A o ia tauivi ma le tele o ana gaoioiga ma mea e fiafia i ai, e iloa e Kosei mea e faamuamua. “O le talalelei a Iesu Keriso e aumaia le faamoemoe i o tatou olaga ma faaali mai mea uma e tatau ona tatou faia,” o lana tala lea. “E tusa lava pe tatou te lagona le faanoanoa po o le i ai o se taimi faigata, o le tatalo faamaoni o le a aumaia ai le filemu ma fesoasoani ai ia i tatou ia i ai se uiga faaalia lelei.”
O le mea lena e naunau ai o ia e faasoa atu le talalelei i avanoa uma na te maua. Na te manao ia aafia isi i mea e fiafia i ai o ia i aso taitasi! “Ou te faamoemoe mai le taele o lo’u loto, o le toatele o tagata e ono maua le avanoa e maua ai lenei olioli moni,” o lana tala lea.
O le Mea e Sili le Taua
O le mea masani, o le faasoaina atu o le talalelei e le faatumuina ai lona taimi atoa. E galue malosi Kosei i isi ana sini i le olaga. O aso uma lava na te faia ai ni koleniga malolosi i le tamoe ma le malosi. Pe a manaomia ona ia malolo mo sina taimi, na te taina le piano. Na te fiafia foi i le asiasi i le natura ma faaalu le taimi ma lona aiga. “I fafo i le natura ma nai o’u tei—o le a le galo lava ia te a’u le aso na matou maua mai ai ni i’a ma aai ai!” o lana tala lea.
Ae ui i lea, o loo faaauau pea ona faaavanoaina e Kosei le taimi mo le mea e sili ona taua.
Ma e i ai sana fautuaga laitiiti mo soo se isi lava e manao e faia lea lava mea e tasi: “Tatou te maua le taitaiga pe a tatou tausia poloaiga. A o tatou faia faapea, e mafai ona faamalosia i tatou e le Alii. O popolega ma atuatuvalega e suia i le faamoemoe ma le mautinoa. Afai tatou te tatalaina o tatou gutu e aunoa ma le maasiasi i le talalelei, o le a oo ina iloa e tagata le alofa faaKeriso ma o le a faatumulia i le olioli.”