Fesili ma Tali

“E mafai faapefea ona ou taofia le fesiligia o lo’u lava taua faaletagata lava ia?”

“Afai e na o mata faaletino tatou te tilotilo ai ia i tatou lava, atonu o le a tatou le vaaia i tatou lava o ni tagata ua lava le lelei. Ae e silasila lo tatou Tama Faalelagi ia i tatou o … Ona atalii ma afafine, o tagata o le malamalama e faavavau faatasi ai ma gafatia e faavavau atoa ai ma se taunuuga paia.”

Peresitene Dieter F. Uchtdorf, a o avea ma Fesoasoani Lua i le Au Peresitene Sili, “E Aoga!” konafesi aoao Oke. 2015 (Ensign po o le Liahona, Nov. 2015, 105).

E Ala I Fofoga o le Tama Faalelagi

tamaitai talavou

“I aso uma, ou te tatalo ai i le Tama Faalelagi ma ole atu ia te ia e fesoasoani mai ia ou vaai ifo ia te a’u lava i le ala ua Ia silasila mai ai ia te a’u. Ona ou faalogo lelei lea a o tuuina mai e le Agaga ia te a’u ni savali lelei mai le Atua e uiga i lo’u taua ma lo’u faasinomaga, ma ou te ta’u atu nei upu ia te a’u lava i le fa’ata. O lenei gaoioiga faigofie o se auala e mafai ona tatou fesootai ai ma le lagi ma iloa ai e alofa le Tama Faalelagi ma Iesu Keriso ia i tatou ma talitonu ia i tatou.”

Madeleine M., 14, Niu Ioka, ISA

Fiafia i o Tatou Eseesega

tamaitai talavou

“Ou te faia pea le mea sili ia ou manatua ai o a’u o se atalii pele o le Atua. Ou te taumafai e aua nei o’u faatusatusaina a’u lava i isi, aua o lena mea e faigata ai ona talitonu i lo’u taua faaletagata lava ia. Na faia e le Atua i tatou uma o ni tagata e tulaga ese ma matagofie i o tatou lava ala, ma o na eseesega o se mea lelei.”

Brooke D., 14, Alberta, Kanata

O Se Faamanuiaga e le o Manino Mai

alii talavou

“E masani ona tatou manatu o le vaivai po o le i ai o ni mea sese tatou te le taua ai. O le mea moni, ua faamanuiaina i tatou ina ia mafai ona tatou tulai i luga ae o i latou ma avea ma ni vaega sili atu ona lelei o i tatou lava e ala i le lotomaualalo ma le faaleleia o i tatou lava. Afai tatou te galulue i mea e faigata mo i tatou, o le a silasila ma tauia e le Alii a tatou taumafaiga. E faatatau uma lava i le taumafai ma aua lava le fiu.”

Ricardo R., 17, Chihuahua, Mekisiko

O Lo Tatou Amio Atua

alii talavou

“E leai se mea e faatusalia i le iloaina faapea i le avea ai ma fanau a le Atua soifua, e mafai ona avea i tatou e faapei o Ia. E suia ai mea uma! A tatou maua ni mafaufauga leaga tatou te fesiligia ai lo tatou taua, ia manatua o na manatu e sau mai ia Satani, ae le o le Atua. O loo i ai lo tatou gafatia e le iu ma o se natura paia, e pei lava o lo tatou Tama Faalelagi. E faatuatuaina ma alofa o Ia ia i tatou taitoatasi.”

Alexandre S., 16 tausaga, Minas Gerais, Pasila

Tiutetauave Sili

tamaitai talavou

“A o ou taumafai e suesue ma mafaufau loloto i tusitusiga paia ma upu a perofeta soifua, e mafai ona ou lagonaina le Agaga Paia e faatasi ma a’u, lea e faamanatu mai ai ia te a’u o a’u o se afafine faapelepele o ni matua faalelagi ma e i ai fuafuaga sili a le Atua mo a’u. O loo faaali mai pea e le aunoa e Peresitene Nelson ia i tatou ia tiutetauave sili o loo ia i tatou i nei aso e gata ai ma e faatuatuaina i tatou e le Atua ma silafia mea tatou te agavaa ai.”

Mirian P., 16, Paraná, Pasila

Faia se Mea E te Fiafia i Ai

“A amata ona tatou fesiligia lo tatou taua faaletagata lava ia, e mafai lava ona tatou saili atu i taimi uma le fesoasoani mai isi tagata. Ae muamua, e mafai ona tatou amata galulue i o tatou lava mafaufauga. E mafai ona tatou faamalositino, fegalegaleai ma uo ma aiga i auala lelei, po o le faia o se gaoioiga tatou te fiafia i ai. E fesoasoani lenei mea ia i tatou ia iloa ai o i tatou o fanau a le Atua, o le na tuuina mai ia i tatou le taua ma taleni.”

Carlos V., Mekisiko

Ia Faamasani ia te Oe Lava Ia

“Sa ou iloaina e sili atu ona faigofie ona ou alofa ia te a’u lava ia aua na o’u faaaluina le taimi e fuafua ai po o ai a’u. Sa ta’u mai e lo’u tama matua ia te a’u i se tasi taimi, “E tatau ona e ola ma oe lava ia mo le faavavau, e tatau la ona avea oe ma se tasi e te fiafia e tafafao faatasi.” Sa ou mulimuli i lena fautuaga ma taumafai ia avea ma se vaega e sili ona lelei o a’u lava ia. Ua ou lagona nei le mautinoa aua ua ou iloa le mea ou te fiafia i ai, le mea ou te lelei ai, ma le mea ou te tu atu ai. Ou te lagona le fiafia pe a ou taumafai e avea ma tagata ua finagalo le Tama Faalelagi ou te avea ai.”

Sarah Nielson, Iuta, ISA

Manatua Pe O Ai Oe

“Ou te mafaufau i le pese a le Peraimeri “O A’u o se Atalii o le Atua.” Ua faamanatu mai ai ia te a’u ua tuuina mai ia te a’u ni meaalofa ma ni taleni e fesoasoani ai i le lalolagi ia saunia mo le Afio Mai Faalua o le Alii. O le vaega a tagata uma o loo i ai e tulagaese ma e taua, ma o i tatou uma lava o vavega i olaga o le tasi ma le isi, ua avea moni lava Oe o se vavega i lenei olaga i tagata uma o siomia ai oe. Afai lava e galo ia te oe, mafaufau i mea uma na faia e Iesu i le Lalolagi ma taumafai e mulimuli i Lana faataitaiga. Soo se taimi e te lagona ai le faanoanoa po o le le taua, vaavaai mo se tasi o loo lagona faapea, ma o le a e lagonaina le faagaeetia.”

Brigham M., Mekisiko

Faamaoniga Faalelagi

“Pe a ou faalogo i le Atua, e fesoasoani mai o Ia ia ou taofia le fesiligia o lo’u taua faaletagata lava ia. E le mafai e isi tagata ona malamalama atoatoa i lo’u taua, ae e silafia e le Atua, ma ou te faalagolago ia te Ia. Afai ou te faatagaina tagata o siomia a’u e filifili lo’u taua, pau le mea ou te faia o le mafaufau ia latou upu ma manatu leaga ai ia te a’u lava. Ae a ou lafoai a latou upu le lelei, ou te le toe manaomia ona fesiligia lo’u lava ia taua. Ua ou a’oa’oina ou te le toe manaomia la latou faamaoniga. E tofu i tatou ma se taua na mautofi ai o ni fanau a lo tatou Tama Faalelagi. E tatau ona tatou faamanatu ia i tatou lava, aemaise lava pe a leai se isi tagata e faia.”

Anna G., 23, Farani

Mautinoa i le Talalelei

“I luga o ala o faasalalauga faaleagafesootai, ou te vaaia ai ituaiga uma o tagata e foliga mai ua atoatoa, pe e sili atu foi le lelei nai lo a’u. O le ola i le talalelei e fesoasoani ia te a’u e atiina ae ai se uiga faaalia o le lotofaafetai i le tagata ua o’u i ai. Pe a ou ola i mataupu faavae o le Talalelei e pei o le faatuatua, salamo, ma le mafaufau loloto i tusitusiga paia, ou te lagona le tulaga ese. Ou te le lagonaina le manaomia o le faatusatusa o a’u lava i isi, ma le mulimuli, ua sili atu ona ou mautinoa.

Alexandra R., Mekisiko

Faamagalo Oe Lava.

“Tatou te le manatu i taimi uma tatou te agavaa mo le faamagaloga, aua ua tatou iloa mea sese na tatou faia. Ae o i tatou o tagata—tatou te faia ni mea sese ma o le a faaauau pea ona faia. E tatau ona tatou faamagalo ia i tatou lava, aua e manaomia e tagata uma se avanoa lona lua. E tatau ona tatou vaai ia i tatou lava e ala i mata o tagata e alolofa ia i tatou. O le a tatou vaaia se tagata tulaga ese ma le ofoofogia e manaomia ai le alofa le faatuaoia e tusa lava po o le a.

Valerie J., Mekisiko

O tali ua faamoemoe e mo le fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

O Le A Sou Manatu?

Ou te le mautinoa pe o le a ou saunia e auauna atu i se misiona i le 18 po o le 19. E faapefea ona ou filifili i se taimi sili ona lelei e alu ai?

Auina mai lau tali ma le ata ae lei oo i le aso 15 o Aokuso, 2021.

Alu i le ftsoy. ChurchofJesusChrist.org ma kiliki le “Auina Atu Lau Galuega.” Saini e alu i totonu i lau Faitotoa a le Ekalesia ona filifili lea o le “Mo le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ia i matou lau faila. Pe imeli mai ia i matou i le [e-mail].

E ono iloiloina tali mo le uumi po o le manino.