“7 Olo i le Pulumu i se Olaga e Fiafia Atu,” Mo le Malosi o le Autalavou, Iulai 2021, 8 – 11.
7 Olo i le Pulumu i se Olaga e Fiafia Atu
O laasaga faigofie e te faia i aso taitasi e faaopoopo atu i se olaga fiafia.
Ata na tusia e Katy Dockrill
“Vaai! Sa ou faia lenei mea mo oe! “o le tala lea a lo’u atalii a o ia uuina lana ata i luma o o’u foliga. Sa pa’i mai le pepa i lo’u isu ma sa na o se nenefu o lanu. Sa le mafai ona iloa manino se mea.
A’o ou toe vaai lelei i le ata vali, na tau manino mai le pisipisia nenefu o lanu.
“O le a sou manatu?” o lana fesili lea.
Sa galue lou atalii i le tele o itula e vali le mea sa ia manatu o se faatusa moni lea o i ma’ua e toalua—vagana ai o lo’u lauulu e le lanu samasama.
“Sa le’i lava sa’u enaena,” o lana faapupula mai lea. “Ma o le samasama o se lanu e sili atu le fiafia.”
A o o’u vaai toto’a i lana galuega faatino, sa ou iloa ai le ala na valiina ai ma le alofa e lo’u atalii le ata lenei. Sa le mafai ona ou faitauina le aofaiga o olo i le pulumu. Sa tele naua. Ma e sa’o o ia, sa ou foliga fiafia—e aofia ai le lauulu samasama.
Mafaufau i se atavali na e vaai i ai. O le a e vaaia e leai se tosi e tasi e matagofie ai. O le mea moni, a e vaai i se tosi se tasi na o ia, e leai lava sona uiga. Ae peitai, a e tuufaatasia uma, e te maua se ata ofoofogia.1
O le mauaina o le fiafia i le olaga e tali tutusa lava ma le valiina o se ata. E i ai nai olo laiti, fuafuaina i le pulumu, po o gaoioiga i aso taitasi, e mafai ona tatou faia e fatu ai se olaga e tumu i le fiafia. E faia e i tatou lava pe na o le faatasi ona faia, o nei mea e le foliga mai e matuai maoa’e lava. Ae a tatou tuufaatasia i taimi uma i taumafaiga i aso taitasi ma vaiaso taitasi, e mafai ona latou fatuina se olaga matuai fiafia lava.
O ni olo nei i le pulumu se fitu po o ni gaoioiga e mafai ona e atia’e e fatu ai le fiafia sili atu i lou olaga.
Olo i le Pulumu 1: Siosiomia oe e tagata Musuia.
O le fiafia e tele lava ina maua i tagata e te fegalegaleai ai. O le faapea e le mafai ona e faauo i tagata e le fiafia i nisi taimi. O le mea moni, tatou te lagonaina uma lava le le fiafia mai lea taimi i lea taimi.
Ae ia mautinoa e te faaaluina le taimi ma tagata o e faagaeetia ma musuia oe. O uo lelei o e fesoasoani ia te oe ia ola i tulaga faatonuina a le Alii, e mafai ona faia se eseesega tele i lou fiafia. Ma taumafai ia avea ma se uo faagaeetia i isi. E mafai foi ona e faia se eseesega tele i olaga o isi.
Olo i le Pulumu 2: Faaaoga musika e faateleina ai lou fiafia.
O le musika e i ai sona aafiaga malosi i lou mafaufau. E mafai ona suia moni ai le tulaga o lou faiai. E mafai e musika lelei ona fesoasoani ia te oe e maua lagona lelei, fiafia, ma le musuia. Fatu se lisi o pese fiafia, faamalosiau, ma faatupu-faatuatua e te faalogo soo i ai.
Olo i le Pulumu 3: Alu i fafo.
O le olioli i foafoaga a le Atua o le faamalologa tele lea i o tatou agaga ma tino. E taua tele i lou fiafia le faaalu o se taimi e aluese ai mai lau televise, komepiuta, ma telefoni ae alu i fafo ma fiafia i le la susulu, laau, ma manu o siomia ai oe. Alu ma savalivali ma lou aiga ma uo, taaalo i fafo i ni taaloga, faitau ma suesue i fafo. O le a e ofo i le lelei o ou lagona pe a e faia.
Olo i le Pulumu 4: Ia lava le moe.
Na fetalai mai le Alii o le moe e taua i le ola maloloina o lou mafaufau ma le tino (tagai Mataupu Faavae ma Feagaiga 88:124). E pei o se maa telefoni e manaomia ona fafagaina, e manaomia e lou faiai ona moe lelei ina ia galue faalelei. E pei lava ona e faatulagaina se taimi e ala ae ai i le taeao, ia mautinoa ua e setiina foi se taimi e te moe ai (ma aua e te alu ma ave lau telefoni!).
Olo i le Pulumu 5: Faia ni talanoaga loloto ma tagata.
O le faaaogaina o feau tusitusia ma ala o faasalalauga e talanoa ai ma au uo ma aiga e mafai ona matagofie. Ae o le faia o ni talanoaga ma se tagata e faia ai se mea mo lou mafaufau ma le agaga e le mafai ona faia e fesootaiga faaeletonika. Ia mautinoa tou te fegalegaleai ma lou aiga ma uo. Faaalu se taimi e faalogo ai ma talanoa ma i latou o siomia ai oe.
Olo i le Pulumu 6: Faamalositino e le aunoa ma taumafai ia taumafa maloloina.
E na o le pau le ala e mafai ona galue ai lou faiai i le suauu e te tuuina atu. O meaai e maualuga le gaosiga ma e tele foi le suka (o nisi taimi e iloa ai o ni meaai le maloloina) e ono tofo lelei ae e tele lava ina maua ai le lagona o le vaivai o lou mafaufau ma lou tino. O le tala fiafia o le, a o outou aai i le tele o fualaau aina, fualaau faisua, fatu o laau, o le a faaitiitia a outou manaoga mo meaai le maloloina. Ua na o le tasi lava le tino na tuuina mai e le Alii ia i tatou, o lea ia tatou tausia lelei ai!
Olo i le Pulumu 7: Tatalo ma Mafaufau Loloto.
Ua faafia ona fautuaina i tatou e le Alii ma Ana perofeta ma aposetolo ina ia faaalu le taimi e tatalo ai ma ia filemu. O le tatalo ma le manatunatu loloto e aafia lelei ai vaega o le faiai lea e te maua ai le fiafia. Afai e te faaaluina soo se taimi e mafaufau loloto ai ma tatalo, o le a faateleina teisi lou fiafia i taimi uma. A mavae se taimi umi, o le a e matauina ai se eseesega tele i le filemu ma le mautinoa e te lagonaina.
O Sailia Nisi Manatu?
O nei olo e fitu i le pulumu ua na o ni nai laasaga i aso taitasi e mafai ona tatou uia uma e faatumu ai o tatou tino ma agaga i le fiafia. Mo nisi manatu, vaai i le tamaitusi Mo le Malosi o le Autalavou e iloa ai mataupu faavae na e maua ai le fiafia po o isi foi i le taimi ua tuanai. O le a se mea e te lagona ua uunaia ai oe e faaaoga atili ai na mea i lou olaga i aso taitasi?
Ia manatua i taimi uma o le puna maualuga o le fiafia o lo tatou Faaola, o Iesu Keriso. Po o a lava ou tulaga, e tu saunia o Ia e faamanuia oe ma fesoasoani ia te oe i ou faigata. O le a fesoasoani o Ia ina ia e maua le fiafia o loo e faamoemoe i ai.