“Pe sa O’u Agavaa?” Mo le Malosi o le Autalavou, Iulai. 2021, 22–23.

Pe sa O’u Agavaa?

Taofia le igoa

Sa o’u aafia lava i se sauaga i le umi lava ou te manatua ai. Pe na aafia ai le auala na silasila ai le Alii ia te a’u?

I le pito i luga, o lo’u olaga tamaitiiti sa o se tulaga masani lava.

Sa matou o i le lotu ma auai i sauniga ma gaoioiga uma o le Ekalesia. Sa o’u alu i le a’oga ma taaalo ma a’u uo. A o o’u talavou, sa ou faia mea uma na faia e talavou masani. Sa matou tafafao ma a’u uo ma sa i ai i le aufaipese ma le kalapu o tala faatino. Sa ou alu i le siva a le a’oga. Ae sa i ai se mealilo pogisa tele i lalo ifo o lena tulaga fiafia, o fafo masani.

Mai le taimi pe a ma le lua tausaga o lo’u matua, sa avea a’u ma se tagata na aafia i le sauaina o feusuaiga e o’u tuagane matutua e toalua. Sa la sauaina foi o’u uso. Sa matou laiti tele e malamalama ai i le mea na tupu, ae ina ua faasolo ina ou matua, sa amata ona ou malamalama teisi i ai. Sa ou lagona le pogisa ma le palapalā i soo se taimi ou te i ai faatasi ma o’u tuagane.

Na Faatupulaia Lo’u le Mautonu

Ina ua uma ona auai i se vasega a tamaitai talavou lea sa latou a’oa’o atu ai e uiga i le ola mama, sa ou malamalama i le uiga o le mama ma le ola mama. Sa ou faalogo i o’u taitai na augani mai ia te a’u ma isi i la’u vasega ina ia tumau le ola mama.

Sa ou mafaufau, “E mafai faapefea ona ou ola mama?” I le mamao e mafai ona oo i ai o’u manatuaga, sa ou aafia ai lava i sauaga faalefeusuaiga. Sa le mafai ona taofiofi lo’u mafaufau po o le a le finagalo o le Alii ia te a’u. Pe sa avea ea a’u ma se tamaitai talavou amio mama? Pe sa ou agavaa e tafao faamasani i alii talavou amiotonu o la’u uarota ma le a’oga? Pe na avea le sauaga na ou mafatia ai ua ou le agavaa ai mo se faaipoipoga i le malumalu?

Sa ou mafaufau tele i ai. Sa le’i fetaui ia te a’u le manatu faapea o a’u e le mama a’o le mea na tupu ia te a’u e le o sa’u filifiliga. Aisea e le tatau ai ona mafai ona ou lagona le mama? Pe sa ou le agavaa i le alofa o le Alii? Pe na ou manaomia le salamo?

Sa Na o Lo’u Taumafai Lava e Faagalo

Ou te le’i iloa ma le faamaoni. Sa ou lagona le le tuuaia o a’u, ae i le taimi lava lea, sa ou lagona ai le palapalā ma le maualalo ma le matua faalumaina atoa. Sa le mafai ona ou maua le lototele e ta’u ai i o’u matua po o se isi lava tagata. Sa ou taumafai mo ni nai taimi, ae sa ou maasiasi tele ma sa ou le iloa pe faapefea ona fai atu ia upu. Sa na o lo’u taumafai lava e faagalo faapea sa tupu.

Ina ua 15 o’u tausaga, sa maua e o’u uso laiti le lototele sa le i ai ia te a’u. Sa la talanoa i se faufautua i le a’oga. I se taimi puupuu mulimuli ane, na pue faapagotaina ai se tasi o o’u tuagane ma faasalaina i le tolu tausaga i le falepuipui. Ae peitai, mo ni tausaga mulimuli ane, sa ou mafatia ai ma lena popolega e tasi sa ou le mama pe agavaa.

Sa Ou Maua le Lototele e Maua ai le Fesoasoani

Na i’u lava, ina ou maua le lototele ma ou alu ai e vaai lo’u epikopo i se tasi aso. Sa ia faamalamalama mai e faapea e le o taofia a’u e le Alii e tali atu mo amioga feusuai ia na faamalosia mai ia te a’u o se tamaitiiti ma se tamaitai talavou. Sa ia faamautinoa mai ia te a’u e le o se mea sese lea ia te a’u. Sa ou tu ma le le pona i luma o le Alii. Sa ou mama pea!

Faatasi ai ma nisi o fautuaga mai polofesa ma le fesoasoani mai o lo’u epikopo, ua mafai ai ona ou tuua le sauaina—ma le tiga ma le mafatia na tupu ai—i o’u tua. O le taimi nei ua ou maua se olaga fiafia ma le lelei. Sa ou faaipoipo i le malumalu i se alii amiotonu, ma o loo ma tausia ma le fiafia lo ma aiga.

Ae peitai, o nisi taimi o le a faalavelaveina i o’u mafaufauga ia le taimi ua tuanai, ma e mafai ona ou manatua le lagona ita na ou lagonaina a o ou mafaufau loloto i lo’u agavaa.

Ou te le iloa pe to’afia isi o le autalavou o i ai iina i se tulaga e pei o lea sa o’u i ai, i le lagonaina o le maasiasi ma le faalumaina, ma mafaufau i lo latou mama ma po o fea latou te ofi ai i le fuafuaga a le Atua.

Mo nei tagata talavou ou te fia fai atu i ai, e alofa le Alii ia te outou.

E mafatia Lona finagalo mo oe.

Ua Ia silafia e le tuuaia oe.

Na te silafia e te mama moni lava.

O le a fesoasoani o Ia ina ia e maua le lototele ma le malosi e ola ai i lou olaga ma le fiafia.