“Fai le Tusitusiga,” Mo le Malosi o le Autalavou, Iulai. 2021, 18–19.
Fai le Tusitusiga
O le tusia o ou mafaufauga a o e suesue i tusitusiga paia e mafai ona fesoasoani moni lava e te a’oa’o ai.
“O taimi uma lava ou te amata faitauina ai tusitusiga paia, ou te moe ai!” sa ta’u atu e se tasi o faifeautalai i lana peresitene o le misiona. “E pei o tusitusiga paia o se fualaau e moe ai!”
Sa tali atu lana peresitene, “Pe e te tusia ea ni faamatalaga pe a e faitau?”
“Leai,” o le tala lea a le faifeautalai.
“E faigofie lava ona e moe pe faataga foi lou mafaufau e tosina ese pe afai e na o lou faitau,” na fai mai ai le peresitene, “ae e le mafai pe a e faaopoopo i ai le tusitusi!”
O le fautuaga a lenei peresitene o le misiona na tuuina atu i lana faifeautalai sa tauivi na faia se eseesega tele. Afai la o e sailia se auala fou e faamalosia ai au suesuega o tusitusiga paia, faataitai loa. A o e tusitusi e uiga i mea o loo e faitauina, o le a e iloa ai le auai atili ma le a’oa’oina e sili atu, foi.
O nisi nei o auala na matou maua e matuai aoga lava.
Brother Steven Lund:
Ou te teuina se pepa e aoga pe a ou faitau. A o uunaia a’u e le Agaga i le taimi o a’u suesuega, ou te tusia na musumusuga.
Sa ou maua le manatu mai ia Elder Richard G. Scott (1928 – 2015) o le Korama a Aposetolo e Toasefululua, o le na saunoa mai: “Tusi i lalo i se mea e malupuipuia, ia mea taua e te a’oa’oina mai le Agaga. O le a e iloa ai a’o e tusia musumusuga taua, e masani ona tele isi musumusuga e oo mai. Ma le isi foi, o le malamalama na e mauaina o le a tumau pea i lou olaga atoa” (“,” (“Ina Ia Maua le Malamalama ma le Malosi ia Faaaogaina Ai ma le Poto,” Ensign, Iun 2002, 32).
Ou te iloa e moni na upu. A o o’u saunia lauga ma lesona, e le gata ina ou alu i tusitusiga paia, ae faapea foi i mea na ou tusia i lalo a’o faitauina na mau.
Brother Ahmad Corbitt
Ou te fiafia e suesue i autu. Ou te faitau i tusitusiga paia mai le amataga e oo i le faaiuga, ae ou te fiafia foi e oso solo ma suesue i autu. Mo se faataitaiga, o le a ou faaaogaina le Taiala i Autu e sue ai mau e uiga i le faatuatua po o le faapotopotoina o Isaraelu. Ona ou le na ona tusia lea o ni faamatalaga, ae ou te tusia i lalo mea ua ou a’oa’oina ina ia mautinoa ai ua ou malamalama i ai. Ou te maofa lava i taimi uma i le tele o lo’u malamalama i mea e sili atu pe a ou faia lenei mea. Ou te filifili foi ni mau e tauloto.
Brother Bradley Wilcox
Ou te tausia se api talaaga mo suesuega lea ou te tusia ai tusitusiga paia i a’u lava upu. Mo se faataitaiga, “Aua o le tagata natura o se fili i le Atua” (Mosaea 3:19) e avea ma “Aua ua filifili le tagata faamaualuga ma le le salamo e avea ma fili i le Atua, ae o le Atua e le o sona fili. O le Atua o lana uo sili lea.”
Ou te tusia foi ni fesili. E mafai ona avea ma ni fesili ou te mafaufau i ai ae ou te le’i faitauina, pe e mafai foi ona avea ma ni fesili e pei ona tulaga ese mai i mea na ou faitauina. Soo se itu lava, e mafai ai ona ou taulai atu.
O le Mana o le Tusiaina o o’u Mafaufauga
O i matou taitoatasi o le au peresitene e eseese auala e suesue ai tusitusiga paia, ae matou te tusitusi uma lava a’o matou faia!
O le faitau e fesoasoani ia i tatou e teuloto ai mafaufauga ma lagona. O le mea lena e taua. Ma pe a tatou tautatala pe tusitusi, tatou te iloaina ma faailoa atu mafaufauga ma lagona mai totonu i fafo. Matou te lagona e fesoasoani ia i tatou e faapatino atili ai upumoni o le talalelei.
Sa iloa e se tasi alii talavou lenei mea moni mo ia lava ina ua talosagaina o ia e tuuina atu se lauga i le sauniga faamanatuga. Sa faalogo o ia i le toatele o isi tagata o tuuina atu lauga ae sa le mafai ona manatuaina ia faamatalaga. Ae o le taimi lenei sa ese. Ina ua ia tusia se otootoga mo lana lava lauga, sa le gata ina sa fesoasoani ia te ia i le tuuina atu o se lauga faatulagaina, ae sa ia manatuaina mo se taimi umi lava.
E mafai foi ona tupu lea lava mea e tasi i au suesuega o tusitusiga paia. Afai o le a e moe pe a tatala au tusitusiga paia, ua oo i le taimi e ala ai. Taumafai e toso i luga se penitala, peni, telefoni, po o se komepiuta ma tusitusi. O le a e maofa i le tele o le eseesega e mafai ona faia!