« Nō te aha e ti’a ai ia ’oe ’ia ’oa’oa maita’i na », Nō te Pūai o te Feiā ’Āpī, Tiurai 2021, 6.
Mai, pe’e mai
Nō te aha e ti’a ai ia ’oe ’ia ’oa’oa maita’i na
Fa’aitoito ! ’Ua hōro’a mai te Fatu i te mau tumu ia ’oe.
’Ua hōro’a mai te Fatu ia tātou e rave rahi anira’a. ’E e fa’ahiti pinepine fa’ahou ’oia i te mea faufa’a a’e. (’Ei hi’ora’a, e rave rahi taime tōna paraura’a i te hō’ē parau mai teie « Haere mai ’outou iā’u nei » ?)
Hō’ē anira’a tā ’outou e ’ite tei fa’ahiti-noa-hia i roto i te mau pāpa’ira’a mo’a, ’oia ho’i : « ’A ’oa’oa maita’i na »
I te tahi taime e parau te Fatu i teie ’ia tāmata ana’e tōna mau ta’ata i te pe’e iāna ma te fa’aruru rā i te pāto’ira’a ’e te mau tāmatara’a. ’E ’ia ani ana’e mai ’oia ia tātou ’ia ’oa’oa maita’i na, e hōro’a mai iho ā ’oia i te mau tumu e tāna fa’aitoitora’a ia tātou ’ia ’oa’oa. ’Ei hi’ora’a, i te hō’ē taime ’ua parau ’oia :
« ’A ’oa’oa maita’i na, nō te mea e arata’i atu na vau ia ’outou. Nō ’outou te bāsileia ’e te mau ha’amaita’ra’a nō te reira nō ’outou ïa, ’e nō ’outou na te mau faufa’a mure ’ore ra ».(Te Parau Ha’api’ira’a ’e te mau Parau Fafau 78:18
E fa’ahu’ahu’a ana’e i te reira :
« A ’oa’oa maita’i nā, nō te [Tumu 1] e arata’i atu vau ia ’outou. [Tumu 2] Nō ’outou te bāsileia ’e [Tumu 2a] te mau ha’amaita’ira’a nō te reira nō ’outou ïa, ’e [Tumu 3] nō ’outou na te mau faufa’a mure ’ore ra » (Te Parau Ha’api’ira’a ’e te mau Parau Fafau 78:18).
I’ō nei te fa’aha’amana’o mai nei te Fatu ia tātou i tāna arata’ira’a ’e tāna mau ha’amaita’ira’a. Terā ïa te tahi o te mau tumu maita’i roa nō te ’oa’oa.
Teie te tahi atu hi’ora’a :
« ’A ’oa’oa na e te mau tamari’i ri’i; nō te mea [Tumu 1] tei rotopū vau ia ’outou na, ’e [Tumu 2] ’aita vau i fa’aru’e atu ia ’outou » (Te Parau Ha’api’ira’a ’e te mau Parau Fafau 61:36).
’E tē tahi atu :
« ’Ia ’oa’oa, ’e ’eiaha e mata’u, nō te mea [Tumu 1] tei pīha’i iho ïa vau, ’o te Fatu, ia ’outou na, ’e [Tumu 2] e ti’a noa ho’i [au] i pīha’i iho ia ’outou na »(Te Parau Ha’api’ira’a ’e te mau Parau Fafau 68:6).
Tē fa’aha’amana’o mai nei te Fatu ia tātou ē, tei pīha’i iho ’oia ia tātou ’e e tauturu ’oia ia tātou ’a fa’aitoito ai tātou i te pe’e iāna ’e i te rave i tāna ’ohipa. I reira ho’i e ti’a ai ia tātou ’ia haere ma te ti’aturi ’e, ’oia ïa, ma te ’oa’oa. Inaha ho’i, te fa’anahora’a a te Metua i te ao ra ’o tē « fa’anahora’a ïa nō te ’oa’oa » (Alama 42:8, 16), ’e te pe’era’a i te mau fa’auera’a a te Fatu ’o tē orara’a ïa « ma te ’oa’oa » (2 Nephi 5:27).
Noa atu ē, e ha’amata tō tātou mau tāmatara’a i te tā’iri ia tātou, mai te mea e hina’aro tātou e pe’e i te Fatu, tē fa’aitoito mai nei ’oia ia tātou ’ia ’oa’oa maita’i na. ’E tē hōro’a mai nei ’oia ia tātou i te tahi mau tumu maita’i nō te reira.