’Ua ti’amā ānei au ?

’Ua tāpe’a-’ōmo’e-hia te i’oa

’Ua riro na vau ’ei ta’ata tei hāmani-’ino-hia nō te roara’a e nehenehe iā’u ’ia ha’amana’o. E fifi ānei te reira i roto i tā te Atua huru hi’ora’a iā’u ?

e tamāhine mai te huru ra ē, tē ’oto ra.

Fa’ahōho’ara’a nā Trent Gudmundsen

’Ia hi’ohia mai, mea maita’i roa tō’u tamari’i-ri’i-ra’a.

’Ua haere mātou i te fare purera’a ’e i te mau purera’a ’e te mau fa’a’oa’oara’a ato’a a te ’Ēkālesia. ’Ua haere au i te ha’api’ira’a ’e ’ua ha’uti ’e tō’u mau hoa. ’Ei taure’are’a, ’ua rave au i te mau mea ato’a tā te hō’ē taure’are’a e rave. ’Ua ori haere au ’e tō’u mau hoa, ’e ’ua ti’a vau i roto i te pupu hīmene ’e te pupu ha’utira’a teata ta’ata ora. ’Ua haere au i te mau ’orira’a. Terā rā, tē vai ra te hō’ē parau huna i raro a’e i taua rāpae’au ’oa’oa ra ’e te mātarohia.

I te taime ’a fātata ai au i te piti matahiti, ’ua tupu te hō’ē hāmani-’ino-ra’a pae ’āpeni i ni’a iho iā’u, nā tō’u nā taea’e pa’ari e piti. ’Ua hāmani ’ino ato’a rāua i tō’u mau tuahine. E mea ’āpī roa ā mātou nō te ta’a e aha te ’ohipa e tupu nei, terā rā ’a pa’ari noa ai au, ’ua ha’amata vau i te māramarama ri’i. E feruri au e mea pōiri ’e te repo vau i te mau taime ato’a e ti’a vau i mua i tō’u nā taea’e.

’Ua haere noa i te rahi tō’u ’āehuehu.

I muri a’e i te haerera’a i roto i te hō’ē piha nā te feiā ’āpī tamāhine, i reira rātou i te ha’api’ira’a nō ni’a i te parau nō te huru mōrare, ’ua māramarama a’era vau i te aura’a o te peu mā ’e te vi’ivi’i ’ore. ’Ua fa’aro’o vau i tō’u mau feiā fa’atere i te tāparura’a iā’u ’e ia vetahi ’ē i roto i te piha ha’api’ira’a ’ia vai mā noa i te pae mōrare.

’Ua uiui noa vau ē, « nāhea e ti’a ai iā’u ’ia vai mā noa i te pae mōrare ? » ’Ia au i te āteara’a tā’u e nehenehe e ha’amana’o, ’ua hāmani-’ino-hia vau i te pae ’āpeni. ’Ua uiui noa vau iā’u iho ē, e aha pa’i tō te Fatu mana’o nō’u. E tamāhine vi’ivi’i ’ore ānei au ? ’Ua ti’amā ānei au nō te haere nā muri iho i te mau tamāroa parauti’a i roto i tā’u pāroita ’e i te fare ha’api’ira’a ? ’Ua riro ānei taua hāmani-’ino-ra’a ra tā’u i fārerei, ’ei fa’ati’amā-’ore-ra’a iā’u i te hō’ē fa’aipoipora’a hiero ?

’Ua feruri maoro vau nō ni’a i te reira. Nō’u nei, ’aita hō’ē aura’a ’ia fa’arirohia vau ’ei mea vi’ivi’i nō te hō’ē ’ohipa tei tupu i ni’a iā’u, e ’ere nā’u i mā’iti. Nō te aha ’aita e ti’a iā’u ’ia feruri e mea vi’ivi’i ’ore au ? ’Ua ti’amā ’ore ānei au i te here o te Fatu ? E tītauhia ānei iā’u ’ia tātarahapa ?

’Ua tāmata noa vau i te ha’amo’e

Te parau ti’a; ’aita roa atu vau i ’ite. ’Ua feruri au ē, e’ita vau e fa’ahapahia, terā rā ’ua feruri ato’a vau ē, e mea repo vau ’e te faufa’a ’ore ’e te ha’amā tā’āto’a. ’Aita tō’u e itoito nō te parau i tō’u nā metua ’aore rā, i te tahi atu ta’ata. ’Ua tāmata vau e rave rahi taime, terā rā ’ua ha’amā roa vau ’e ’aita vau i ’ite nāhea ’ia parau i te mau parau. ’Ua tāmata noa vau i te ha’amo’e ē, ’ua tupu te reira.

I te 15ra’a o tō’u matahiti, ’ua roa’a i tō’u mau teina tuahine i te itoito tei ’erehia e au. ’Ua paraparau rātou i te hō’ē ta’ata fa’aa’o i te fare ha’api’ira’a. Ma’a taime iti i muri a’e, ’ua tāpe’ahia tō’u nā taea’e ’e ’ua fa’autu’ahia e toru matahiti fare auri. Terā rā, e rave rahi matahiti i muri a’e, tē māuiui noa ra vau i taua mau mata’u ra, e ’ere au i te mea vi’ivi’i ’ore ’aore rā, i te mea ti’amā.

’Ua ’itehia iā’u te itoito nō te fāri’i i te tauturu

I te pae hope’a, i te hō’ē mahana ’ua noa’a iā’u te itoito nō te haere e hi’o i tō’u ’episekōpo. ’Ua fa’ata’a mai ’oia ē, ’aita roa atu te Fatu e fa’autu’a iā’u nō te mau peu ’āpeni tei fa’ahepohia i ni’a iā’u ’ei tamari’i ’e ’ei feiā ’āpī tamāhine. ’Ua ha’apāpū mai ’oia iā’u ē, e ’ere roa atu i te hape nō’u. ’Ua ti’a vau ma te hapa ’ore i mua i te Fatu. E mea vi’ivi’i ’ore noa ā vau !

Nā roto i te tahi mau a’ora’a mai roto mai i te mau ti’a mana ’e te tauturu mai roto mai i tō’u ’episekōpo, ’ua ti’a iā’u ’ia fa’aru’e i te hāmani-’ino-ra’a—’e te oto ’e te māuiui ’o tā te reira i fa’atupu—i muri iā’u. I teienei, e orara’a ’oa’oa mau ’e te mātarohia tō’u. ’Ua fa’aipoipohia vau i roto i te hiero i te hō’ē tāne parauti’a, ’e tē ha’apa’o nei māua i tō māua ’utuāfare ma te ’oa’oa.

Terā rā, i te tahi taime, e ho’i mai te tau tahito i roto i tō’u ferurira’a, ’e e nehenehe tā’u e ha’amana’o i te ahoaho tā’u i fāri’i ’a feruri ai au i tō’u ti’amāra’a.

Tē uiui nei au ē, e hia rahira’a feiā ’āpī ’ē atu i roto i te hō’ē ā huru mai tō’u, te ha’amā ’e te fa’aha’eha’ahia, ma te uiui te mana’o nō ni’a i tō rātou vi’ivi’i ’ore ’e e aha tō rātou pārahira’a i roto i te fa’anahora’a a te Atua.

I teie feiā ’āpī ē, tē hina’aro nei au e parau ē, tē here nei te Fatu ia ’outou.

Tē māuiui nei tōna māfatu nō ’outou.

’Ua ’ite ’oia ē, e’ita e ti’a ’ia fa’ahapa ia ’outou.

’Ua ’ite ’oia ē, e mea vi’ivi’i ’ore mau ’outou.

E tauturu ’oia ia ’outou ’ia ’ite mai te itoito ’e te pūai ’ia ora i tō ’outou orara’a ma te ’oa’oa.

Te mau rāve’a tauturu nō te ’imira’a i te tauturu ’e te tīa’ira’a

Mai te mea ’ua hāmani-’ino-hia ’outou, ’a ’imi i te tauturu ’e te tīa’ira’a nā roto :

• I te haerera’a i roto i te mau rāve’a tauturu i ni’a i te natirara ChurchofJesusChrist.org/Get-Help/Abuse ’e te « Abuse » i te topics.ChurchofJesusChrist.org.

• I te paraparaura’a i tō ’outou ’episekōpo ’aore rā, i te hō’ē ti’a fa’atere tā ’outou e ti’aturi.

• I te paraparaura’a i te hō’ē ta’ata ’o tē tauturu ia ’outou. E mea pinepine te feiā hāmani ’ino i te fa’ari’ari’a i te mau ta’ata tā rātou i hāmani ’ino, ’eiaha e fa’a’ite ia vetahi ’ē nō ni’a i te hāmani-’ino-ra’a. ’Eiaha e fa’aro’o i tā rātou mau ha’avare.

• Te ’itera’a ē, e ’ere nō ’outou te hape ’e tē here nei te Fatu ia ’outou.

E ’ere te hōpoi’a nā ’outou i tā rātou mau ’ohipa

« Tē fa’a’ite pāpū nei au ē, mai te mea e ha’apēpē ’ino roa te mau ’ohipa ’ino, te ’ohipa vi’ivi’i, ’aore rā, te tā’atira’a fēti’i a vetahi ’ē ia ’outou, ma te hinaaro-’ore-hia e ’outou, e ’ere te hōpoi’a nā ’outou, ’e ’eiaha ’outou e fa’ahapa ia ’outou iho ».

Elder Richard G. Scott (1928–2015) nō te Tino ’Ahuru Ma Piti ’āpōsetolo, Apr. 1992 general conference (Ensign, Mē 1992, 32).