« Te mau pure nō te tīti’amata ’au », Nō te Pūai o te Feiā ’Āpī, Tiurai 2021, 27.
Te mau niu ’āueue ’ore
Te mau pure nō te tīti’amata ’au
Fa’ahōho’ara’a nā Toby Newsome
I te hō’ē taime ’ua haere au ’e tō’u pāpā i Sigatoka, Fiti—e vāhi au maita’i nō te haere e ’au i roto i te moana. ’Ua ta’a tō’u nā metua, nō reira ’aita tō’u māmā i haere mai nā muri iho ia māua. Hou māua ’a fa’aru’e ai, ’ua ho’o mai tō’u māmā i te tīti’amata vare’au nō’u. E tīti’amata noa ho’i, terā rā ’ua hina’aro ’oia ’ia aupuru vau i te reira ’e ’ia fa’aho’i au i te reira.
I te hope’a o te piti o te mahana i Sigatoka, ’ua ’ite a’era vau ē, ’aita tō’u tīti’amata. Pe’ape’a vau i te mea ē ’ua mo’e te reira i roto i te moana. Te mea mātāmua tā’u i rave, ’ua pure au ’ia ’itehia mai tō’u tīti’amata. ’Ua fāri’i au i te hau ’e ’ua ’ite ē e maita’i te mau mea ato’a.
Te ta’ata ana’e tā’u i parau ’o tō’u ïa taea’e. ’Aita ’oia e ti’aturi nei i te Atua ’e e mea pinepine ’oia i te fa’ahapa i tō’u mau ti’aturira’a nō te mea ’o vau ana’e te melo o Te ’Ēkālesia a Iesu Mesia i te Feiā Mo’a i te mau Mahana Hope’a nei i roto i tō’u ’utuāfare. Nā ’ō maira ’oia ē : « E’ita e ’ite-fa’ahou-hia mai ». ’Ua parau atu vau iāna ē : « ’Ua pure au nō te reira, ’e ’ua ite au ē e pāhonohia mai tā’u mau pure ».
I te mahana nō muri iho ’ua hi’o vau i roto i te pape ’a ’au noa ai mātou. I te taime ho’ira’a, ’aita ā vau i ’ite atu ra i tō’u tīti’amata. ’Ua fāri’i tō’u mana’o ē e’ita paha vau e ’ite fa’ahou mai i te reira ’e ’ua ha’amāuruuru vau i te Metua i te Ao ra nō tōna tāmāhanahanara’a ’e te hau.
I reira iho ā ’ua pi’i tō’u taea’e. Tē tāpe’a ra ’oia i te tīti’amata vare’au !
’Aita ā tō’u taea’e i ti’aturi i te ’evanelia, terā rā tē māuruuru nei au nō te tāmāhanahanara’a, te pūai, ’e te ha’apāpūra’a ’o tei tae mai ’a tu’u ai au i tō’u fa’aro’o i roto i te Metua i te Ao ra ’e ia Iesu Mesia.
Shreya S., Suva, Fiji