E tāpae ’outou !

Nā Eric B. Murdock

Te mau ve’a a te ’Ēkālesia

Tītauhia ia tātou ’ia ha’amana’o i te mau mea ato’a tā te Metua i te Ao ra ’e ’o Iesu Mesia i rave—’e te mea tā rāua e tāmau nei i te rave—nō te tauturu ia tātou ’ia fāri’i i te bāsileia tiretiera.

Te Parau Ha’api’ira’a ’e te mau Parau Fafau 76

« ’O vau ? I te bāsileia tiretiera ? ’Aita vau e mana’o ē e tāpae au i reira ».

’Ua tupu a’ena ānei te mana’o mai te reira te huru ? E tupu mai iho ā te mana’o ē ’ua nava’i ānei tō tātou maita’i, i te taime iho ā rā e au ē, e mea ātea roa tātou i te huru maita’i roa ra. I te tahi mau taime, mai te huru ra ē, ’aita te bāsileia tiretiera e nau’ahia !

’Eiaha rā e ha’aparuparu. Te ’ōpuara’a hō’ē roa o te fa’anahora’a a te Metua i te Ao ra ’o te tauturura’a ïa ia ’outou ’ia riro mai te Metua i te Ao ra ’e ia Iesu Mesia ’e ’ia ora ho’i i pīha’i iho ia rāua i roto i te bāsileia tiretiera. ’E tei te hō’ē ti’ara’a maita’i a’e tō ’outou i tō ’outou mana’ora’a. ’Ua fa’aha’amana’o mai te peresideni M. Russell Ballard, te peresideni mono nō te pupu nō te Tino ’Ahuru ma Piti ’āposetolo ia tātou ē, te ora-fa’ahou-ra’a i pīha’i iho ia rāua ra, « ’ua hau atu ïa i tā tātou iho ’ōpuara’a—’o tā rāua ato’a ho’i ’ōpuara’a ».¹

Hau atu i te mau mea ato’a, tē hina’aro nei te Metua i te Ao ra ’e Iesu Mesia ’ia ora tātou pā’āto’a i roto i te bāsileia tiretiera i pīha’i iho ia rāua ’e tō tātou ’utuāfare. Te parau ’āpī maita’i rā, ’aita e tītauhia ia tātou ’ia haere i reira nā roto ana’e i tō tātou iho pūai. ’Ia haere ana’e tātou i te Mesia ra ’e ’ia pe’e iāna, e fāri’i tātou i te pūai ’e te tauturu tei tītauhia nō tātou. Nā roto i tāna tāra’ehara, e ’ere atu ra te ’āi’ara’a i te bāsileia tiretiera i te mana’o noa, e ’ōpuara’a pāpū rā.

Nō reira, nā roto i tāna tauturu, e nehenehe ’outou e rave i te reira ! E tāpae ’outou !

Te fa’anahora’a a te Atua, nō te mau ta’ata ato’a ïa

Nō te tomo i roto i te bāsileia tiretiera, tītauhia ia tātou ’ia noa’a te fa’aro’o ia Iesu Mesia ’e ’ia ’imi i te fa’arahi i taua fa’aro’o ra. Tītauhia ia tātou ’ia tūtava i te taui ’e i te tātarahapa i te mau mahana ato’a. Tītauhia ia tātou ’ia bāpetizohia ’e ’ia fāri’i i te hōro’a o te Vārua Maita’i—’e ’ia ha’amana’o tāmau noa ia Iesu Mesia ’e ’ia fa’a’āpī i tā tātou mau fafaura’a. E mea ti’a ia tātou ’ia fa’aoroma’i ’ē tae noa atu i te hope’a. Mai te mea ē, teie te mau mea tā ’outou e hina’aro ’e e tūtava nei, tei ni’a ïa ’outou i te ’ē’a nō te rirora’a ’ei ta’ata ’āi’a nō te bāsileia tiretiera.

Ta’a ’ē noa atu i te reira, ’ua ha’api’i mai te peresideni Dallin H. Oaks, tauturu mātāmua i roto i te Peresidenira’a Mātāmua ē, te feiā ti’amā nō te tūha’a teitei roa a’e o te bāsileia tiretiera, o te « feiā ïa tei fāri’i i te mau tītaura’a teitei roa a’e nō teie nei bāsileia, ’e tae noa atu te ha’apa’o-maita’i-ra’a i te mau fafaura’a tei ravehia i roto i te hiero o te Atua ’e te fa’aipoipora’a mure ’ore ».² (E nehenehe tā ’outou e ha’api’i rahi atu ā nō ni’a i te reira nā roto i te tai’ora’a i Te Parau Ha’api’ira’a ’e te mau Parau Fafau 76:50–70, 92–96).

Mai te mea ē tē uiui nei ’outou—’aore rā te pe’ape’a nei ho’i—nō ni’a i tā ’outou fa’aineinera’a nō te fāri’i i te bāsileia tiretiera, ’a ha’amana’o ē, e tere teie. Te mahana tāta’itahi tātou e mā’iti ai ’ia riro hau atu mai tō tātou Metua i te Ao ra ’e mai ia Iesu Mesia te huru, e mahana ïa ’ua ha’afātata atu ā tātou ’ia riro rahi atu ā ’ei ta’ata tiretiera—’e ’ua ha’afātata atu ā i te bāsileia tiretiera. ’Oia iho ā ïa te mau taime e he’e tātou, e hape tātou ’e e hara tātou pā’āto’a. ’O te ti’aturira’a i ni’a ia Iesu Mesia a tātarahapa ai i te mau mahana ato’a, te tāviri. ’Ua riro teie tere ’ei tere tīa’ira’a pāpū, nō te mau mea ato’a i ravehia e ana ’e tō tātou Metua i te Ao ra—’e te mea ho’i tā rāua e tāmau nei te rave—nō te tauturu ia tātou ’ia tae i reira.

Tei ia tātou nei te Fa’aora

Tē hōro’a mai nei te Fa’aora i te ’ē’a nō tātou nō te ho’i atu i tō tātou Metua i te Ao ra. ’Ua fa’a’ite mai Iosepha Semita i te feiā e ora ra i roto i te bāsileia tiretiera mai te ta’ata i « fāri’i i te parau fa’a’ite a Iesu » ’e « ’ua ti’a roa ïa i te mau mea ato’a nā roto ia Iesu ; ’o tei fa’atupu i teie nei tāra’ehara ti’a mau nā roto i te ha’amani’ira’a i tōna iho toto » (Te Parau Ha’api’ira’a ’e te mau Parau Fafau 76:51, 69).

E ’ere te rirora’a ’ei ta’ata maita’i roa i roto ia Iesu Mesia i te ’ore-roa-ra’a e hape. Te aura’a rā, tē tātarahapa nei tātou ’e te tāmata nei tātou ’ia maita’i atu ā i te mahana tāta’itahi, ma te ti’aturi i te Fa’aora ’e i te mana o tāna tāra’ehara nō te tauturu ia tātou ’ia taui. ’A nā reira ai tātou ’e maoti tōna maita’i e ti’a ai ia tātou ’ia haere i mua i te fāito teitei roa a’e o te bāsileia tiretiera, i reira ho’i tātou e ora ai i pīha’i iho iāna ’e te Metua i te Ao ra, ’e tō tātou ’utuāfare ē a muri noa atu. E fāri’i ato’a tātou i te mau mea ato’a a tō tātou Metua i te Ao ra. ’Aita hō’ē a’e o te reira mau mea ’āhani ’aita te Fa’aora.

Tē vai ra te ʼĒkālesia nō tātou.

’Ua ha’api’i mai te peresideni Oaks ē tei ’ō nei ato’a te ’Ēkālesia « nō te tauturu i te tā’āto’ara’a o te mau tamari’i a te Atua ’ia māramarama i tō rātou fāito pūai ’e ’ia fa’aoti i tō rātou hope’a teitei roa a’e. Tē vai nei teie ’Ēkālesia nō te hōro’a i te mau tamaiti ’e te mau tamāhine a te Atua i te mau rāve’a nō te tomora’a i roto i te bāsileia tiretiera, ’e ’ia noa’a te fa’ateiteira’a ».³ E ravehia te reira nā roto i te ha’apa’ora’a i te mau ’ōro’a ’e te mau fafaura’a o te ’evanelia.

Tē tītau nei teie mau ’ōroa ’e teie mau fafaura’a i te autahu’ara’a, ’o tē roa’a noa i roto i te ’Ēkālesia mau a te Atua. Nā roto i te reira ’e te tahi atu mau rāve’a, tē tauturu nei te Fatu ’e tāna ’Ēkālesia ia tātou i roto i tō tātou tere nō te riro i te ta’ata maita’i a’e e roa’a ’ia riro, ’ia ineine tō tātou ’ā’au nō te fatu i te mau mea ato’a tā te Metua i te Ao ra ’e ’ia noa’a te ora mure ’ore, ’ia tae i te hō’ē mahana.

A tāmau noa, ’e ’eiaha e fa’aru’e !

Teie tere i te bāsileia tiretiera ra, ’ua ’ī ïa i te ti’aturira’a , e ’ere rā i te mea ’ohie noa. ’Ua ’ite te Metua i te Ao ra i te reira. ’Ua fafau mai ’oia ’e ’o Iesu Mesia e tauturu ’e e ha’apūai ia tātou i te mau ta’ahira’a ato’a o te ’ē’a.

Nō reira ’a tāmau ā, ’e ’eiaha e fa’aru’e. E tauturuhia tātou ’a tūtava ai i te pe’e i te Fa’aora, ’a ora ai nō te fa’ati’amā ia tātou nō te fāri’i ’e nō te rave mai te au i te mau fa’aurura’a nō ’ō mai i te Vārua Maita’i ra, ’ia ’ite tātou i hea e nehenehe ai e ha’amaita’i. A haere ai tātou nā roto i te orara’a mā te fa’aro’o ia Iesu Mesia ’e ’a tātarahapa ai, ’ia hina’aro-ana’e-hia, e tauturu mai tō tātou Metua i te Ao ra ia tātou ’ia taui nō te maita’i a’e.

Te rirora’a ’ei mea ti’amā nō te bāsileia tiretiera, e ’ere ïa i te hō’ē noa ’ohipa rahi e rave. E fa’ahope’ara’a rā nō te mā’itira’a tāmau ’ia pe’e i te Fa’aora ’e ’ia tūru’i i ni’a i te tīa’ira’a ’e te ha’apāpūra’a ’o tē tae mai nā roto i tāna ’evanelia.

Nō reira, mai te mea tē tūtava ra ’outou ’ia pe’e i te Fa’aora ’e tē ha’ape’ape’a noa ra e tāpae ānei ’outou i te bāsileia tiretiera, tē fa’a’ite nei te mau tāpa’o ato’a i te hō’ē « ’Ē » pūai mau ! E tāpae ’outou ! » ’O teie ïa te mea tā te Metua i te Ao ra e ’ōpua nō tātou pā’āto’a ! ’E mai tā te peresideni Oaks i ha’api’i mai, e tupu mau te reira « nō te here o te Atua nō tāna mau tamari’i ’e nō te tāra’ehara ’e nō te ti’a-fa’ahou-ra’a a Iesu Mesia, ‘’o tē fa’ahanahana nei i te Metua, ’e e fa’aora i te mau ’ohipa ato’a a tōna ra rima’ [Te Parau Ha’api’ira’a ’e te mau Parau Fafau 76:43] ».⁴