Tāpe’a i tā tātou parau

Nā Elder Ronald A. Rasband

Nō te pupu nō te Tino ’Ahuru Ma Piti ’āpōsetolo

Nō roto mai i te hō’ē a’ora’a o te ’āmuira’a rahi nō ’Ātopa 2019.

tamaiti e fa’aho’i ra i te pūtē moni, tamāhine ’e te parau ha’apāpū, ’e e tamaiti e pa’uma ra i te mou’a

I te hō’ē pō i tō’u ’āpīra’a, ’ua pārahi tō’u metua vahine i pīha’i iho iā’u i raro i tōna ro’i ’e ’ua paraparau pāpū mai ’oia nō te faufa’a rahi e ora i te Parau pa’ari. ’Ua hi’o ’āfaro ’oia i roto i tō’u mata ’e mai te huru ’ua putapū roa tō’u ’ā’au i tāna mau parau : « E parau fafau mai ’oe Ronnie, i teie mahana, e ora noa ’oe i te Parau pa’ari. » Ma te tura rahi, ’ua parau fafau atu vau iāna i te reira, ’e ’ua tāpe’a vau i te reira i terā mau matahiti tā’āto’a.

E fa’aotira’a ato’a tā’u i rave ’oi’oi nō te pe’e i te mau ture a te Atua, ’e ’aita roa atu vau i ho’i a’e i ni’a iho. ’Ua na ’ō mai te Fatu ē : « ’Ua ru’uru’uhia vau, ’o te Fatu, ’ia rave ’outou i te mea tā’u i parau ra ; ’ia ’ore rā ’outou ’ia rave i tā’u i parau ra, e ’ore ïa tā ’outou fafaura’a i reira » (Te Parau Ha’api’ira’a ’e te mau Parau Fafau 82:10).

’Ei ’āpōsetolo nō Iesu Mesia, tē ani nei au ia ’outou ’ia feruri i te mau parau fafau ’e te mau fafaura’a tā ’outou i rave i mua i te Fatu, ’e ia vetahi ’ē, nā roto i te huru parauti’a rahi, mā te ’ite ē, hō’ē noa tā ’outou parau. Tē parau fafau nei au ia ’outou ē, ’ia rave ’outou i te reira, e ha’amau te Fatu i tā ’outou mau parau ’e e fa’autu’a maita’i ’oia i tā ’outou mau ’ohipa ’a tūtava ai ’outou ma te itoito tu’utu’u ’ore ’ia patu i tō ’outou mau orara’a, tō ’outou ’utuāfare ’e te ’Ēkālesia a Iesu Mesia i te Feiā Mo’a i te mau Mahana Hope’a nei. E pārahi ’oia i pīha’i iho ia ’outou, ’e e nehenehe tā ’outou ’e hi’o i mua ma te ti’aturi ē, e « fāri’ihia i te ra’i ra, ’ia pārahi [’outou] i pīha’i iho i te Atua i roto i te ’oa’oa hope ’ore ra » (Mosia 2:41).