« Te ’oa’oa o Kosei », Nō te Pūai o te Feiā ’Āpī, Tiurai 2021, 12–15.
Te ’oa’oa o Kosei
E mea au nā teie taure’are’a tāpōnē ’ia fa’a’ite i te ’evanelia.
Hōho’a nā Guetty Images
E fa’ata’i ’oia i te piāna. E horo vitiviti ’oia. E ou’a ātea ato’a ’oia ! Terā rā, e ere te reira ana’e te mau ’ohipa māere nō ni’a ia Kosei H., e tamāhine 17 matahiti nō Nagasaki, i te fenua Tāpōnē.
« ’O ’oia te hō’ē ’o te mau misiōnare taure’are’a rahi a’e tā’u i ’ite », te parau ïa a te tuahine Mckenna Frasure, te hō’ē misiōnare tei ho’i mai nā te misiōni, tei tāvini i te fenua Tāpōnē, i reira o Kosei e ora ai. Tē parau ra ’oia ē, « ’aita roa o Kosei i ma’iri i te hō’ē rāve’a ’ia vai i pīha’i iho i te mau misiōnare ’aore rā, ’ia fa’a’ite pāpū nō ni’a i te Mesia nā roto i te mau ’ātivite a te ’Ēkālesia ’e te mau rāve’a tūreiara’a tōtiare ».
E fa’ariro Kosei i te mau misiōnare ’ei mau hoa rahi a’e nōna. E’ita ’outou e māere i te reira huru tōna ’ia ’ite ana’e ’outou i tōna ’oa’oa rahi ’ia fa’a’ite i te ’evanelia.
« Te ’ohipa misiōnare, ’o tō’u ïa ’oa’oa », te parau ïa a Kosei. « ’Ua ha’api’i mai Nephi ia tātou ē, te hotu o te tumu rā’au nō te ora, ’e mea hina’arohia ïa i te mau mea ato’a’ (1 Nephi 11:22). E riro paha te tahi mau ta’ata i te huna i teie hotu. Terā rā, ’ei ta’ata tei ’ite i te monamona o te hotu, tē hina’aro nei au e fa’a’ite i te ’evanelia i te mau ta’ata ’ati a’e iā’u ».
E nehenehe te fa’a’itera’a i te mau ha’amaita’ira’a o te ’evanelia e riro ’ei tāreni rahi roa a’e i te mau tāreni ato’a o Kosei.
Te manuia o te mau rāve’a tūreiara’a tōtiare
I muri a’e i te ravera’a i te hō’ē ha’api’ira’a fa’aineinera’a misiōnare, ’ua tupu te mana’o rahi fa’ahou atu i roto ia Kosei ’ia hōpoi i te mau ’oa’oa o te ’evanelia i tōna mau hoa. ’Ua ha’amata ’oia nā roto i te haerera’a i ni’a i te natirara. Te hō’ē o te mau mauha’a tumu tāna e fa’a’ohipa nō te fa’a’ite i te mau poro’i ’e te mau mea nō ni’a i te ’evanelia, o te mau rāve’a tūreiara’a tōtiare ïa.
E rave rahi o tōna mau hoa tei pāhono mai i teie mau ha’apararera’a i ni’a i te mau rāve’a tūreiara’a tōtiare. ’Ua haere roa mai hō’ē hoa ia Kosei ra ’e ’ua nā ’ō mai, « tē ’ana’anatae nei au i tā ’oe ’Ēkālesia ».
E hoa mātau-noa-hia teie i te ha’amatara’a, terā rā ’ua tupu ’oi’oi i te rahi tō rāua auhoara’a. « ’Ua ha’amata ’oia i te ani mai iā’u i te ta’a-’ē-ra’a i rotopū i tōna fa’aro’o ’e tō’u » te fa’ata’ara’a ra Kosei. « Noa atu ē, ’aita vau i parauparau pinepine roa iāna, ’ua riro mai māua ’ei hoa rahi roa i muri a’e i tō’u fa’a’itera’a i te ’evanelia i ni’a i te mau rāve’a tūreiara’a tōtiare ».
Te ha’a tū’aro, te fa’a’ana’anataera’a au roa, ’e te mau auhoara’a mure ’ore
E ’ere te rāve’a tūreiara’a tōtiare ana’e te rāve’a a Konei nō te fa’a’ite i tōna fa’aro’o. ’A ha’amana’o na, e orara’a ’ohipa roa tōna tei ’ī i te mau ’ohipara’a. E rave rahi tāna rāve’a nō te fārerei i te ta’ata ’e ’ia fa’ahoa. ’E e fa’a’ohipa ’oia i te reira mau rāve’a nō te ha’aparare i te ’oa’oa o te ’evanelia.
« I te hō’ē taime, ’ua ani au i te hō’ē hoa nō te pupu ha’a tū’aro ’ia haere mai i roto i te hō’ē ha’api’ira’a nā te mau misiōnare i te fare purera’a », te fa’ata’ara’a ra Kosei. « Ua riro mai ’oia ’e te mau misiōnare ’ei mau hoa rahi nō te tahi ’e te tahi ’a ha’api’i ai ’oia i te reo Peretāne ».
Terā rā, ’aita te mau ’āparaura’a i fa’aea noa i ni’a i te mau ha’api’ira’a reo Peretāne.
« ’Ua ha’amata tō’u hoa i te feruri ē, nō te aha teie mau misiōnare, ’ua fātata hō’ē ā fāito matahiti ’e tōna, e rave ai i te ’ohipa tāmoni ’ore ’e e tāvini ai ’ei mau misiōnare i te fenua Tāpōnē. Tāna uira’a i muri iho ’o te uira’a ïa e aha te mea tei tura’i i te mau misiōnare ’ia tāvini. ’Ua fa’aro’o ’oia i te mau ha’api’ira’a misiōnare i teienei, ’e tē vai noa ra tāna fārereira’a i te mau misiōnare nā roto i te paraparaura’a video.
I te mau taime ato’a e paraparau ’oia nō te ’evanelia i tōna mau hoa, e tāmata o Kosei i te fa’atano i te mea tāna e fa’a’ite ra i ni’a i tō rātou fāito ’ana’anatae. « Ei hi’ora’a, e paraparau vau nā mua i te ’ohipa e tupu i muri a’e i te pohe, e aha te ’ōpuara’a o te orara’a, ’aore rā, tē vai ra ānei te Atua » tāna ïa parau. « I muri iho, e nehenehe tā’u e fa’atano, mai te au i te fāito o tō rātou ’ana’anatae ».
’Oia mau, ’ua ’ite ’oia ē, e ’ere te mau ta’ata ato’a ’o tē ’ana’anatae nei. ’Ua fārerei a’e nei ’oia i te fifi, mai te mau huru ta’ata ato’a. I te hō’ē mahana, i muri a’e i te uira’a mai e rave rahi o tōna mau hoa i te mau uira’a nō ni’a i te ’Ēkālesia, ’ua tāmata Kosei i te fa’a’ite i te hō’ē parau ’ōpere a te ’Ēkālesia i te hō’ē o rātou. « Terā rā, ’ua horo taua hoa ra i rāpae i te piha ha’api’ira’a, i te vāhi haerera’a ta’ata, ’ua ’ata pūai iā’u.
« ’Ua ’oto roa vau » ’ua parau Kosei.
’Aita rā ’oia i vaiiho i te mana’o ha’aparuparu ’ia tāpe’a iāna. ’Ua ’ite ’oia ē, te mea tāna e fa’a’ite nei ia rātou, e ha’amaita’i te reira i tō rātou orara’a e a muri noa atu mai te mea e fa’aro’o rātou.
Te ’oa’oa ’o tē tūra’i iāna
« E ’ite au i te ’oa’oa i roto i te mau ha’api’ira’a a te Mesia », te parau ra Kosei. « ’Āhiri ’aita vau i ’ite i terā mau ha’api’ira’a, e ’ere ïa tō’u orara’a i te mea ’oa’oa roa ».
’A amo ai ’oia i tāna mau ’ātivite ’e tōna mau ’ana’anataera’a e rave rahi, ’ua ’ite Kosei nāhea ’ia fa’ata’a i te mea faufa’a. « Nā te ’evanelia a Iesu Mesia e hōpoi mai i te ti’aturira’a i tō tātou orara’a ’e e heheu mai i te mau mea ato’a tā tātou e rave », tāna ïa parau. « Noa atu ē, tē fa’aturuma ra tātou, ’aore rā, tē fifi ra, nā te pure ’ā’au tae e hōpoi mai i te hau ’e e tauturu ia tātou ’ia roa’a te hō’ē huru maita’i ».
Nō reira tōna hina’aro pāpū ’ia fa’a’ite i te ’evanelia i te mau taime ato’a e ti’a iāna. E hina’aro ’oia ’ia ’ite vetahi ’ē i te mau mea tāna e fāna’o nei i roto i te hō’ē mahana ! « Tē ti’aturi nei au mai roto roa mai i te hōhonura’a o tō’u ’ā’au ’ia fāri’i te mau ta’ata e rave rahi i te rāve’a nō te ’ite i teie ’oa’oa mau », tāna ïa parau.
E aha te mea faufa’a a’e
’Oia mau, ’aita te fa’a’itera’a i te ’evanelia e rave rahi nei i te tā’āto’ara’a o tōna taime. Tē rave itoito ato’a nei Kosei i te ’ohipa i roto i te tahi atu mau ’ōpuara’a tāna i roto i te orara’a. I te mau mahana ato’a, e horohoro ’oia ’e e fa’a’eta’eta i tōna tino ma te pa’ari. ’Ia hina’aro ana’e ’oia e fa’afa’aea ri’i, e ha’uti ’oia i te piāna. E mea au ato’a nāna ’ia haere e ori haere nā roto i te nātura ’e e hōro’a i te taime nō tōna ’utuāfare. « I roto i te nātura ’e tō’u mau taea’e ’e mau tuahine—e ’ore roa e mo’ehia iā’u te mahana ’a tai’a ai ’e ’a ’amu ai mātou i te i’a ! » tāna ïa parau.
Noa atu rā i te reira, e tāmau noa Kosei i te hōro’a i te taime nō te mau mea faufa’a a’e.
’E tē vai ra tāna hō’ē a’ora’a nō te mau ta’ata ato’a e hina’aro e nā reira ato’a : « E fāri’i tātou i te arata’ira’a ’ia haapa’o ana’e tātou i te mau fa’auera’a. Mai te mea e nā reira tātou, e nehenehe tātou e ha’apūaihia e te Fatu. E mono te tīa’ira’a ’e te ti’aturi i te mata’u ’e te mana’o tapitapi. Mai te mea e hāmama tātou i tō tātou vaha ma te ha’amā ’ore i te ’evanelia, e ’ite mai te ta’ata i te here o te Mesia ’e e fa’a’īhia rātou i te ’oa’oa.