“Mekem Raeting Samting,” Blong Ol Yut Oli Kam Strong Julae 2021, 18–19.
Mekem Raeting Samting
Blong yu stap raetem ol tingting blong yu taem yu stap stadi long ol skripja, bae i save helpem yu blong lanem samting.
“Evri taem mi stat blong ridim olgeta skripja, !bae mi slip!” wan long ol misinari i talem long misin presiden blong hem. “!Ol skripja ia oli olsem ol tablet blong slip!”
Presiden blong hem i ansa: “?Yu yu stap tekem sam not taem we yu stap rid?
“No,” misinari talem.
“Hem i isi blong go slip, o letem maen blong yu i flae taem we yu stap rid,” presiden i talem, “!be i no save olsem sapos yu stap raet wetem!”
Advaes ia, misin presiden i talem long wan misinari we i bin gat hadtaem, mo i mekem bigfala samting i defren. So, sapos yu stap lukaotem wan niu wei blong mekem skripja stadi blong yu i kam gud moa, yu traem hemia. Taem we yu stap raet abaot wanem we yu stap ridim, bae yu luk se tingting i strong moa mo yu stap lanem samting long wan wei we i gud moa tu.
Hemia samfala stori wei we mifala i faenem se i save help:
Brata Steven Lund:
Mi putum sam pepa i rere taem we mi stap rid. Taem we Spirit i toktok long mi taem we mi stap stadi, mi raetemdaon ol kwaet tingting ia.
Mi karem aedia ia long Elda Richard G. Scott (1928–2015) blong Kworom blong Olgeta Twelef Aposol, we i talem: “Raetemdaon, long wan ples we i sef, ol impoten samting we yu lanem, we oli kam long Spirit. “Bae yu faenem se, taem yu stap raetemdaon ol spesel mo impoten kwaet toktok ia, bae plante moa i kam bakegen. Mo tu, save ia we bae yu kasem, bae i stap wetem yu long ful laef blong yu” (“To Acquire Knowledge and the Strength to Use It Wisely,” Ensign, June 2002, 32).
Mi save se ol toktok ia oli tru. Taem we mi stap rere blong givim ol toktok mo ol lesen, mi stap go long ol skripja, be tu, mi lukluk long wanem mi bin raetemdaon taem mi bin stap ridim olgeta.
Brata Ahmad Corbitt:
Mi laekem blong stadi folem ol topik. Mi ridim olgeta skripja stat long stat kasem en, be tu, mi laekem blong jiamjiam raon, mo stadi folem ol topik. Eksampol: bambae mi yusum Topical Guide blong faenem ol skripja long saed blong fet, o kam tugeta blong Isrel. Afta, mi no stap tekem sam not nomo, be mi raetemdaon wanem we mi stap lanem blong meksua se mi rili andastanem topik ia. Oltaem mi mi sapraes long hamas samting mi andastanem gud moa taem mi mekem olsem. Mo tu, mi jusum samfala skripja blong lanem baehat.
Brata Bradley Wilcox:
Mi kipim wan stadi jenol; insaed mi raetem ol skripja wetem ol toktok blong miwan. Eksampol: “From man we i folem fasin blong wol i wan enemi blong God,” (Mosaea 3:19), bae i kam: “From olgeta we oli gat hae tingting mo oli no sakem sin oli ol man we oli ol enemi blong God, be God i no enemi blong olgeta. God i bes fren blong olgeta.”
Mo tu, mi raetem ol kwestin. Ol kwestin ia, oli ol kwestin we mi gat finis bifo mi ridim ol skripja, o oli ol kwestin we oli kamkamaot from ol samting we mi stap ridim. Long eni long tufala wei ia, ol kwestin oli kipim maen blong mi i lukluk long wan samting nomo.
Paoa blong Stap Raetemdaon Ol Tingting blong Yu
Wanwan long mifala long presidensi blong mifala, i stap stadi ol skripja long ol defren wei, !be mifala evriwan i stap raet taem mifala i stap stadi!
Blong stap rid, i helpem mifala blong putum ol tingting mo ol filing ia insaed long mifalawan. Hemia i impoten. Mo taem we mifala i stap toktok o raet, mifala i faenem mo talem ol tingting mo ol filing blong mifala we oli kamaot stret long insaed long mifala. Mifala i filim se hemia i helpem mifala blong tekem ol trutok blong gospel oli kam long mifalawan bakegen long wan moa gud wei.
Wan yang man i faenemaot se hemia i tru blong hem taem we oli bin askem hem blong givim wan toktok long sakramen miting. Hem i bin harem plante nara pipol oli givim toktok, be hem i no save tingbaot ol ditel blong ol toktok ia. Taem ia i bin defren. Taem we hem i bin raetemdaon wan aotlaen blong toktok blong hem, hemia i bin helpem hem blong givim wan toktok we i stap long oda, be tu, hem i bin tingbaot toktok ia blong wan longfala taem.
Sem samting i save hapen long skripja stadi blong yumi. Sapos yu yu stap slip taem we yu stap openem ol skripja, naoia, i taem blong wekap. Traem pulum wan pensel i kam, o wan pen, wan telefon, o kompiuta, mo stat blong raet. !Bae yu sapraes tumas long wanem defren samting bae i mekem long yu!