O Rawa Ni Yacova!

Mai vei Eric B. Murdock

Mekasini ni Lotu

E dodonu meda nanuma tiko na veika kece erau sa cakava oti na Tamada Vakalomalagi kei Jisu Karisito—kei na veika erau sa cakava tiko—me vukei keda meda taukena na matanitu vakasilesitieli.

Vunau kei na Veiyalayalati 76

iVakatakilakila

goneyalewa

“Oi Au? Ena matanitu vakasilesitieli? Au sega ni vakabauta ni’u na yacova rawa.”

Sa bau dua beka na nomu vakasama vakaoya? Ia, sa kena ivakarau ga me da vakataroga se da sa tu vinaka vakabibi ni vaka eda se yawa sara mai na noda vinaka taucoko. Ena so na gauna e vakilai ni vaka e sega ni yacovi rawa na matanitu vakasilesitieli!

Ia mo kakua ni yalolailai. Na inaki taucoko ni ituvatuva i Tamada Vakalomalagi oya me vukei iko mo yaco me vakataki Tamada Vakalomalagi kei Jisu Karisito ka laki bula vata kei Rau ena matanitu vakasilesitieli. Ka o sa tiko ena dua na itutu vinaka cake sara mai na kena o nanuma ni o tiko kina. O Peresitedi M. Russell Ballard, na Peresitedi Vakatawa ni Kuoramu ni iApositolo Le Tinikarua, e sa vakananuma vei keda ni bula vata kei Rau “e sega walega ni noda inaki—sa ikoya talega na Nodrau inaki.”¹

E levu cake sara mai na ka kecega, e vinakata na Tamada Vakalomalagi kei Jisu Karisito me da laki bula kece sara ena matanitu vakasilesitieli vata kei ira na noda matavuvale. Na itukutuku vinaka sa ikoya ni sega ni gadrevi me da yaco ki kea vakataki keda ga. Ni da lako mai vei Karisito ka muri koya, eda na ciqoma na kaukauwa kei na veivuke eda gadreva. Ena vuku ni Nona Veisorovaki, na taukeni ni matanitu vakasilesitieli e sega walega ni rawa, e kena irairai sara ga.

Okoya gona, ena Nona veivuke, o na rawa ni cakava oqo! O rawa ni yacova!

Na iTuvatuva ni Kalou e Baleti Keda Kece

Me da curu ki na matanitu vakasilesitieli, e gadrevi me da vakabauti Jisu Karisito ka segata me da vakalevutaka na vakabauta oya. Eda gadreva me da tovolea me da veisau ka veivutuni e veisiga. E gadrevi meda papitaiso ka ciqoma na isolisoli ni Yalo Tabu—ka dau nanumi Jisu Karisito wasoma ka vakavouya na noda veiyalayalati. E gadrevi me da vosota me yacova na ivakataotioti. Kevaka oqo na veika o gadreva ka sasagataka tiko, o sa tu ena nomu sala mo yaco me dua ka taukena na matanitu vakasilesitieli.

Me kena ikuri, a vakavulica o Peresitedi Dallin H. Oaks, na iMatai ni Daunivakasala ena Mataveiliutaki Taumada, ni o ira sa kilikili kaya na ivakatagedegede cecere duadua ni matanitu vakasilesitieli sai “ira era sa sotava na veika cecere duadua ena matanitu oqo, oka kina na yalodina ki na veiyalayalati e vakayacori ena valetabu ni Kalou kei na vakamau me tawamudu.”² (E rawa ni o vulica eso tale na ka me baleta oqo ena nomu wilika na Vunau kei na Veiyalayalati 76:50–70,92–96).

Kevaka e vakavuna oqo mo vakataroga—se lomaleqataka—me baleta na nomu vakavakarau mo taukena na matanitu vakasilesitieli, nanuma tiko ni sa dua na ilakolako. Ena veisiga yadua eda digitaka kina meda na vakataka cake na Tamada Vakalomalagi kei Jisu Karisito oya sa dua na siga eda toro voleka yani kina ki na dua na tamata vakasilesitieli cake—ka voleka yani ki na matanitu vakasilesitieli. E dina sara, era na tu na lutu-tani, caka cala, kei na ivalavala ca vei keda kece sara. Na vakararavi tiko vei Jisu Karisito ni da veivutuni ena veisiga sa idola. Na ilakolako oqo e sa dua na inuinui baleta na veika kecega e sa cakava o Koya kei na Tamada Vakalomalagi—kei na veika Rau sa cakava tiko—me vukei keda meda yaco kina ki kea.

Sa Tu Vei Keda na iVakabula.

iVakatakilakila

Jisu Karisito

Sa vakarautaka na iVakabula na sala meda lesu rawa kina vua na Tamada Vakalomalagi. O Josefa Simici a vakamacalataki ira era bula tu ena matanitu vakasilesitieli ni ra sa “rogoca na ivakadinadina kei Jisu” ka ra sa “uasivi sara ena vukui Jisu … ko koya sa vakayacora na veisorovaki e uasivi sara ena liviraki ni nona dra ”(Vunau kei na Veiyalayalati 76:51, 69).

Noda yaco me uasivi sara vei Jisu Karisito e sega ni kena ibalebale ni da sega ni dau caka cala. E kena ibalebale ni da veivutuni ka tovolea meda vinaka cake ena veisiga yadua, ka vakararavi tiko vua na iVakabula kei na kaukauwa ni nona Veisorovaki me vukea noda veisau. Ni da cakava oqo, na Nona loloma soliwale e vakatara vei keda me da toso ki na ivakatagedegede cecere duadua ni matanitu vakasilesitieli na vanua eda na laki bula kina vata kei Koya, Tamada Vakalomalagi, kei na noda matavuvale me tawamudu. Eda na ciqoma talega na veika kece e tu vei Tamada mai Lomalagi. Ena sega ni rawa e dua vei ira oqo ke sega na iVakabula.

Sa Tu Vei Keda na Lotu.

A vakavulica o Peresitedi Oaks ni sa tu talega oqo na Lotu “me vukei ira kece na luve ni Kalou me ra kila vakavinaka na nodra rawa ni rawata ka rawata na nodra icavacava cecere duadua. Na Lotu oqo e tu me vakarautaka vei ira na luvena tagane kei na yalewa na Kalou na sala ni curu kei na bula vakacerecerei ena matanitu vakasilesitieli.”³ Oqo e vakayacori ena talairawarawa ki na cakacaka vakalotu kei na veiyalayalati ni kosipeli.

iVakatakilakila

valetabu

Na cakacaka vakalotu kei na veiyalayalati oqo e gadrevi kina na matabete, ka sa tu duadua ga ena Lotu dina ni Kalou. Ena veisala oqo kei na so tale, ena vukei keda na Turaga kei na Nona Lotu ena noda ilakolako me da yaco meda vinaka sara me rawa kina ni da sa vakarau tu ki na dua na siga me da taukena na veika kece sa tu vua na Tamada Vakalomalagi ka rawata na bula tawamudu.

Toso Tikoga, ka Kakua Ni Soro!

Na ilakolako oqo ki na matanitu vakasilesitieli e sa inuinui, ia e sega ni dau rawarawa tu ga. E kila vinaka oya na Tamada Vakalomalagi. Sa yalataka o Koya kei Jisu Karisito me vukei ka vaqaqacotaki keda ena veikalawa yadua ni noda ilakolako.

iVakatakilakila

cadra ni matanisiga

iTaba mai na Getty Images

Ia toso tikoga, ka kakua ni soro. Eda na vukei ni da segata me da muria na iVakabula, bula me da kilikili kina me da ciqoma ka cakacakataka na veivakauqeti ni Yalo Tabu, ka raica na vanua e rawa ni da vakavinakataka. Ni da lako curuma na bula ena vakabauti Jisu Karisito ka veivutuni ni da gadreva vakakina, ena vukei keda na Tamada Vakalomalagi meda veisau meda vinaka cake.

Na noda kilikili kaya na matanitu vakasilesitieli e sega ni rawati ena dua na cakacaka cecere. Sa vua ni noda digitaka tikoga me muria na iVakabula ka vakararavi ki na inuinui kei na veivakadeitaki e lako mai ena Nona kosipeli.

O koya gona, kevaka o segata mo muria na iVakabula ka lomaleqataka tiko se ko na yacova na matanitu vakasilesitieli, na ivakatakilakila kece era dusi ki na dua na “Io! O rawa ni yacova! Oqo na ka e nakita vei keda kece sara na Tamada Vakalomalagi! Ka me vaka a vakavulica o Peresitedi Oaks, ena rawa kece “ena vuku ni nona loloma na Kalou me baleti ira na Luvena kei na veisorovaki kei na tucaketale i Jisu Karisito, ‘a sa vakalagilagi Tamana, ka vakabulai ira kece na bulibuli ni ligana’ [Vunau kei na Veiyalayalati 76:43].”⁴