“Cakava na Ka Volai,” Me iSakisaki ni iTabagone, Jiulai 2021, 18–19.
Cakava na Ka Volai
Na volai ni nomu vakasama ni o vulica tiko na ivolanikalou ena rawa ni vukei iko mo kila vinaka.
“Ena veigauna au tekivu wilika kina na ivolanikalou, au dau moce!” a tukuna e dua na daukaulotu vei nona peresitedi ni kaulotu. “E vaka ga ni dau vuanikau ni moce na ivolanikalou!”
A sauma mai o nona peresitedi, “O bau dau volavola ni o wilika tiko?”
“Sega,” a kaya na daukaulotu.
“E rawarawa ni o moce se me kuitaki na nomu vakasama ni o wilika wale tikoga,” a kaya o peresitedi, “Ia ena sega ni rawa ni o vakuria ena volavola!”
Na ivakasala a solia na peresitedi ni kaulotu oqo vua na nona daukaulotu sasaga dredre tiko a cakava e dua na veisau levu. O koya gona kevaka o vakasaqara tiko e dua na sala vou mo vaqaqacotaka kina na nomu vuli ivolanikalou, mo tovolea sara. Ni o vola na veika o wilika tiko, o na raica ni o na vakaitavi vakalevu cake ka vuli vakavinaka cake talega.
Oqo eso na iwalewale keitou raica ni yaga sara vakalevu.
Brother Steven Lund:
Au dau biuta voleka na pepa e yasaqu ni’u wilivola. Ni vakauqeti au na Yalotabu ena gauna ni noqu vuli, au dau vola sara oqori.
Au a taura na vakasama oqori mai vei Elder Richard G. Scott (1928–2015) ena Kuoramu ni iApositolo Le Tinikarua, ka a kaya: “Vola ena dua na vanua taqomaki na veika bibi o sa vulica mai na Yalotabu. O na raica ni gauna o vola kina na veivakauqeti talei, e vakavuqa e dau lako mai e levu tale. Vakatalega kina, na kila-ka o rawata ena tudei tu ena nomu bula taucoko” (“To Acquire Knowledge and the Strength to Use It Wisely,” Ensign, Jiune 2002, 32).
Au kila ni dina na vosa oqori. Ni’u dau vakarautaka na noqu vosa kei na lesoni eso, au sega walega ni dau lako ki na ivolanikalou ia ki na veika talega au a vola ena gauna au wilika tiko kina.
Brother Ahmad Corbitt:
Au dau taleitaka me’u vuli vakaiulutaga. Au dau wilika na ivolanikalou mai na itekivu ki na iotioti, ia au dau taleitaka talega me veiladeyaki wavoki ka vulica na ulutaga eso. Me kena ivakaraitaki, au na vakayagataka na Topical Guide me kunea kina na ivolanikalou ena vakabauta se na vakasoqoni vata nei Isireli. Au qai sega walega ni vola vakaleleka, ia au vola sara na veika au vulica tiko me’u vakadeitaka kina ni’u sa kila vakavinaka sara. Au dau kurabui tu ga ena levu ni noqu kila vakavinaka cake na veika eso ni’u cakava oqo. Au dau digitaka talega eso na ivolanikalou me’u cavuqaqataka.
Brother Bradley R. Wilcox
Au maroroya tiko e dua na ivolaniveisiga ni vuli ka’u dau vola kina na ivolanikalou ena noqu vosa ga. Me kena ivakaraitaki, na “Ni sa meca ni Kalou na tamata vakavuravura” (Mosaia 3:19) e sa yaco me “Baleta na tamata viavialevu ka tawaveivutuni e sa digitaka me meca vua na Kalou, ia na Kalou e sega ni nona meca. Na Kalou sa nona itokani vinaka duadua.”
Au dau vola talega eso na taro. Era rawa ni vakatataro au vakasamataka tiko ni’u se bera ni wilika, se e rawa ni ra taro ka basika mai na veika au wilika tiko. Se dua ga na sala qori, au dau vakanamata tu ga kina.
Na Kaukauwa ni Volai ni Nomu Vakasama
Oi keitou yadua ena neitou mataveiliutaki dau vulica na ivolanikalou ena sala duidui, ia keitou dau volavola kece ni keitou cakava oqori!
Na wiliwili e vukea neitou vakataukenataka na vakasama kei na veika vakilai eso. E sa ka bibi oqori. Ni keitou vosa se volavola, keitou kunea ka vakaraitaka na vakasama kei na veika vakilai mai loma-ki-tuba. Keitou vakila ni oya e vukei keitou me vakaitaukeitaka vakavinaka cake na dina ni kosipeli.
A kunea e dua na cauravou na dina oqo me baleti koya ena gauna a kerei kina me vosa ena soqoni ni sakaramede. A dau rogoca o koya e vuqa na tamata ni ra vosa ia e sega ni nanuma rawa na kena matailalai. Ia a duidui ena gauna oqo. Ni a vola o koya e dua na ituvatuva ni nona vosa, a sega walega ni vukei koya me solia e dua na vosa tuvani vinaka, ia a nanuma lesu tu ga ena dua na gauna balavu.
Na ka vata oqori e rawa ni yaco ena nomu vuli ivolanikalou. Kevaka o sosovu tiko ni o dolava na nomu ivolanikalou, sa kena gauna mo yadra mai. Tovolea mo dreta mai e dua na penikau, peni, talevoni, se kompiuta ka tekivu volavola yani. O na kurabui ena duidui levu ena rawa ni cakava!