“Na iTuvatuva ni Bula Marau ni Kalou kei na Nomu iCavacava Vakalou,” Me iSakisaki ni iTabagone, Janu. 2022.
Na iTuvatuva ni Bula Marau ni Kalou kei na Nomu iCavacava Vakalou
Na kila deivaki kei na bulataki ni ituvatuva ni bula marau e sa vakatarai iko ni yacova na nomu icavacava vakalou.
Droini mai vei Albert Espí
Na cava e votu mai nomu vakasama ni o rogoca na vosa icavacava? O vakasamataka tu li e dua na ka sa lewai taumada ka sega ni levei rawa? E dua na ka rerevaki se totoka e sega ni rawa ni veisautaki se cava ga na ka o cakava? Se o nanuma beka na tamata qaqa ena dua na iyaloyalo se ivola, sa lesi me vakacavara na sasaga, vakabulai vuravura, se yaco me tui se ranadi?
Era rawa ni duavata na dikisenari kei na ivakavakadewa oqori; ia, ni da vosataka na icavacava vakalou, eda tukuna tiko e dua tani na ka. E sega ni vaka na icavacava o wilika ena ivola se raica ena iyaloyalo yavala, na rawati ni nomu icavacava vakalou e rawa baleta ni o sa luve ni Kalou, ia sa gadrevi talega kina mo vakayagataka na nomu galala ni digidigi.
Sa tiko vua na Kalou na kaukauwa kecega mai lomalagi kei vuravura. Na veiyalayalati eda cakava vata kei na Tamada Vakalomalagi e vakatara Vua me noda itokani ni da lako curuma na cava ni bula. Na noda icavacava vakalou—na veika eda rawata ni da veitokani kei na Kalou—sa rawati ga mai na Nona ituvatuva ni bula marau.
Na nomu kila vinaka na ituvatuva ni Tamada Vakalomalagi me baleta na nomu bula marau ena vakatarai iko mo kila na kemu ivakatakilakila tawamudu kei na inaki. Na digitaki ni kena caka ka maroroi na veiyalayalati kei na Kalou ena vakatarai iko mo rawata na inaki oqori.
Ena ivola i Mosese eda wilika ni “sa kau cake ko Mosese ki na dua na ulunivanua cecere sara, ka sa raica na Kalou e matana votu, ka rau veivosaki kaya” (Mosese 1:1–2). Mai na veisiko vakatamata oqo, a vakavulici Mosese na Kalou me baleta na nona ivakatakilakila tawamudu. E dina ga ni a bula vakayago ka sega ni uasivi sara o Mosese, a vulica o koya e dua na ka bibi me baleti koya: o koya dina e luve ni Kalou (raica na Mosese 1:6).
Nanuma Tiko o Cei O Iko.
E vinakata o Setani mo guilecava o cei o iko. Na gauna a saga kina o Setani me vakayalolailaitaki Mosese ena cakacaka sa vakarautaka tu vua na Turaga, a sauma ena yaloqaqa o Mosese, “Ko cei ko iko? Raica koi au oqo e dua na luve ni Kalou” (Mosese 1:13; vakaikuritaki). A qai cauraka o Mosese, “Mo lako tani vei au Setani; kakua ni mai vakatovolei au” (Mosese 1:16; vakaikuritaki).
Ena dua tale na kena vosa, a kaya o Mosese, “O sega ni rawa mo cavilaki au, baleta niu kila o cei o au. E sega vei iko na rarama kei na lagilagi ni Kalou. A cava meu qaravi iko kina se meu vakabauta na nomu lasu?”
Kakua ni guilecava ni sa lomani iko na Kalou ka gadreva tu me vukei iko ka vakalougatataki iko. Sa tiko na Nona kauwai vakalou me baleti iko vaka e dua na Luvena. Yalovinaka taura na gauna mo vulica na cava na ibalebale dina mo dua na luve ni Kalou. Qai tuva lalawaka ka cakava na digidigi eso ena vukei iko ni bulataka na kilaka o ya ena veisiga.
E Tiko vei Au e dua na Cakacaka me baleti Iko
E vuqa tu na nomu leqa bibi kei na kauwai. E tiko na nomu cakacaka ni vuli, veitokani, itavi vakamatavuvale, ka vakakina e dua na cakacaka. Vakaidina, na nomu bolebole sai koya mo vakatauvatana na itavi bibi kece oqo ka sega ni guilecava tu na nomu inaki bibi ni bula. E tiko vua na Kalou e dua na cakacaka mo vakayacora (raica na Mosese 1:6). Sai koya na isau ki na taro “Cava na vuna au tiko kina e vuravura?”
Vaka e dua na luve ni Kalou, o a lako mai ki vuravura mo mai vakayago. Ena yagomu, sa rawa mo digitaka mo muri Jisu Karisito ena yalodina. Sa rawa ni o digitaka mo talairawarawa ki na ivakaro ni Kalou, ciqoma na cakacaka tabu vakalotu eso, ka cakava ka maroroya na veiyalayalati ni kosipeli. Na vakayacori ni veika oqo ena vakarautaki iko mo rawata na nomu icavacava vakalou.
Ni vakasamataki vakamatata tu na inaki oqo, sa rawa ni o raica na bibi ni kena tauri na sakaramede e veimacawa, vulici ni ivolanikalou, masu tu e veisiga, tuvai ni lalawaka yaga eso, kei na nodra qaravi tani. Na veika oqo e vukea iko ni vakananuma na vuna o tiko dina kina eke, ka ra na vukei iko mo bula kilikili ni ciqoma na ivakatakila o gadreva tu mo bula marau kina ka tiko ga ena salatu ni veiyalayalati. Ni ko veivutuni ka muria vagumatua na Turaga, o na ciqoma na veidusimaki ena veiyasa kece ni nomu bula.
Segata mo Vakai Koya O Sa Nakiti mo Vakataka
Na gagadre kei na kauwai ni vuravura, se nomu nuiqawaqawa, e rawa ni vakavuna mo vakayalia na nomu itavi bibi ena ituvatuva cecere ni veivakabulai ni Kalou. Ke sa yaco oqo, au sureti iko mo lako mai vei Karisito (raica na Moronai 10:32). E sega na ka ena ituvatuva tawamudu ni Kalou ena rawa ke sega o Koya, ia vata kei Koya, sa yacovi tu na ka vinaka kecega.
Na segati ni nona muri na iVakabula e sa sala vinaka duadua ni kena maroroi na rai vakosipeli. Ena vakabauta kei na vakanuinui Vua, sa rawa ni o sotava ena yalodei na veibolebole ni bula. Ena matata talega vei iko e levu na ka ni o digidigi, walia na leqa, cakacakataka na lalawaka dodonu eso, ka sotava na veitemaki.
Na nomu vakatulewa ena ra-wa na ka tawamudu. Mai vei Jisu Karisito kei na Nona loloma soliwale ni veisorovaki, sa rawa ni o reki tu ena bula oqo kei na kena e tarava. Sa rawa ni o kila na nomu icavacava vakalou ena ciqomi ni ka kece e tu Vua ka bulataka tiko na mataqali bula e liutaka tu, sai koya na “bula tawamudu, … na isolisoli uasivi duadua ni Kalou” (Vunau kei na Veiyalayalati 14:7).