“Sa Kilai Au na Tamada Vakalomalagi,” Me iSakisaki ni iTabagone, Janu. 2022.
Na iToko kei Au
Era wasea na itabagone na sala era sa bulataka tiko kina na vosa ni iToko ni Goneyalewa kei na Kuoramu ni Matabete i Eroni
Sa Kilai AuNa Tamada Vakalomalagi
“O au e dua na luvena tagane daulomani na Kalou”
Niu a keba tiko kei tamaqu, keirau a wasea e dua na gauna au na sega ni guilecava. Keirau a kabata cake na yasa ni dua na ulunivanua ena dua na bogi levu ka raica e dua na tikina me keirau dabe vata kina. Ni keirau rai kosova na maliwa lala buto, keirau a vakavolivoliti tu mai na veikalokalo vakasakiti duadua au se qai bau raica. Keirau a dabe vata toka vakabalavu, ka vakayacani ira yadudua na vuravura kei na kalokalo cokovata eso.
Niu vakaraica tu na maliwa lala e mataqu, au vakila niu sa ka lailai ka tawayaga. Au sega mada ga ni vakasamataka rawa na levu ni vuravura tale eso era tu ekea—“na veivuravura tawavakaiyalayala,” donu? Na cava au sa vakatauvatani tu ki na veika kece oya?
Au a tarogi tamaqu ke sa tiko eso tale na bula ena vuravura ekea, ka luvuci rawa tu niu vakasamtaka. A rairai wilika na noqu vakasama o koya, baleta ni a kaya ga: “Oqo na ka au kila. E levu tu na veika buli ni Tamada Vakalomalagi, me vaka o rawa ni raica. Ia mai na Nona ibulibuli kecega, sa lomani iko sara o Koya.
“E raica o Koya na veika kece o lako curuma ka vinakata vakalevu sara tu me dua na tiki ni nomu bula. E vinakata o Koya me vakamarautaki iko ka vukei iko mo lesu tale ka bula tawayalani vata kei Koya.”
Au se vakila tikoga noqu ka lailai ena ruku ni maliwa lala buto levu, ia au sa vakabauta na ivakadinadina i tamaqu. Au sa ka bibi kivua na Tamada Vakalomalagi. Ka vinakata tu o Koya me tiko ena noqu bula.
Au nanuma na ka a vakatavulica o Peresitedi Dieter F. Uchtdorf, na iKarua ni Daunivakasala ena Mataveiliutaki Taumada ena gauna oya: “Oqo e dua na ivakamacala veicurumaki ni tamata: ni vakatauvatani kei na Kalou, sa ka wale sara na tamata; ia eda sa ka taucoko kivua na Kalou.”1
Me vaka na maliwa lala veikalokalo oya, era sa tawayalani na ibulibuli ni Kalou—ia sa vakakina na Nona lomani ira yadua na Luvena. Vei keda vakayadua. Eso na gauna au vakasamataka lesu na gauna ko ya niu dabe qoroqoro voli tu ena dua na ulunivanua. Au na rairai ka wale ni vakatauvatani tu kei na Kalou, ia e sega ni vakasama vakaoya o Koya. O au na Luvena tagane, ka sa kilai au o Koya.
O dauvolaivola e vakaitikotiko e California, Amerika