“Kunei Jisu Karisito ena Veiyalayalati Makawa,” Me iSakisaki ni iTabagone, Janu. 2022

Lako Mai, Mo Muri Au

Kunei Jisu Karisito ena Veiyalayalati Makawa

Mai vei Marissa Widdison

Mekasini ni Lotu

Oqo e tolu na sala o rawa ni vakasaqara kina na iVakabula ni ko vulica na Veiyalayalati Makawa ena yabaki oqo.

iVakatakilakila

Jisu Karisito

Na taro tawanamaki: Na ivola cava so ni ivolanikalou e tukuni Jisu Karisito tu? Hmm Meda raica mada:

Na iVola i Momani e sa dua tale na ivakadinadina me baleti Koya.

Na Vunau kei na Veiyalayalati e sa dua na ivakasokumuni ni itukutuku mai Vua kivei Joseph Smith kei ira na parofita tale eso.

E vakamacalataka na Veiyalayalati Vou na veika a yaco ena Nona bula.

Ia vakacava beka na Veiyalayalati Makawa? E vakavulici keda talega me baleti Jisu Karisito?

Io! Na ka dina, a gumatua sara na iVakabula ni vukei ira na Nona tisaipeli mera kila vakavinaka na Nona itavi ena Veiyalayalati Makawa: “Ka sa vakatekivu e nai vola i Mosese ka yacovi ira kecega na parofita, ka sereka vei rau mai nai Vola Tabu kecega na vosa ka tukuni kina ko koya” (Luke 24:27).

Oqo e tolu na sala o rawa ni kunei Jisu Karisito kina ni ko vakadikeva na Veiyalayalati Makawa ena yabaki oqo.

1. Na ivolanikalou era tukuni Jisu Karisito ena vakayagataki ni dua tale na yaca.

Ena Veiyalayalati Makawa, sa vakatokai wasoma o Jisu me “Turaga” se “Kalou.” Na ivakadewa eso ni iVolatabu ka tabaka na Lotu e oka kina na ivakamacala e ra ka rawa ni vukei iko mo kila vinaka ni sa tukuni Jisu Karisito tiko e dua na tikina. Me ivakaraitaki, ni veivosaki o Mosese kei na Kalou ena dua na veikau kama (raica na Lako Yani 3:6), na ivakamacala e ra e vakamatatataka ni vosa tiko o koya vua na iVakabula.¹ Sa vakayaloqaqataki keda o Peresitedi Russell M. Nelson meda vulica na duidui ni yaca kei na itutu i Karisito e vakayagataki ena ivolanikalou.²

2. Na veika kei na soqo e vakananumi keda baleti Jisu Karisito.

E oka ena vuqa na ivolanikalou ni Veiyalayalati Makawa na ivakatakarakara eso e rawa ni vakavulici keda baleti Jisu Karisito ka vakananumi keda ena veivuke e dolea tu vei keda. Me ivakaraitaki:

E vakamacalataka e vuqa na ivolanikalou na gauna era a vakaroti kina na tamata yalodina mera cabora na manumanu me tiki ni nodra sokalou. Me ivakaraitaki, kevaka era vakatakilakilataka na luvei Isireli na nodra katuba ena dra ni lami, era sa taqomaki mai na dua na mate veitauvi rerevaki. Na veisoro oqo e vakananumi keda ni sa vakatarai Koya o Jisu Karisito me vakamatei me tiki ni Nona Veisorovaki me ulabaleta kina na mate vakayalo ka vakayago. (Raica Na Lako Yani 12:13.)
Ena dua na gauna a vunitaki koya e dua na parofita na yacana o Ilaija ena vanua dravuisiga. A vakila o koya na rarawa ka kaya ni diva tu me sa mate. Ni moce toka, a yaco veivakurabui mai na madrai kei na wai ka vakaukauwataka na yagona kei na vakasama me toso tale. Oqo e rawa ni vakananumi keda ni o Jisu Karisito na Wai ni Bula kei na Madrai ni Bula, na ivurevure cecere ni inuinui kei na bula. (Raica na 1 Tui 19:1–8.)
“A nomuni vosa na cina ki na yavaqu,” a vola e dua na daunisame (Same 119:105). Ka vakadinadinataka o Maika, “Keu sa tiko ena butobuto, ena noqu rarama ko Jiova” (Maika 7:8). E vakananumi keda na nodra vosa ni o Jisu Karisito na Rarama kei Vuravura, ka tuberi keda lesu tiko ki na noda itikotiko vakalomalagi.

Ni o wiliwili, o na rairai raica eso tale na ka e vakananumi iko baleti Jisu Karisito kei na Nona rawata me vakabulai keda. Me vakataka, ni sa vakabulai mai na waluvu na matavuvale i Noa ena waqa se na gauna a soli kina vei Jona na gauna me veivutuni kina ni tiko ena loma ni tovuto. E rawa ni vakananumi keda na veika oqo ni sa rawa na tuberi keda curuma na cava ni bula na iVakabula ka solia vei keda na madigi eso meda tiko tale ena sala dodonu. (Raica Nai Vakatekivu 7:1; Jona 1:17.)

3. Na veitikina e parofisaitaka na sucu i Jisu Karisito.

Nikua eda sa nanamaki ka vakavakarau tiko ki nai Karua ni Lako Mai i Jisu Karisito. Ena sala vata oya, era sa nanamaki tu na parofita ni Veiyalayalati Makawa ka vola na veika baleta nai matai ni Nona lako mai, na gauna a sucu kina e vuravura. Me ivakaraitaki:

E dua na parofita na yacana o Pelami a vakamacalataka “ena vura mai e dua na Kalokalo mai vei Jekope” (Tiko Mai na Lekutu 24:17). Sa kena ibalebale oqo ni na sucu na iVakabula ena kawa i Jekope (se Isireli).
E dua na parofita na yacana o Necani a tukuna vei Tevita na Tui ni o Jisu Karisito ena dua vei ira na kawa i Tevita—ni na tauyavutaka nona kawa “nai tikotiko ni nona matanitu ka tawa mudu” (2 Samuela 7:13).
A vola na parofita o Aisea eso na ivakamacala kilai levu ena Veiyalayalati Makawa me baleta na iVakabula. Eso na nona vosa a vakayagataki me qaqa ni Messiah, nei Handel, ka dau lagati wasoma ena Siganisucu. (Raica na Aisea 7; 9; 40; 53.)

iVakatakilakila

wili ivolanikalou tiko na goneyalewa ena cina livaliva

Ni vakamatautaki, o na rawa ni raici Jisu Karisito ena loma taucoko ni Veiyalayalati Makawa ena yabaki oqo. Sa lomani iko vakatabakidua o Koya, me vaka Nona lomani Atama kei Ivi, Eroni kei Miriama³—kei na vuqa tale a qarava saraga o Koya ena veitukutuku makawa, veivakauqeti oqo. Ena vakabauti i Jisu Karisito, kei na noda veivuke vakai keda, oqo ena dua na yabaki vakasakiti ni vuli ivolanikalou!