“Vakararavi Vua na Turaga,” Me iSakisaki ni iTabagone, Janu. 2022.
Vakararavi Vua na Turaga
Sa sureti iko tu na Kalou mo vakararavi Vua ena ka kecega.
Eso na gauna ni yaco na veika dredre, eda vakananuma kevaka eda rawa ni nuitaka e dua, oka kina na Kalou. Eda ririko de na vakararawataki keda talega o Koya. Na itukutuku vinaka oya ni sa lomani keda vakavinaka sara na Kalou. Sa yalovinaka ka lomasoli ka yalodina o Koya. Sa tawaveisau ka nuitaki o Koya.
Ena vuku ni ka oqori, sa rawa ni da vakararavi Vua se cava ga e yaco. Na itoko ni itabagone ena yabaki oqo na “Vakararavi vua na Turaga” (Vosa Vakaibalebale 3:5–6).
Oqo eso na ivakaraitaki ni sala keitou a mai vakararavi yadua kina vua na Turaga na Mataveiliutaki Raraba ni Goneyalewa kei na Cauravou.
Michelle D. Craig
Bonnie H. Cordon
Rebecca Craven
Vakararavi ki na iNaki ni Kalou
Ni vo toka e vica na siga meu yabaki 16, a toki na noqu matavuvale ki na yasa ni vanua ka dua. Au vakasamataka ni sa gauna cala sara ga! Ni railesuvi, au sa raica vakamatata tu ni so na veivakalougatataki cecere baleta na neitou matavuvale kei au sara mada ga a yaco baleta na toki oya niu se gonetagane. Eda na sega beka ni kila vinaka na gauna na Turaga ena gauna oqo, ia eda vakararavi Vua baleta ni rawa ni da nuitaka na Yalona kei na inaki.
Michelle D. Craig
Vakararavi ki na Gauna ni Turaga
Ena vuku ni veikacivi i tamaqu vaka peresitedi ni kaulotu, au a ciqoma na noqu veikacivi vakaiau meu veiqaravi vakaulotu vakailiu mai na ivakatagedegede ni yabaki vakadaukaulotu ni goneyalewa. Sa kena ibalebale oya niu na curuma na koronivuli ni kaulotu ni bera na taurivola ena koronivuli torocake. Vei au, a sega ni vakaibalebale na kena gauna, ia au a ciqoma e dua na veivakadeitaki kaukauwa vakayalo meu vakararavi ga vua na Turaga. Au a cakava, ka totoka sara na veika e yaco.
Sai balebale ni vakararavi vua na Turaga na toso tu ki liu ena gauna mada ga e sega ni matata vakaoti kina na salatu.
Bonnie H. Cordon
Vakararavi Vua na Kalou ena Veigauna Dredre
Niu tubu cake tiko, a vakailesilesi tiko ena mataivalu o tamaqu. Na ka vakatuburarawa ga ni nona cakacaka oya ni na lako tu ki na ivalu. Au sa yabaki 13 ni sa biubiu o tamaqu me gole ki Vietnam enai karua ni gauna. Na ririko ni nona sega ni lesu tale mai sa dau tu ga ena noqu vakasama, ia sa vakakina na noqu vakararavi vua na Turaga. Ni bera ni biubiu, a solia vei au o tamaqu e dua na veivakalougatataki vakatama ka vakadeitaka vei au ni na tiko vata kei au na Turaga ka veivuke ena gauna e yali tu kina o tamaqu. Au a vakila na vakacegu. E dina ga niu sega ni vakadeitaka sara ni na lesu bula mai vale o tamaqu, au sa nuitaka ni na vinaka tu na veika kece, se cava ga e yaco.
Rebecca Craven
Ahmad S. Corbitt
Steven J. Lund
Bradley R. Wilcox
Vakararavitaki Iko Vua na Kalou
Niu sa lewena tu na Lotu vaka gonetagane, sa lomaqu sara meu solia na noqu bula, gauna, kei na yaloqu kivua na Turaga. E dina ga ni a vakarerevaki vakalailai na mataqali yalayala tudei vakaoya, au kila ni sa dodonu. Au vakila ni vinakata na Tamaqu Vakalomalagi na ka oqo vei au, kau kune vakacegu niu cakava. Au sa marau vakalevu niu digitaka meu vakararavi vua na Kalou ka laiva me lewa ga o Koya na noqu bula. Au vakadeitaka ni kevaka au a vakararavi ga ki na noqu kilaka, ena sega ni vutuniyau sara na noqu bula ena reki, bula marau, kei na vakacegu.
Ahmad S. Corbitt
Vakararavi ki na Veivakauqeti ni Turaga
Ni oti noqu kaulotu, au a vakauqeti meu lewena na mataivalu ka sega ni lesu tale ki na koliji. Oqo na iotioti sara ga ni ka au via cakava! Au a veilecayaki tu, ia au sa vulica meu vakararavi vua na Kalou, kau sa kunea vakarauta tu na vakabauta meu rogoci Koya ka talairawarawa. Au a sotia tu me tolu na yabaki.
E vuqa na ka vinaka ena noqu bula sa vu mai na vakatulewa oya, oka kina na sotavi ni watiqu.
Steven J. Lund
Vakararavi ki na Veivakauqeti ni Kalou mo Cakacakataka Oqo
Ni oti noqu vakatavulica na kalasi ono me tolu na yabaki, au vakila ke meu veivakatavulici me va tale na yabaki, ena sauma vakatikina na tikina ni koronivuli na noqu icurucuru meu taura na noqu koroi ni masita. Sa vaka toka e dua na ituvatuva vinaka—me yacova ni sa vakauqeti au na Yalotabu meu biuta na noqu cakacaka ka lesu tale ka taura na noqu koroi ena gauna o ya. A vakauqeti vaka talega oya na watiqu, ka keirau toso ki liu. Sa kena ibalebale ni keirau na sauma ga na neirau icurucuru ni vuli. Ia baleta ni keirau sa cakava, au a vakacakacakataki meu veivakatavulici e BYU—Provo. Ena sega tu ni a dolavi na katuba leka ni madigi oya ke keirau a wawa me va tale na yabaki. Keirau sega ni kila tu na veika ena yaco, ia sa dusimaka na Turaga na neirau salatu me vaka ga sa yalataka.
Bradley R. Wilcox