“Vakadrukai na iVadi Ca nei Setani,” Me iSakisaki ni iTabagone, Janu.2022.
Lako Mai, Mo Muri Au
Vakadrukai na iVadi Ca nei Setani
Sa cakava o Setani na ka kecega e rawata me cavilaki keda kina. Vakavinavinaka ni sa tiko vei keda na veivuke vakalou me levei kina na nona dai.
Sa vakacaliditaka na nona iqaqalo e dua na daucakaiba ka yali vakasauri e dua na polo e matai keimami.
Veivakurabuitaki!
A qai dreta mai e dua na ravete mai na dua na isala balavu lala ka cakava e dua na ka e rairai me vude cake.
Oilei! E cakava vakacava?
Era sa mataitaka na daucakaiba na sala me ra vakabauta kina na tamata ni ra sa vakadinadinataka tu e dua na ka e sega ni rawa ni yaco, ia na ka dina, era sa raica walega na ka e vinakata na daucakaiba me ra raica.
Donu vinaka! Era sega ni varota veimama dina tu na daucakaiba na nodra ivukevuke. Era sa raica na sala matai eso me lawakitaki keda ni nanuma eda sa raica e dua na ka e sega ni yaco dina tu. Na ka vuni e koto ena veivakayarayarataki kei na veicavilaki.
Ni sa caka kece tu oqo me lasa ka veivakamarautaki, na veimataqali veivakayarayarataki kei na veicavilaki tale eso e sa rerevaki—vakayago ka vakayalo talega.
Dua na Dauveivakayarayarataki ka Dauveicavilaki Rerevaki
O Setani sa meca ni ivalavala dodonu kecega ka sega ni vinakata e dua me muria na Tamada Vakalomalagi kei Jisu Karisito. E vinakata o koya me da bula rarawa me vakataki koya (raica na 2 Nifai 2:27).
Me rawati oqo, sa cakava o koya na veika kece e rawata me da vakataroga se vakawalena kina na dina tawamudu. Sa cakacaka vagumatua o koya me vakasevai keda ni ka vinaka sa ca kei na ka ca sa vinaka (raica na Aisea 5:20). Oqo na vuna sa kilai tu kina o koya ena so na gauna me tama ni lasu kei na dauveicavilaki levu (raica na Mosese 4:4). Ka sa cakava tiko oqo o koya ena dua na gauna balavu sara.
Na Lutu
Ena Were o Iteni, a tukuna na Kalou vei Atama kei Ivi me rau kakua ni kania na vuata mai na vunikau ni kila na vinaka kei na ca. Kevaka rau cakava, rau sa na biuta na Were ko Iteni ka na mate vakaidina. Ia sa kaya na Kalou ni sa rawa me rau lewa ga (raica na Mosese 3:16–17).
Sa vinakata o Setani me vakarusa na ituvatuva ni Kalou. A tovolea ena nona temaki Ivi me kania na vuanikau vakatabui. A lasu o koya ka kaya ni na sega ni mate o Ivi (ka sa veisaqasaqa sara ga kei na ka a kaya na Kalou). A tukuna talega vua na dina veimama (raica na Mosese 4:11).
E muri, sa kania ruarua o Atama kei Ivi na vuanikau ka rau sa vakasavi tani mai na iserau ni Kalou. Sa vakatoka oqo na ivolanikalou me “mate vakayalo.” Sa yaco talega me rau tamata, ka kena ibalebale ni rau na mate vakayago. Sa vakatakilai oqo na Lutu.
Ni da sa kawa i Atama kei Ivi, o keda talega, sa vakatikitikitaki mai na iserau ni Kalou ka da na sotava na mate vakayago. Eda sa vakatovolei talega ena veika dredre ni bula kei na veitemaki i Setani.
Sa vaka toka me rogorogo ca oqo, ia na Lutu e sa dua na tiki bibi ni ituvatuva ni Tamada Vakalomalagi. E solia vei keda na madigi meda vuli ka tubu ena vakayagataki ni noda galala meda digitaka na caka vinaka. Ia ena vuku i Jisu Karisito kei na Nona Veisorovaki, sa rawa ni da veivutuni ni da valavala ca ka vakarau tu ni ciqoma na bula tawamudu. Na ka kece sara sa yaco ena Lutu, sa vakadodonutaka o Jisu Karisito. E sega ni tarova o Setani na ituvatuva ni Kalou.
Vakadrukai na iVadi Ca nei Setani
Sa tomana tiko nikua o Setani me lawakitaki keda ka cavilaki keda. Oqo e vica na sala e cakava kina:
1. Veitemaki
E taleitaka o Setani me biuta na vakanananu tawasavasava kei na yaloca ena noda ilakolako. E vinakata tu na veika oqo me curuma noda vakasama ka yaco meda cakacakataka. Eda rawa ni vorata na veitemaki oqo ena noda tukuna vei Setani me lako laivi (raica na itukutuku i Elder Stevenson ena tabana e 4). E dua na noda itataqomaki levu duadua mai na veitemaki oya me da masu tikoga (raica na Alama 13:28; 3 Nifai 18:15). Eda rawa talega ni wilika ka vulica na ivolanikalou. Era kauta mai na Yalotabu ki na lomada, vakadeitaka vei keda na ka dina, ka vaqaqacotaki keda mai na veitemaki muri mai.
2. Lasu kei na Veicavilaki
Eso na gauna dau tukuna vei keda o Setani na veika vakaoqo: “O sega ni cakava tu e dua na ka dodonu,” “O sa valavala ca vakalevu mo vosoti kina,” “Sa sega ni rawa mo veisau,” se “O sa tawayaga ka sega ni dua e kauwaitaki iko vakaidina.”
Oqo na veilasutaki. Kakua ni vakabauti ira! Oqo na ka dina: sa lomani iko na Kalou ka rekitaki iko baleta ni ko sa Luvena. O sa veivakurabuitaki! E levu na ka o rawa ni rawata, ia ni ko muri koya, sa ramase na nomu veisiga ni mataka! Ena gauna mada ga o caka cala kina, sa rawa ni ko vakanuinui tikoga ka, vata kei Karisito, vukica lesu na veika.
Sa rawa ni o nuitaki Setani tu ga me lasutaki iko. Sa rawa talega mo nuitaka na Yalotabu me tukuna tikoga vei iko na ka dina (raica na Jekope 4:13). Oqori e dua na vuna sa bibi kina me da segata me tiko ga kei keda na Yalotabu.
E rawa talega ni da kila ka vorata na veilasutaki i Setani ena wiliki wasoma ni ivolanikalou kei na nodra itukutuku na iliuliu ni Lotu. O rawa ni raica na ivolanikalou se qaqanivosa veilaveti eso me vakananumi iko ena veidina e vorata na veilasutaki i Setani. Sa rawa ni o cavuqaqataki ira se biuta ena dua na vanua o na raica wasoma kina.
3. Yaluma
E dau taleitaka o Setani ni da yalolailai. E vinakata o koya meda vakabauta na cava ga e vakalolovirataki keda tiko sa na vaka tu ga kina. Ia e sega ni dina tu oqori.
A vakatavulica o Elder Jeffrey R. Holland ena Kuoramu ni iApositolo Le Tinikarua ni vinakata tu o Setani me da vakabauta oqo baleta “Ni kila tu o [Setani] ni sega ni rawa vua me cakavinaka, e sega ni rawa vua me toso ki liu, ki na vuravura tawayalani ena sega ni rawata o koya e dua na mataka serau. Sa tamata rarawa sara o koya ka sa yalani tawamudu tu, ka sa vinakata mo vakararawataki talega. Ia, kakua ni rawai kina.”1
Sa vinakata na Tamada Vakalomalagi kei Jisu Karisito mo bula marau. Kevaka eda gole vei Rau, sa rawa ni Rau vukei keda ni vosota na veivakatovolei ka kunea na vakacegu kei na reki.
Eda Sa Kila o Koya e Qaqa ena iVakataotioti
Sa sureti keda na iVakabula meda, “vakararavi tiko mai vei [Koya] ena vakasama kece; kakua ni vakatitiqa, ka kakua ni rere” (Vunau kei na Veiyalayalati 6:36 Ni da muria na veisureti oqo, na Nona loloma soliwale kei na kaukauwa ena qaqaco cake tikoga mai na sasaga eso i Setani me cavilaki keda. E sega ni dodonu meda rawai tu ena ivadi ca i Setani. Sa rawa ni da yaloqaqa ka qaqaco tu ni ulabaleta na veitemaki i Setani ka vosota na veibolebole ni bula.
Me Kakua ni Rarawa na Lomamudou, mai vei Howard Lyon
Sa kaya na iVakabula, “Oi au na rarama kei vuravura: ko koya sa muri au ena sega ni lako ena butobuto, ena tu ga vei koya na rarama ni bula” (Joni 8:12). A kaya talega o Koya, “Dou na kunea e vuravura na rarawa: ia mo dou vakacegu; au sa vakamalumalumutaki vuravura” (Joni 16:33
Sa rawa ni laveti keda cake o Jisu Karisito ka vaqaqacotaki keda mai na ivadi cava ga e saga o Setani me vakayagataka vei keda. Ni da nanuma na iVakabula kei na Nona ivakavuvuli, sa rawa ni da rai curuma na lawaki kei na veilasutaki i Setani ka raica na “veika me vaka na kena ituvaki dina” (Jekope 4:13).