“Noda iDusidusi ki na Dina,” Me iSakisaki ni iTabagone, Janu. 2022.
iOtioti ni Vosa
Noda iDusidusi ki na Dina
Mai na dua na vosa ena koniferedi raraba ni Okotova 2004.
Droini mai vei Emily Davis
Mai na nomu itutu ena gaunisala ni bula, sa vuqa tu na maile mo lakova ka vuqa na digidigi mo cakava ni o segata mo lesu tale kivua na Tamada Vakalomalagi. Sa vuqa na ivakatakilakila ena gaunisala e kauwai. Sa vu ni veisureti eso oqo o Setan. Sa qara o koya me vakasevai ka cavilaki keda, me kauti keda ki na gaunisala lolovira e muataki keda tani mai na noda icavacavatawamudu.
Au gadreva meu wasea na sala o rawa ni levea kina na veicavilaki. iMatai, o sa vakavulici tu ena buladodonu ka vakadeitaki ena kena dina, mo tiko ga kina. Tautauri matua ki na ivolanikalou, na kena ivakavuvuli sa taqomaki keda mai na veika butobuto. iKarua, e sega ni rauta na kena ciqomi tu na dina. Sa dodonu meda taura talega “na Yalo Tabu me [noda] idusidusi” ka “sega [ni] rawai” (Vunau kei na Veiyalayalati 45:57).
Eda na taura vakacava na Yalo Tabu me noda idusidusi? Sa dodonu me da veivutunitaka na noda ivalavala ca ka vakavouia na noda veiyalayalati ena vakayagataki ni sakaramede e veimacawa ena liga savasava kei na yalo savasava. Oqo duadua ga na sala eda rawata rawa kina na yalayala vakalou ni na “tiko ga kina kei [keda] na Yalona” (Vunau kei na Veiyalayalati 20:77). Na Yalo sai koya na Yalo Tabu, ka sa nona ilesilesi me vakadinadinataka na Tamada kei na Luvena, me vakavulici keda, ka tuberi keda ki na dina.