“E Dua na Idinia ni Reki,” Me iSakisaki ni iTabagone, Janu. 2022.
E Dua na Idinia ni Reki
Na cauravou oqo mai Jamani e sa kunea na kilaka, totoka, kei na reki ena veimataqali vanua kecega—ia ni sa kunei ira, e wasea yani.
E cakacaka tiko o Patrick ena nona idini ni motoka.
iTaba mai vei Julian Klemm
E kaya o Patrick L., 16, mai Bavaria, Jamani, ni nona ulutaga taleitaki e koronivuli na fika, fisiki, kei na kemisitiri. Na ka dina, e taleitaka sara vakalevu na vakadidike ka vinakata me wasea vei ira tale eso ena nona vola e dua na ivola me baleta na fisiki (ena cemodainamiki kei na meqeneti, ena kena matata).
E vinakata o koya me cakacaka vakaidinia, ena vakatorocaketaki ni iyaya vakamisini me vaka na idini ni motoka. (Ia, na itikotiko liu ni cakaidini na BMW kei na Audi e sa dua ga na auwa ka dua na auwa veimama mai na vanua e vakaitikotiko kina o koya.)
Ia na vakadidike e sega ni vanua duadua ga e kunea kina o Patrick na veivaqaqacotaki, kei na veika taleitaki.
Vakadidike kei na Tatadra
Io, o Patrick e taleitaka sara na vakadidike, ia na nona gagadre e uasivia tu na veika e baleta na ka dina sara kei na fomula.
“Au sa vola e dua na ivola ni fisiki, ia oqo au sa cakava tiko e dua na ivola ni tatadra,” e vakamacalataka o koya. “Na ivola au vola tiko e sa baleti ira na manumanu tawakilai kei na nodra vuravura. Ka sa tiko ga e vica na tamata gone ka walia na leqa eso.”
Na cakacaka vou oqo a vakauqeti mai na nona taleitaka tu o Patrick na ivola ni tatadra eso me vaka na vola veitaravi ni Harry Potter kei na Percy Jackson . Na volai ni vola e yasana e dua na ka a vakayacora o Patrick ni tukuna oti vua o nona momo na levu ni kena lasavi tu. “A uqeti au o koya ena nona reki,” e kaya o Patrick.
Na reki veivakauqeti oya a vakavuna me taura o Patrick na veika sa vulica me baleta na lawa kei na veika dina ni vuravura vakayago ka vola e dua na ivola baleti ira. A vinakata talega o koya me bulia e dua na italanoa ni tatadra totoka. Ka sega ni dua na veisaqasaqa ena ka oqo. Sa vaka e kila tu o Patrick na dina kei na totoka kei na reki e rawa ni laurai ena vuqa na vanua. Ka sa vinakata me kunea, bulia, ka wasea na veika oqori ena vanua cava ga era tu kina.
Na Vuravura Vakayago
E kila vinaka tu o Patrick na veika lelevu baleta na lawa ni vuravura vakayago. Ia sa raibaleta talega o koya na veika dina me raica na ka totoka e kea.
“Au tiko volekata na veikau,” a kaya. “Oqori e dua na ka e vinaka kina na vakaitikotiko ena dua na tauni lailai—o rawa ni gole vakatotolo ki na veikau ka kunea na vakacegu ekea.”
E taleitaka na salatu e vuqa ni veikau me taubale kina se, vakabibi, vodo basikeli. “Au taleitaka na vodo basikeli. Sa dua na qito taleitaki vei au,“ a kaya. “Au dau vodo basikeli vakalevu. Dua na gauna au a vodo basikeli me 1,200 na kilomita [745 na maile] ena rua na macawa. ”
Na vakadidike e sa vakauqeta na vakasama nei Patrick, ka vakauqeta na yalona na masu. “Sa kaukauwa na noqu ivakadinadina baleta na masu,” a kaya. “O rawa ni vosa vei [Tamada Vakalomalagi] ena veivanua kecega.”
Ena so na gauna e dau taleitaka na taubale se vodo basikeli ena veikau vata kei na nona matavuvale taucoko (Na, Ta, rua na tacina gone, kei na rua na ganena gone) se vata kei tamana ga. Vakavuqa nona dau lako ga vakataki koya. Ia e dau kunea o koya na vakacegu kei na totoka ena veika bula.
“E totoka dina tu eke na cadra mai ni matanisiga,” a kaya. “Eso na gauna o rawa ni raica eke na Alps dina ga ni ra tu vakayawa sara. Ia ni sa cadra mai na matanisiga, e sa makualiliva, vata kei na veiulunivanua, o raica na maliwa damudamu oqo, ka sa totoka dina.”
E Dua Tale na Mataqali Kilaka
Me ikuri ni dina ni vakadidike vakayago kei na totoka ni veika bula ni vuravura, e vakabibitaka talega o Patrick na dina—na mataqali dina e rawa ni kune duadua ga ena masu.
“E kaukauwa na noqu ivakadinadina baleta na masu,” e kaya o Patrick. “Tekiduru sobu, roqota na ligaqu, vakacegu ka vakanomodi, ka qai masu tu. Oqo na ivakadinadina cecere duadua sa tu vei au.”
A vakamacalataka ni dau lako mai vakatikina na nona ivakadinadina mai na dua na ka a cavuti vua ena nona veivakalougatataki vakapeteriaki. “E kaya ni dodonu meu dau nanuma tikoga ni Tamada Vakalomalagi ena voleka mai niu masu,” a kaya. “O rawa ni vosa Vua ena veivanua kecega. E tiko o Koya baleti iko ena veivanua kecega, ka rawa ni o rawata na isaunitaro ena veivanua kecega.”
Na ka e sotakaya ena ciqomi ni sau ni masu e sa vakalevutaki, a kaya, ni dau cavuikalawa tu. “Au vakila vakaukauwa sara na Yalo Tabu ena so na masu. Niu dau lalawaka vagumatua, taro vagumatua, dabe sobu vagumatua ka cakacaka me vaka e tukuni ena ivolanikalou, ka wawa ka vakavure gauna—niu vakayacora rawa oqori, e dau tu ga na noqu ivakadinadina kaukauwa ka vakila na Yalo Tabu.”
E nanuma o Patrick e dua na gauna a cabora kina e dua na masu qaqa. “Keitou dau veitalanoataki Josefa Simici vakalevu kei na gauna a masu ka ciqoma kina e dua na isaunitaro ni se qai yabaki 14,” e kaya. “Kau mani dabe sobu—au a gole sara madaga ki na veikau—kau masu. Kau a ciqoma na kena isau. Au a qai marau. Ka sa vaqaqacotaka na noqu ivakadinadina.”
Wasea na Veika e Kila o Koya
Me vaka ga na nona segata me wasea na nona kilaka ni vakadidike kei na nona tatadra buli, sa segata talega o Patrick me wasea na nona kilaka vakayalo.
Vakatekivu ena yabaki 12, sa vakayagataki gauna tu o koya ena nodra vukei na daukaulotu tudei. A sureta talega e dua na itokani ki na nona vale me ciqoma na lesoni ni daukaulotu. “Keitou a veivosakitaka na Veivakalesuimai. A taleitaka sara o koya. A vakarorogo vakavinaka ka vakaitavi ka wilika na ivolanikalou. Keitou a wilika na Jemesa 1:5, ka a wilika talega o Josefa Simici. Kau solia vua me wilika na Josefa Simici—Ai Tukutuku. E a gumatuataka sara o koya.”
Era sa doka na nona vakabauta na nona lewe ni kalasi e koronivuli. “Era a sega ni vakacacana na Lotu, era sa tokona,” a kaya. Na nona qasenivuli mada ga ena kalasi ni lotu ni nona koronivuli e sa tokoni koya. “E nanuma o koya ni sa ka vinaka noqu vakabauta na Kalou ka vukei au sara mada ga meu rawata na noqu lalawaka.”
Ni sa vakacavara na nona vuli ka rawata na vuli ena univesiti, sa navuca talega o Patrick me laki kaulotu tudei. “Au na rairai vakarau tu ena wiliki ni Vunautaka na Noqu Kosipeli,” a kaya. “Au na via toka dei ka wiliwili, cakava na lesoni eso, ka vakayagataki gauna vakalevu talega kei ira na daukaulotu.”
E taleitaka o Patrick me cakacakataka na nona tatadra. E vola tiko mada ga o koya e dua na ivola ni tatadra.
iTukutuku Rogorogo Vinaka
Sa vulica o Patrick ni vuqa na ka e tu e vuravura e sa “savasava, totoka, se rogorogo vinaka, se daudokai,” ka sa vakasaqara tu o koya na veika oqo (Yavu ni Vakabauta 1:13). Ia ni sa kunei ira, e wasea tu.
Se ena vakadidike, tatadra, se ituvaki bula, sa kunea o koya na kilaka taleitaki kei na totoka cecere ena vanua cava ga e gole kina. Ka sa kunea o koya na kilaka cecere duadua, totoka, kei na dina ena nona veimaliwai kei na Tamada Vakalomalagi kei Jisu Karisito.