“Na Veivakayarayarataki ni Dua na iTokani,” Me iSakisaki ni iTabagone, Janu. 2022.
Na Veivakayarayaratakini Dua na iTokani
A dredre na noqu yabaki vakaitabagone, ia a tala mai na Kalou e dua na itokani me vukei au kina.
Droini mai vei Judy Bloomfield
Au dau vakila tu ga na bula galili e vuravura. Rau a veisere na noqu itubutubu niu se gonedramidrami, ka oti e vica na yabaki sa vakawati tale o tinaqu ka keitou toki me 4,000 na maile, mai Georgia, Amerika, ki Oregon, Amerika. Sa dua dina na veisau levu vua e dua na yalewa yabaki ciwa me ciqoma, vakauasivi e dua ena ivosavosa ni ceva ka sega ni ciqomi vakataucoko mai vei ira na vo ni gone.
Niu sa toso cake ki na koronivuli e loma, au sa sotavi Nicole.* Totolo sara, noqu vakila e dua na ka vinaka, ka veivakacegui me baleti koya—e dua na ka au sa calata tu mai. Au kila ni sa dodonu meu veitokani kei na goneyalewa oqo!
Ni keirau lako vata vakalevu, sa yaco o Nicole me dua na idrodro tani mai na noqu bula galili. Na curumi ni nona itikotiko e sa vaka na curumi ni dua na bula veisau vakaoti: sa vakatawana na yasa kecega na Yalo ni Kalou. Era tu kina na iyaloyalo ni iVakabula kei na veivale lelevu ena veivanua kecega. (Au qai kila e muri ni ra valetabu.) Sa tekivu na cakacaka vakaulotu i Nicole ena nona sureti au tu, ka sega ni kila mada ga o koya.
Veitokani ka Vakabauta Tu
A qaravi au o Nicole ena nona vakaitokanitaki au. A solia vei au o koya na iVola i Momani, ka keirau tekivu wiliwili vata ena nona motoka ni oti na vuli.
Sa tekivu me vakatawana na luluqa ni noqu bula na iVola i Momani. Ia au se vakila ga na galili. Au a sega ni lewena ni lotu i Nicole, ia au a sega talega ni tiki vakataucoko ni nodrau lotu na noqu itubutubu.
A vakauqeti au ena yalovinaka o Nicole meu masu ka kerea vua na Kalou kevaka e dina na iVola i Momani. Au se bera mada ni bau masu e cake, kau sega ni kila tu na ka e dodonu meu tukuna. Ia au a lako ga ki tautuba ka tekivu vosa. Au a taroga na Kalou ke sa lotu dina talega me baleti au na lotu i Nicole. Ni oti ga na noqu taro, au sa vakila na batabata vakataucoko na yagoqu. Au kila, ka sega tu ni vakatitiqataka, ni sa dina na iVola i Momani ka sa donu vei au na Lotu oqo.
Au sa yabaki 15 niu ciqoma na vakadinadina oqo. Ena vica na yabaki ka tarava au sa vakabauta, dina ga ni rau sega ni maleleta tu na Lotu na noqu itubutubu. Ia au a sega ni tiko duadua ena noqu vakabauta, baleta ni se tokoni au tikoga o Nicole.
Vakabauta Vou, Taro Vou
Ni oti noqu taurivola ena koronivuli torocake, au a toki tu ki Utah, Amerika. Sa tiko oti mai kina o Nicole, ka sa nanamaki tu ena waraki au meu yaco ki kea me rawa niu tekivu taura na lesoni ni kaulotu. Sa noqu ituvatuva meu na papitaiso enai ka 19 ni noqu siganisucu—vo toka e ono na macawa—ka vakadeitaka vei au o Nicole ni na tiko vata kei au ena gauna taucoko.
Ni rau sa tekivu vakavulici au na daukaulotu, au sa vakila na lailai ni ka au kila dina tu me baleta Lotu. Au sa wilika ka taleitaka na iVola i Momani, ia vakasauri rau sa tukuna tiko vei au na isolisoli ni Yalo Tabu, na ituvatuva ni veivakabulai, vakataka tu na Kalou, kei na vuqa tale na ka vou. Sa levu sara ga na ka meu tugana kece ena dua ga na gauna.
Ia sa kilai au vinaka o Nicole. Ena veivuke o koya me vakamacalataka na ka erau vakavulica tiko na daukaulotu ena sala e kila o koya niu na kila vakavinaka. Enai matai ni veilesoni oya, na nona ivakamacala malumu sa vuna na noqu tiko.
Vakataukeitaki Vakaoti
A tokoni au vakayalo tu vakaoya o Nicole me yacova na siga au a papitaiso kina—vakakina ni sa oti. A vukei ira na lewe ni tabanalevu kei rau na daukaulotu o koya me rawa niu papitaiso enai ka 19 ni noqu siganisucu. Niu sa cabe mai wai ka raica na nodra matadredredre tu vei au e vuqa na tamata, au sa tawavakila saraga na galili. Au na sega ni guilecava na yalo oya niu sa mai nona tu na Turaga kei na Nona Lotu.
Au se vuli tikoga mai na vakabauta kei na veitokani tudei i Nicole. A vakaraitaka vei au o koya mai na itekivu ni cakacaka vakaulotu e sega ni gadrevi kina e dua na ivakatakilakila ni yaca. Na cakacaka vakaulotu i Nicole a tekivu e lomana, ni a sudra yani kivua e dua na goneyalewa ni ceva ka gadreva tu na matadredredre.
O dauvolaivola e vakaitikotiko e Utah, Amerika.