Taro kei na Kena iSau

“E sega soti ni levu na ka au tautauvata kina kei ira na noqu ilawalawa ni itabagone. Ena rawa vakacava meu sema vakalevu cake vei ira?”

“Eda sa luvena vakayalo kece na Tamada Vakalomalagi, sa yaco kina, meda sa veitacini ka veiganeni. Ni da nanuma tiko ga na dina oqo, ena rawarawa cake na noda lomani ira kece na luvena na Kalou.”

Peresitedi Thomas S. Monson (1927–2018), “Loloma—na Uto ni Kosipeli,” koniferedi raraba ni Epe. 2014 (Ensign se Liaona,, Me 2014, 91).

Sudra Yani Vei Koya

goneyalewa

“Au vakila niu sema vakalevu cake vei ira eso tale niu saga saraga meu tiko yadua kei ira, sega walega vakailawalawa. Kevaka o vinakata mo kunea e dua mo veimaliwai vata kaya, sudra yani vua e dua e vaka e gadreva tu e dua na itokani. Ena rairai rawa mo na vinaka cake kina o iko maivei ira!”

Latyanna P., 17, Singapore

Wasea Na Veika o Taleitaka

goneyalewa

“E vuqa na tamata ena noqu ilawalawa ni itabagone e duidui na ka era taleitaka. Au vinakata meu tarogi ira baleta na veika era taleitaka baleta oqo na vakaraitaka niu kauwaitaki ira. Ka na solia talega na madigi vei ira me ra taroga talega na veika au taleitaka. Na veisemati kei ira na tamata ena taura na gauna—tomana tiko!”

Erin F., 18, Utah, Amerika

Vaqara na Veika Mo ni Tautauvata Kina

goneyalewa

“Kevaka o vinakata me veivolekati na nomu veimaliwai kei ira na nomu ilawalawa vakaitokani, vakasaqara na veika vinaka, ka vakaibalebale e rawa mo ni cakava vata, kevaka mada ga e lailai sara. E rawa mo ni vakasaqara e dua na ka taleitaki se vakaoti gauna o ni marautaka kece. Kerea na veivuke mai vua na Tamada Vakalomalagi, ka na vakauqeti iko o Koya.”

Carla V., 12, Peru

Vakavinavinakataka na Nomuni Duidui

goneyalewa

“Na levu ga ni gauna au vakayagataka vata kei ira na noqu ilawalawa ni itabagone, na levu ni noqu taleitaka na veika e duatani baleti ira! Au sa vulica na ivakarau meu qaravi ira vakavinaka cake kina, ka vukei au meu toro voleka yani vei ira kei Jisu Karisito. Eda sa luvena kece na Tamada Vakalomalagi, ka sa levu cake na ka eda tautauvata kina mai na ka eda nanuma.”

Sarah M., yabaki 16, Oregon, Amerika

Tovolea na Veika Vou

cauravou

“Mo dau veiyaloni vinaka ka vosa tikoga vei ira. Tovolea tikoga na veika vovou me veisotari vakalevu cake. E dua na gonetagane ena neitou tabanalevu e sega ni taleitaka na qito, ia e dau qito vata kei keitou. Oti keimami a qai cakava na veika e taleitaka o koya, me vaka na ilawaki ni cakaiba se kolotaki imau. Na tovolei ni veika vovou sa dua na sala vinaka me vakilai kina na veisemati.”

Jarren M., 17, Nova Scotia, Kenada

Na vakasama eso e nakiti me veivuke ka vagolea na noda rai, sega ni itukutuku raraba kaburaki ni ivakavuvuli ni Lotu.

Sudra Yani

“Sudra yani ka vukea e dua ena nomu ilawalawa itabagone e gadreva tu na veivuke. Ni da saga meda ivakaraitaki ni nona loloma na iVakabula, ena vukei keda meda veisemati cake vakai keda.”

Joshua C., 20, Faleniu, American Samoa

Bula Vakai iKo

“Ni toso na gauna o na kunea beka eso na ka o tautauvata kina, ia e rairai sega beka ni yaco sara vakatotolo. Ena gauna oqo, sa rawa mo veisemati ena itaviqaravi kei na veika e dau yaco ena loma ni macawa. Marautaka na itaviqaravi! Digia mo vakaitavi, ka mo bula vakai iko!”

Hannah W., 18, Nova Scotia, Kenada

Na Cava Na Nomu Nanuma?

“Ena so na gauna au nanuma ni rau sa dau vakalewai au vakalevu na noqu itubutubu. Meu na sauma vakacava ena vakarokoroko?”

Vakauta mai na nomu isaunitaro kei na itaba ni bera nai ka 15 ni Feperueri, 2022.

Gole ki na ftsoy. ChurchofJesusChrist.org ka tabaka na “Submit Your Work.” Curu ena nomu Akaude ni Lotu ka digitaka na “For the Strength of the Youth” ena ruku ni “Choose Magazine.” Tabaka na “Add File” mo digitaka na nomu faile kei na itaba, ka qai tabaka na “Submit” mo lavetaka ka vakauta mai na nomu faile. Se imeli mai ena [e-mail]

Ena rawa ni moici na nomuni itukutuku me baleta na kena balavu se kena matata.