“Au Kila na Kequ Yaga,” Me iSakisaki ni iTabagone, Janu. 2022.
Na iToko kei Au
Era wasea na itabagone na sala era sa bulataka tiko kina na vosa ni iToko ni Goneyalewa kei na Kuoramu ni Matabete i Eroni
Au Kila na Kequ Yaga
“O au sa dua na luvena yalewa lomani na noqu itubutubu vakalomalagi.”
iTaba mai vei Christina Smith
Ena vuqa na yasai Jamaica, o ira na gonevuli vakataki au sa dodonu mera taura e dua na veitarogi mera rawata na koronivuli torocake era vinakata. Au a vuli vagumatua kei ira na noqu itokani me rawa ni keimami rawata kece na koronivuli torocake vinaka duadua. Niu sa tekivu vakatitiqataka niu na rawata, sa dau vakayaloqaqataki au o tinaqu. A vakananumi au o koya ni o au e dua vei ira na luvena na Tamada Vakalomalagi ka na vukei au o Koya meu muria na sala dodonu.
Ni sa yaco mai na macala ni noqu veitarogi, au a rawata na maka levu duadua au rawa ni yacova! Au sa marau saraga baleta ni sa rawa meu na tiko vata kei ira kece na noqu itokani!
Ia au qai kila ni dua vei ira na noqu itokani a sega ni vinaka sara na nona maka. Keimami sa rarawa kece sara ni sa sega ni rawa me lako vata kei keimami. Ia au sa kune marau ena nanumi ni ka a vakavulici au kina o tinaqu. Na noqu itokani e sa dua talega na luvena yalewa totoka na Tamada Vakalomalagi, ka na vukei koya talega o Koya, se cava ga na maka ni veitarogi.
A seyavu na noqu marau ni sa tekivu tukuna na noqu itokani vei ira kece ni sega ni dodonu meu gole ki na koronivuli torocake o ya—ni sa dodonu o koya me curu kina. E levu na noqu itokani a totaki koya ka sega ni malele vata kei au. Au sa tekivu vakatitiqataki au. E sa dodonu beka meu vakacurumi?
Au vakasamataka lesu na ka a vakavulici au kina o tinaqu: niu sa dua na gone vakasakiti ena ituvaki ni Tamada Vakalomalagi.
Au sa tiko oqo ena koronivuli vou, kau sa mai veitokani vou. Era sa tokoni au ka vakananumi au ena kequ yaga. Au sa vulica ni sega tu na betena na ka era tukuna na tamata tale eso me baleti au. Au marau niu sa tovolea tiko meu vakataki koya e vinakata na Kalou meu vakataka—baleta oya o koya au vinakata meu vakataka.
O dauvolaivola e vakaitikotiko e Jamaica.