“O Le Fuafuaga o le Fiafia a le Atua ma Lou Faasinomaga Paia,” Mo le Malosi o le Autalavou, Ian. 2022.
O Le Fuafuaga o le Fiafia a le Atua ma Lou Faasinomaga Paia
O le malamalama ma le ola e tusa ai ma le fuafuaga o le fiafia e mafai ai ona e ausia lou faasinomaga paia.
Ata na tusia e Albert Espí
O le a le mea e oo mai i lou mafaufau pe a e mafaufau i le upu faasinomaga? Pe e te mafaufau i se mea na muai filimaotiina ma e le maalofia? Se mea leaga matautia pe matagofie e le mafai ona suia e tusa lava po o a mea e te faia? Pe atonu e te mafaufau i le toa i se tifaga po o se tusi, o le sa atofaina e faamaea le sailiga, laveai le lalolagi, pe avea ma tupu po o le masiofo?
Atonu e ioe lomifefiloi i na faaliliuga; peitai, pe a tatou talanoa e uiga i le faasinomaga paia, e ese so tatou faauigaina. E le pei o le faasinomaga e te faitau i ai i tusi pe vaai i ai i ata tifaga, o le ausiaga o lou faasinomaga paia e mafai ona o oe o se atalii/afafine o le Atua, ae e manaomia ai foi lou faaaogaina o lou faitalia.
E i ai i le Atua le mana uma i le lagi ma le lalolagi. O feagaiga tatou te osia ma lo tatou Tama Faalelagi ua faatagaina ai o Ia e avea ma a tatou paaga a o tatou savavali i afa o le olaga. O lo tatou faasinomaga paia—lo tatou gafatia pe a tatou faipaaga ma le Atua—ua mafai ona o Lana fuafuaga o le fiafia.
O le malamalama i le fuafuaga a le Tama Faalelagi mo lou fiafia o le a mafai ai ona e iloa lou faasinomaga ma le faamoemoega e faavavau. Ma o le filifili e osia ma tausia feagaiga ma le Atua o le a mafai ai ona e ausia lena faamoemoega.
I le tusi a Mose tatou te faitau ai e faapea “sa segia a‘e Mose i se mauga maualuga lava, ma sa vaai faafesagai lava o ia i le Atua, ma sa talanoa o ia ma ia” (Mose 1:1–2). E ala mai i lenei asiasiga patino, na aoaoina ai e le Atua ia Mose e uiga i lona faasinomaga e faavavau. E ui o Mose sa i le faaletino ma lē atoatoa, ae sa ia aoaoina se mea taua e uiga ia te ia lava: o ia moni lava o se atalii o le Atua (tagai Mose 1:6).
Manatua Pe O Ai Oe
E manao Satani ia galo ia te oe po o ai oe. Ina ua taumafai Satani e tataiese Mose mai le galuega na saunia e le Alii mo ia, sa tali atu ma le lototoa Mose, “O ai oe? Aua faauta, o au o se atalii o le Atua” (Mose 1:13; faaopoopo le faamamafa). Ona tautino atu lea e Mose, “Ina alu ese ia oe, Satani; aua le faaseseina a‘u” (Mose 1:16; faaopoopo le faamamafa).
I nisi upu, sa fai atu Mose: “E le mafai ona e taufaasese ia te a’u, aua ua ou iloa o ai a’u. E le o ia te oe le malamalama ma le mamalu o le Atua. Aisea la e tatau ai ona ou ifo atu ia te oe pe talitonu i au pepelo?”
Aua lava nei galo e alofa le Atua ia te oe ma e finagalo e fesoasoani ma faamanuia oe. O loo i ai Sona naunau faalelagi ia te oe lava o se tasi o Ana fanau. Faamolemole faaalu le taimi e aoao ai i le uiga moni o le avea ma se atalii/afafine o le Atua. Ona faatutu lea o ni sini ma fai filifiliga o le a fesoasoani ia te oe e ola ai i lena malamalama i aso uma.
Ua ia te A’u Se Galuega mo Oe
E tele ou faafitauli ma atugaluga o loo fetaomi mai. E i ai au meaaoga, faauoga, tiutetauave faaleaiga, ma atonu foi o se galuega. Ioe, o lou luitau o le faapaleni lea o nei matafaioi taua uma e aunoa ma le faagaloina o lou faamoemoega autu i le olaga. O loo i ai i le Atua se galuega mo oe ia ausia (tagai Mose 1:6). O le tali lea i le fesili “Aisea ua ou i ai iinei i le lalolagi?”
I le avea ai ma se atalii/afafine o le Atua, na e sau i le lalolagi ina ia maua se tino faaletino. Faatasi ai ma lou tino, e mafai ona e filifili e mulimuli faamaoni ia Iesu Keriso. E mafai ona e filifili e usitai i poloaiga a le Atua, maua sauniga paia, ma osia ma tausia feagaiga o le talalelei. O le faia o nei mea o le a saunia ai oe e faataunuu lou faasinomaga paia.
Faatasi ai ma manino i le mafaufau o lenei faamoemoega, e mafai ona e vaaia le taua o le aai ma feinu i le faamanatuga i vaiaso taitasi, suesue i tusitusiga paia, tatalo i aso uma, faatutuina o sini aogā, ma le auauna atu i isi. O mea nei e fesoasoani e faamanatu atu ai ia te oe le pogai moni ua e i ai iinei, ma o le a fesoasoani ia e agavaa ai e maua faaaliga faaletagata lava ia lea e te manaomia ia fiafia ai ma tumau i luga o le ala o feagaiga. A e salamo ma mulimuli ma le filiga i le Alii, o le a e maua le taitaiga patino i vaega uma o lou olaga.
Taumafai e Avea ma Tagata e Tatau ona Avea ai Oe
O popolega ma atugaluga o le lalolagi, po o ou lava le mautonu, e ono mafua ai ona e le iloa lau matafaioi taua i le fuafuaga sili o le faaolataga a le Atua. Afai e tupu lenei mea, ou te valaaulia outou ia o mai ia Keriso (tagai Moronae 10:32). E leai se mea i le fuafuaga e faavavau a le Atua e mafai e aunoa ma Ia, ma faatasi ai ma Ia, e mafai ai ona ausia mea lelei uma.
O le taumafai e mulimuli i le Faaola o le auala sili lea e tausia ai se vaaiga faaletalalelei. Faatasi ai ma le faatuatua ma le faamoemoe ia te Ia, e mafai ai ona e faafetaiaia ma le to’a ia luitau o le olaga. O le a e maua foi le manino sili atu a o e faia filifiliga, foia faafitauli, galue agai i sini amiotonu, ma feagai ma faaosoosoga.
O au faaiuga o le a aafia ai le faavavau. E ala ia Iesu Keriso ma Lana togiola alofa tunoa, e mafai ai ona e maua le olioli i lenei olaga ma le olaga a sau. E mafai ona e iloa lou faasinomaga paia o le mauaina o mea uma ua ia te Ia ma ola ai i le ituaiga olaga o loo Ia soifua ai, o le “ola e faavavau, … o le meaalofa silisili o meaalofa uma a le Atua” (Mataupu Faavae ma Feagaiga 14:7).