O le Autu ma A’u

Ua faasoa mai e le autalavou le ala o loo latou ola ai i upu o Autu a Tamaitai Talavou ma le Korama a le Perisitua Arona

Ou te Iloa Lo‘u Taua

“O au o se afafine faapelepele a ni matua faalelagi.”

Saunia e Jihan Johnson

tamaitai talavou

Ata na pueina e Christina Smith

I le tele o vaega o Jamaica, e tatau ai i tamaiti aoga e pei o au ona su’e se suega e au ai i le aoga maualuga latou te mananao ai. Sa matou suesue malosi ma a‘u uo ina ia mafai ona matou au uma i le aoga maualuga e sili ona lelei. Ina ua amata ona ou masalosalo e mafai ona ou faia, sa faamalosiau mai pea lo‘u tina ia te au. Sa ia faamanatu mai ia te au, o au o se tasi o fanau a le Tama Faalelagi ma o le a fesoasoani o Ia ia ou ui i le ala sao.

Ina ua foi mai iuga o la‘u suega, sa ou maua togi aupito maualuga e mafai ona ou maua! Sa matuai ou fiafia lava aua o lona uiga e mafai ona ou faatasi ma au uo uma!

Ae sa lei umi ae ou iloaina sa le’i lava le maualuga o togi a se tasi o a‘u uo. Sa matou faanoanoa uma i le le mafai ona sau o ia ma i matou. Ae sa ou maua le olioli i le manatuaina o mea na aoaoina ai au e lo‘u tina. O la‘u uo o se afafine lelei foi o le Tama Faalelagi, ma o le a Ia fesoasoani foi ia te ia, e tusa lava po o a togi o suega.

Na mou atu lo‘u fiafia ina ua amata ona ta’u atu e la‘u uo i tagata uma sa le tatau ona ou au i lena aoga maualuga—e faapea, o ia na tatau ona au i ai. O le toatele o a‘u uo na ’au ia te ia ma le toe tafafao ma a’u. Sa amata ona ou fesiligia a’u lava. Pe sa tatau moni ea ona ou au?

Sa ou toe mafaufau i mea na aoao mai e lou tina ia te au: o au o se afafine tulaga ese i le faatusa o le Tama Faalelagi.

Ua ou i ai nei i le aoga fou, ma ua faia ai ni au uo fou. Latou te lagolagoina a‘u ma faamanatu mai ia te a’u lo‘u taua. Ua ou aoaoina e le afaina po o a tala a isi tagata e fai e uiga ia te au. Ou te fiafia pe a ou taumafai e avea ma tagata e finagalo le Atua ou te avea ai—aua o le tagata lena ou te fia avea ai.

E nofo le tusitala i Jamaica.