“E Silafia Au e le Tama Faalelagi,” Mo le Malosi o le Autalavou, Ian. 2022.
O le Autu ma A’u
Ua faasoa mai e le autalavou pe o faapefea ona latou ola i upu o Autu a Tamaitai Talavou ma le Korama a le Perisitua Arona
E Silafia A’ue le Tama Faalelagi
“O a’u o se atalii faapelepele o le Atua.”
A o ma tolauapi ma lou tama, sa ma faasoaina ai se taimi o le a le galo lava ia te au. Sa ma sopo i luga o le autafa o se mauga i le tuneva o se tasi po ma maua ai se nofoaga ma te saofafai faatasi ai. A o ma tilotilo atu agai i le lagi i le po, sa siomia i ma’ua e fetu sili ona mananaia ua ou vaai i ai. Sa ma nofonofo faatasi mo se taimi umi lava, ma faaigoa paneta ma faaputuga fetu taitasi.
O le tilotilo atu i le atulaulau i o‘u luma, sa ou lagona ai le laitiiti ma le le taua. Sa le mafai foi ona ou vaai faalemafaufau pe fia isi paneta o loo i ai—“o lalolagi e lē uma,” e sao? O le a le mea na faatusa i ai a‘u i na mea uma?
Sa ou fesili i lo‘u tama pe o i ai se isi olaga i le atulaulau, ma le lagona lofituina i lea manatu. Atonu sa ia faitauina o‘u mafaufauga, aua sa na ona ia faapea mai: “O le mea lenei ou te iloa. E tele foafoaga a le Tama Faalelagi, e pei ona e vaai i ai. Ae i Ana foafoaga uma lava, e alofa o Ia ia te oe lava.
“O loo silasila mai o Ia i mea uma e te oo i ai ma e leai se isi mea e sili ona finagalo i ai nai lo avea ma se vaega o lou olaga. E finagalo o Ia e aumai ia te oe le olioli ma fesoasoani ia e toe foi atu e mau faatasi ma Ia e faavavau.”
Sa ou lagonaina pea le laitiiti i lalo o le lagi tele i le po, ae sa ou talitonu i le molimau a lo’u tama. E taua a’u i le Tamā Faalelagi. Ma e finagalo o Ia ia i ai i lo‘u olaga.
Sa ou manatuaina le mea na aoao mai e Peresitene Dieter F. Uchtdorf, ao avea ma Fesoasoani Lua i le Au Peresitene Sili: “O se faamatalaga feteenai lenei a le tagata: a faatusa atu i le Atua, o le tagata o le mea noa; peitai o i tatou o mea uma ia i le Atua.”1
E pei o lena lagi e tumu i fetu, o foafoaga a le Atua e le muta—ae e faapena foi Lona alofa mo Ana fanau taitoatasi. Mo i tatou uma lava. O nisi taimi ou te toe mafaufau ai i lena taimi ao ou saofai i luga o se mauga ma le maofa tele. Atonu o a’u o se mea noa pe a faatusa i le Atua, ae e le manatu o Ia faapena. O au o Lona atalii, ma o loo Ia silafia au.
E nofo le tusitala i Kalefonia, ISA.