“O Se Enisinia o le Olioli,” Mo Le Malosi o le Autalavou, Ian. 2022.
O Se Enisinia o le Olioli
Ua maua e lenei alii talavou mai Siamani le malamalama, matagofie, ma le olioli i ituaiga uma o nofoaga—ma a ia mauaina, na te faasoa atu i latou.
O loo galue Patrick i lana afi faataitai o le taavale
Ata na pueina e Julian Klemm
Fai mai Patrick L., 16, mai Bavaria, Siamani, o mataupu e sili ona fiafia i ai i le aoga o le matematika, fisiki, ma le kemisi. O le mea moni, e fiafia tele o ia i le saienisi lea na manao ai e faasoa atu i isi e ala i le tusia o se tusi e uiga i le fisiki (e fitoitonu i le thermodynamics ma le magnetism).
E manao e avea ma se enisinia mo lana matātā, e atinae masini faapitoa e pei o afi o taavale. (Oi, o le ofisa tutotonu o le au fai taavale afi o le BMW ma Audi e na o le itula ma le afa le mamao ese mai le mea e nofo ai o ia.)
Ae e le na o le saienisi le mea e maua ai e Patrick ni mea faatupu malosi ma faaoso fiafia.
Saienisi ma le Faufaugailoto
Ioe, e loloto tele le fiafia o Patrick i le saienisi, ae o mea na te fiailoa e eseese lava ma mea moni tutasi ma faigata faapea ma metotia o tulafono.
“Ua ou tusia se tusi o le fisiki, ae o lea ua ou faia se tusi o faufaugailoto,” na ia faamatala mai ai. “O le tusi o loo ou tusia e faatatau i meaola faamaneta ma lo latou lalolagi. Ona i ai lea o ni nai tagata talavou e foia faafitauli.
O lenei galuega faatino faaopoopo lata mai nei, na musuia i le fiafia o Patrick i talafatu fafau e pei o tala faasolo o le Harry Potter ma le Percy Jackson. . O le tusia o tusi o se mausa faaopoopo, o se mea na faia e Patrick ina ua fai atu le tuagane o lona tina o le a matuai manaia lava. “Sa ia faapisia au i lona olioli,” o le tala lea a Patrick.
O lena olioli pipisi na taitai atu ai Patrick e ave mea sa ia aoaoina e uiga i tulafono ma mea moni o le lalolagi faaletino ma tusi ai se tusi e uiga i ai. Sa faapea foi ona ia manao ai e fatu se tala fafau matagofie. Ma e leai se feteenaiga i lenei mea. E foliga mai ua iloa e Patrick o le upumoni ma le matagofie ma le olioli e mafai ona maua i le tele o nofoaga. Ma e manao o ia e sue, fatufatu, ma faasoa atu na mea po o fea lava o i ai.
O Le Lalolagi Natura
Ua malamalama tele Patrick e uiga i tulafono o le lalolagi faaletino. Ae e vaai foi o ia i talaatu o mea moni e iloa ai le matagofie iina.
“Ou te nofo latalata i se togavao,” o lana tala lea. “O se mea lena e lelei ai le nofo i se nuu laitiiti—e mafai ona e alu vave i le togavao ma maua ai le filemu iina.”
E fiafia o ia i le tele o auala i le togavao mo savaliga sopo po o le, aemaise lava, le tietie uila. “Ou te fiafia e tietie uila. O se mea ou te fiafia tele e fai,“ o lana tala lea. “Ou te tietie uila soo. Sa i ai se taimi sa ou tietie uila ai mo le 1,200 kilomita [745 maila] i le lua vaiaso.”
O le saienisi e musuia ai le mafaufau o Patrick, ae o le tatalo e musuia ai lona agaga. “E i ai sa‘u molimau malosi i le tatalo,” o lana tala lea. “E mafai ona e talanoa i le [Tama Faalelagi] i soo se mea.”
O nisi taimi e fiafia o ia e o e savavali sopo pe tietie uila i le togavao ma lona aiga atoa (Tina, Tama, uso laiti e toalua, ma tuafafine laiti e toalua) pe ma na o lona tama. E masani lava ona alu na o ia. Ma o taimi uma na te maua ai le filemu ma le matagofie i le natura.
“O la oso e faapitoa lava le matagofie iinei,” o lana tala lea. “O nisi taimi e te iloa atu ai atumauga o Alps mai iinei e ui i lo latou mamao tele. Ma a oso a‘e le la, e atagia ai, ma faatasi ai ma mauga, e te vaaia ai lenei lagi lanumumu mataina, ma e ese le matagofie.”
O Se Isi Ituaiga o Malamalama
E faaopoopo atu i mea moni o le saienisi faalenatura ma le matagofie o le lalolagi natura, e faatauaina foi e Patrick upumoni—le ituaiga o upumoni lea e na o le tatalo e mafai ona maua ai.
“E i ai sa‘u molimau malosi i le tatalo,” o le tala lea a Patrick. “Tootuli i lalo, piilima o‘u lima, ma maua le filemu ma le sāō, ona tatalo lea. O le mea lenei o loo i ai sa‘u molimau maoae e uiga i ai.”
Ua ia faamatala mai o lana molimau, o se vaega e sau mai se mea na ta‘u atu ia te ia i lona faamanuiaga faapeteriaka. “Fai mai e tatau ona ou manatua e le aunoa o le Tama Faalelagi e na o le tasi le tatalo le mamao ma au,” o lana tala lea. “E mafai ona e talanoa ia te Ia i soo se mea. O loo i ai o Ia iina mo oe i soo se mea, ma e mafai ona e maua tali i soo se mea.”
O lona aafiaga i le maua o tali i tatalo ua faaleleia atili, o lana tala lea, pe a ia faia ni laasaga patino. “Ou te lagona le malosi tele o le Agaga Paia i nisi o tatalo. Pe a ou faatutuina ma le loto i ai ni sini, fuafuaina le i ai o ni fesili, ma saofai i lalo ma le malamalama lelei ma galue e pei ona fai mai tusitusiga paia, ma faatalitali ma tuuto atu le taimi—a mafai ona ou faia lena mea, e i ai e le aunoa sa‘u molimau malosi ma lagona le Agaga Paia.”
E manatua e Patrick se tasi taimi sa ia ofoina atu ai sea tatalo faapitoa. “E tele ina tatou talanoa e uiga Iosefa Samita ma le auala na ia tatalo ai i le 14 o ona tausaga ma maua mai se tali,” o lana tala lea. “Ma o lea sa ou nofo ai i lalo—sa ou alu foi i le togavao—ma ou tatalo ai. Ma sa ou maua se tali. Ona ou fiafia lea. Ma o lena mea na faamalosia ai la’u molimau.”
Faasoa Atu o Mea Ua Ia Iloa
E pei lava ona ia taumafai e faasoa atu lona malamalama faasaienisi ma ona faufaugailoto fatufatuai, o loo taumafai foi Patrick e faasoa atu lona malamalama faaleagaga.
Na amata i le 12 o ona tausaga, ua ia faaaluina le taimi e fesoasoani ai i faifeautalai faamisiona. Sa i ai foi se taimi na ia valaaulia ai se uo i lona fale e fai ai lesona a faifeautalai. “Sa ma talanoa e uiga i le Toefuataiga. Sa fiailoa e ia. Sa faalogo lelei o ia ma auai ma faitau i mau. Sa ma faitaua le Iakopo 1:5, lea foi sa faia e Iosefa Samita. Ma sa ou tuu atu ia te ia e faitau mai le Talafaasolopito—Iosefa Samita. Sa matuai auai ai o ia.”
E faaaloalogia e ana uo i le aoga lana tapuaiga. “Nai lo le sauaina o le Ekalesia, latou te lagolagoina,” o lana tala lea. Sa lagolago foi o ia e lona faiaoga o le vasega faalelotu i lana aoga. “E manatu o ia e manaia o loo o‘u faatuatua i le Atua ma e fesoasoani foi ia te a’u ia ausia a‘u sini.”
A uma lana aoga ma agavaa mo aoaoga i le iunivesite, ua fuafua foi Patrick e auauna atu i se misiona talai. “Atonu o le a ou saunia e ala i le faitauina o le Tala‘i La’u Talalelei,” o lana tala lea. “Ou te fia faaauau pea ona malamalama ma faitau, fai lesona, ma faaalu foi le tele o le taimi faatasi ma faifeautalai.”
E fiafia Patrick e fafaga lona faufaugailoto. O loo ia tusia foi se tusi o tala fafau.
E Logoleleia
Ua iloa e Patrick e tele mea o loo i ai e “mama, matagofie, pe logoleleia pe tauleleia,” ma o lea na te sailia ai nei mea (Mataupu Faavae o le Faatuatua 1:13). Ma a ia mauaina, na te faasoaina atu i latou.
Pe o le saienisi, faufaugailoto, po o le natura, na te maua le malamalama matagofie ma le matagofie ofoofogia i soo se mea lava e faasaga i ai. Ma ua ia maua le malamalama aupito maualuga, matagofie, ma le upumoni e ala i lana sootaga ma le Tama Faalelagi ma Iesu Keriso.