Faatuatua ia Ieova

(Faataoto 3:5–6)

Saunia e Au Peresitene Aoao o Tamaitai Talavou ma Alii Talavou

Ua valaaulia oe e le Atua e faatuatua ia te Ia i mea uma.

O nisi taimi pe a tutupu ni mea faigata, tatou te taumanatunatu pe mafai ona tatou faatuatuaina se tasi, e aofia ai ma le Atua. Tatou te fefefe ne’i Ona le faamalieina foi i tatou. O le tala fiafia e faapea, e alofa atoatoa le Atua ia i tatou. E agalelei ma agaalofa ma faamaoni o Ia. E le fesuisuiai ma e faatuatuaina o Ia.

Ma ona o lena mea, e mafai ai ona tatou faatuatua ia te Ia e tusa lava po o le a. O le autu a le autalavou o le tausaga lenei o le “Faalagolago ia Ieova” (Faataoto 3:5–6).

O nisi nei o faataitaiga o le auala na tofu faatuatua ai i matou taitoatasi i au Peresitene Aoao o Tamaitai Talavou ma Alii Talavou ia Ieova.

Michelle D. Craig

Bonnie H. Cordon

Rebecca Craven

Faatuatua i Faamoemoega a le Atua

Na toe o ni nai aso atoa lo’u 16, ae masii atu lo’u aiga i le isi itu o le atunuu. Sa ou manatu na matuai leaga tele le taimi! O le toe tepa i tua, e mafai ona ou iloa manino ai o nisi o faamanuiaga silisili mo lo matou aiga ma mo au lava ia, na oo mai ona o lena masii atu ao ou talavou. Atonu tatou te le malamalama i le taimi a le Alii i lena taimi, ae tatou te faatuatua ia te Ia aua e mafai ona tatou faatuatuaina Lona finagalo ma faamoemoega.

Michelle D. Craig

Faatuatua i le Taimi a le Alii

Ona o le valaauga o lou tama o se peresitene o le misiona, sa vave maua ai lou lava valaauga e auauna atu i se misiona nai lo le matua faatulagaina mo tamaitai faifeautalai. O lona uiga o le a ou ulufale i le nofoaga autu e aoao ai faifeautalai a o lei faia le faauuga a le aoga maualuga. Ia te au, sa lei fetaui le taimi, ae sa ou maua se faamautinoaga malosi faaleagaga e faatuatua i le Alii. Sa ou faia, ma sa matuai lelei ma manaia mea uma.

O le faatuatua i le Alii o lona uiga o le agai i luma e tusa lava pe le o manino atoatoa le ala.

Bonnie H. Cordon

Faatuatua i le Atua i Taimi Faigata

I le tuputupu ae ai, o lou tama o se taitai o matātā i le Ami. Na pau lava le itu le lelei i lana galuega o le tatau lea ona alu i le taua. Sa 13 o‘u tausaga i le taimi lona lua na alu ai lo’u tama i Viatename. Sa i ai i lou mafaufau i taimi uma le fefe ina nei le toe foi mai o ia, ae sa faapena foi lo’u faatuatua i le Alii. A o lei alu ese atu, sa tuuina mai e lo‘u tama ia te a’u se faamanuiaga faaletama e faamautinoa mai ai ia te a‘u o le a faatasi le Alii ma a’u ma fesoasoani a o toesea lo‘u tama. Sa ou lagonaina le toafilemu. E ui sa ou lei iloaina ma le mautinoa o le a toe foi saogalemu mai lou tama i le fale, ae sa ou talitonu o le a lelei mea uma, e tusa lava po o le a le mea e tupu.

Rebecca Craven

Ahmad S. Corbitt

Steven J. Lund.

Bradley R. Wilcox

Tuuto Atu Oe Lava i le Atua

Ina ua ou auai i le Ekalesia a o ou talavou, sa tonu ia te au e tuuina atu lo‘u ola, taimi, ma lou loto i le Alii. E ui o lena ituaiga o tautinoga tumau na taufaafefe teisi, ae sa ou iloaina e sa‘o. Sa ou lagonaina o le mea lenei sa finagalo ai lo‘u Tama Faalelagi ia te au, ma sa ou maua le toafilemu i le faia. Ua ou fiafia lava sa ou filifili e faatuatua i le Atua ma tuu atu ia te Ia ia manumalo i lo‘u olaga. Ou te mautinoa ana ou faalagolago i lo‘u lava malamalama, semanu e le taitai tamaoaiga lo’u olaga i le olioli, fiafia, ma le filemu.

Ahmad S. Corbitt

Faatuatua i Musumusuga a le Alii

Ina ua uma ona ou auauna atu i la‘u misiona, sa ou lagona le uunaiga e auai i le militeli nai lo le toe foi i le kolisi. O le mea mulimuli lenei sa ou manao e fai! Sa ou lagona le le mautonu, ae sa ou aoao e faatuatua i le Atua, ma sa lava le faatuatua na ou maua e faalogo ai ia te Ia ma usiusitai. Sa avea au ma se fitafita mo le tolu tausaga.

E tele naua mea lelei i lo‘u olaga na oo mai i lena faaiuga, e aofia ai le feiloai atu i lo’u toalua i le lumanai.

Steven J. Lund.

Faatuatua i Uunaiga a le Atua e Galue Nei Loa

Ina ua uma ona ou faiaoga i le vasega ono mo le tolu tausaga, sa ou iloa ai afai ou te faiaoga pea mo le isi fa tausaga, o le a totogi e le aoga a le itumalo se vaega o lo‘u pili e maua ai lo’u faailoga o le matuaofaiva. Sa foliga mai o se fuafuaga lelei—seia oo ina uunaia a‘u e le Agaga e faamavae mai la’u galuega ae toe foi e su‘e lo‘u faailoga i le taimi lava lena. Sa maua foi e lo‘u toalua se uunaiga faapena, o lea sa ma agai ai i luma. O lona uiga o le a tatau ona ma totogia a ma‘ua lava aoga. Ae talu ai ona sa ma faia, sa faafaigaluega ai a‘u e faiaoga i le BYU—Provo. Na semanu e le taitai matala mai lena faamalama o avanoa pe ana ma faatalitali mo le isi fa tausaga. Ma te lei iloa pe o le a faapefea ona fetaui mea uma, ae sa taialaina e le Alii o ma‘ua ala e pei lava ona Ia folafola mai.

Bradley R. Wilcox