“Mauaina o Iesu Keriso i le Feagaiga Tuai,” Mo le Malosi o le Autalavou, Ian. 2022.

Sau, Mulimuli Mai ia te A’u

Mauaina o Iesu Keriso i le Feagaiga Tuai

Saunia e Marissa Widdison

O Mekasini a le Ekalesia

O auala nei e tolu e mafai ona e vaavaai ai mo le Faaola a o e suesue i le Feagaiga Tuai i lenei tausaga.

Ata

Iesu Keriso

Suega puupuu: O le fea tusi o tusitusiga paia e faatatau ia Iesu Keriso? Aaa. Sei vaai la:

O le Tusi a Mamona o se tasi molimau ia te Ia.

O le Mataupu Faavae ma Feagaiga o se tuufaatasiga o savali mai ia te Ia ia Iosefa Samita ma isi perofeta.

O le Feagaiga Fou o loo faamatala mai ai mea na tutupu i Lona soifuaga.

Ae faapefea le Feagaiga Tuai? Pe o aoao mai ia i tatou e uiga foi ia Iesu Keriso?

Ioe! O le mea moni, sa tuu e le Faaola se taumafaiga faaopoopo e fesoasoani ai i Ona soo ia malamalama i Lana matafaioi i le Feagaiga Tuai: “Ona faamatala ai lea e ia ia te i latou o mea ua tusia ia te ia i tusi uma, ua amata mai ia Mose atoa ma le au perofeta uma” (Luka 24:27).

O auala nei e tolu e mafai ona e maua ai Iesu Keriso a o e sailiili i le Feagaiga Tuai i lenei tausaga.

1. Mau o loo talanoa e uiga ia Iesu Keriso e faaaoga ai se igoa ese.

I le Feagaiga Tuai, e masani ona ta‘ua Iesu o “Ieova” po o le “Atua.” O lomiga o le Tusi Paia na lolomiina e le Ekalesia ua aofia ai vaefaamatalaga e mafai ona fesoasoani ia te oe e malamalama ai pe a faasino se fuaiupu ia Iesu Keriso. Mo se faataitaiga, ina ua talanoa Mose ma le Atua i se laau talatala mumū (tagai Esoto 3:6), ua faamanino mai e vaefaamatalaga sa talanoa o ia i le Faaola.¹ Ua fautuaina i tatou e Peresitene Russell M. Nelson e suesue i suafa ma faalaniga eseese o Keriso o loo faaaogaina i tusitusiga paia.²

2. O mea ma mea e tutupu e faamanatu mai ai ia i tatou ia Iesu Keriso.

O le tele o mau o le Feagaiga Tuai ua aofia ai faailoga e mafai ona aoao ai i tatou e uiga ia Iesu Keriso ma faamanatu mai ai ia i tatou le fesoasoani ua Ia ofoina mai ia i tatou. Mo se faataitaiga:

E tele mau o loo faamatala ai taimi na poloaiina ai tagata faamaoni e ositaulaga manu o se vaega o a latou tapuaiga. Mo se faataitaiga, afai e faailoga e le fanauga a Isaraelu o latou faitotoa i le toto o le tamai mamoe, sa puipuia i latou mai se mala matautia. O nei osigataulaga ua faamanatu mai ai ia i tatou na faatagaina e Iesu Keriso o Ia lava e fasiotia o se vaega o Lana Togiola e faatoilalo ai le oti faaleagaga ma le faaletino. (Tagai Esoto 12:13.)
Sa i ai se taimi na tatau ai ona lafi se perofeta e igoa ia Elia i le toafa. Sa ia lagona le faanoanoa ma fai mai maimau pe ana oti o ia. Ao moe o ia, sa faavavega ona oo atu le areto ma le vai ma sa lava ai le faamalosia o ia faaletino ma faalelagona e faaauau ai pea. E mafai ona faamanatu mai e lenei mea ia i tatou o Iesu Keriso o le Vai Ola ma le Areto o le Ola, o le puna autu lea o le faamoemoe ma le ola. (Tagai i le 1 Tupu 19:1–8.)
“O lau afioga o le sulu lea i o‘u vae,” na tusia ai e se tasi o fai salamo (Salamo 119:105). Ma sa molimau mika, “E ui lava ina ou nofo i le pouliuli, a o Ieova o lou malamalama ia” (Mika 7:8). O a latou upu e faamanatu mai ai ia i tatou o Iesu Keriso o le Malamalama o le Lalolagi, e taialaina i tatou e toe foi atu i lo tatou aiga faalelagi.

A o e faitau, e mafai foi ona e iloa ai isi mea e faamanatu atu ai ia te oe e uiga ia Iesu Keriso ma Lona gafatia ona laveai i tatou. Mo se faataitaiga, ina ua faasaoina le aiga o Noa mai le lolo i le vaa po o le taimi na tuu atu ai ia Iona se taimi e salamo ai a o i ai i totonu o le tafola. O nei mea e tutupu e mafai ona faamanatu mai ai ia i tatou e mafai e le Faaola ona tauaveina i tatou i afā o le olaga ma tuu mai ia i tatou ni avanoa e toe foi ai i le ala sao. (Tagai Kenese 7:1; Iona 1:17.)

3. O fuaiupu o valoia ai le soifua mai o Iesu Keriso.

O le asō o loo tatou tulimatai atu ma saunia mo le Afio Mai Faalua o Iesu Keriso. I se ala foi faapena, sa tulimatai atu ai perofeta o le Feagaiga Tuai i le, ma tusitusi e uiga i Lona uluai afio mai, ina ua soifua mai o Ia i le lalolagi. Mo se faataitaiga:

Sa faamatala e se perofeta e igoa ia Palaamo le ala “e alu le fetu mai ia Iakopo” (Numera 24:17). O lona uiga o le a soifua mai le Faaola i le gafa o Iakopo (po o Isaraelu).
Sa ta‘u atu e se perofeta e igoa ia Natano i le Tupu o Tavita o Iesu Keriso o se tasi e tupuga mai ia Tavita—o lona gafa o le a faatuina “le nofoalii o lona malo e faavavau” (2 Samuelu 7:13).
Sa tusia e le perofeta o Isaia nisi o faamatalaga aupito lauiloa o le Feagaiga Tuai e uiga i le Faaola. O nisi o ana upu sa faaaoga o ni upu o le pese a Handel, o le Messiah, lea e masani ona usuina i le vaitau o le Kerisimasi. (Tagai Isaia 7; 9; 40; 53.)

Ata

teineitiiti o loo faitau tusitusiga paia i se moliuila

Faatasi ai ma sina faataitaiga laitiiti, o le a mafai ai ona e maua Iesu Keriso i le Feagaiga Tuai atoa i lenei tausaga. E faapitoa ona alofa o Ia ia te oe , e pei lava ona Ia alofa ia Atamu ma Eva, Arona ma Miriama³—ma le toatele o isi na Ia auauna patino atu i ai i nei tala anamua ma musuia. Faatasi ai ma le faatuatua ia Iesu Keriso, ma faatasi ai ma le fesoasoani mai le tasi ma le isi, o le a avea lenei tausaga o se tausaga ofoofogia o le suesueina o tusitusiga paia!