“O le Faatosinaga a se Uo,” Mo Le Malosi o le Autalavou, Ian. 2022.
O le Faatosinagaa se Uo
Sa faigata o‘u tausaga o le talavou, ae na auina mai e le Atua se uo e fesoasoani ia te a‘u.
Ata na tusia e Judy Bloomfield
Sa ou lagonaina i taimi uma le tuuatoatasi i le lalolagi. Na tetea ou matua a o ou pepe, ma i ni nai tausaga mulimuli ane, sa toe faaipoipo lo‘u tina ma matou siitia atu ai i le 4,000 maila, mai Georgia, ISA, i Oregon, ISA. Sa o se suiga tele mo se teineitiiti e iva tausaga le matua na te taulimaina, aemaise lava o se tasi e tautala ma se faaleoga mai saute, o lē sa lei taliaina atoatoa e isi tamaiti.
Ae, ina ua ou siitia atu i le aoga tulagalua, sa ou feiloai ai ia Nikola.* O le taimi lava lena, na ou lagonaina ai se uiga lelei, filemu e uiga ia te ia—o se mea sa ou misia. Sa ou iloa e tatau ona ma faauo ma lenei teineitiiti!
A o ma tafafao soo, na avea Nikola ma se nofoaga saogalemu mai lo‘u tuuatoatasi. O le savali atu i totonu o lona fale sa pei o le savali atu i totonu o se olaga e matuai ese lava: sa faatumulia tulimanu uma i le Agaga o le Atua. Sa i ai ata o le Faaola ma fausaga tetele i soo se mea. (Sa ou iloa mulimuli ane o nei mea o malumalu.) Na amata le galuega faafaifeautalai a Nikola i le na o le valaaulia o au [i lona fale], ma na te lei iloaina lava.
Faauoga ma le Talitonu
Sa auauna mai Nikola ia te au i le na o le avea ma au uo. Sa ia tuuina mai ia te au le Tusi a Mamona, ma sa amata ona ma faitaua faatasi i lana taavale pe a tuua le aoga.
Na amata ona faatumu e le Tusi a Mamona ia avanoa i lo‘u olaga. Ae sa ou lagonaina pea le tuuatoatasi. Sa le o au o se tagata o le ekalesia a Nikola, ae sa le o au foi o se vaega atoa o le tapuaiga a ou matua.
Sa uunaia ma le agalelei au e Nikola e tatalo ma ole atu i le Atua pe moni le Tusi a Mamona. Ou te lei tatalo leotele lava, o lea sa ou le iloa ai le mea sa tatau ona ou fai atu ai. Ae sa na ona ou alu lava i fafo ma amata ona tautala. Sa ou ole atu i le Atua pe o le ekalesia a Nikola o le ekalesia sa‘o lea mo a’u. O le taimi lava na uma ai la‘u fesili, sa ou lagona le maalili i lo’u tino atoa. Sa ou iloaina, e aunoa ma se masalosalo, e moni le Tusi a Mamona ma sa sa‘o lenei Ekalesia mo a’u.
Sa 15 ou tausaga i le taimi na ou mauaina ai lenei molimau. Mo nai tausaga na sosoo ai, sa ou talitonu, e ui sa lei fia iloa e o‘u matua le Ekalesia. Ae sa lei tuua na o au i lou faatuatua, aua sa i ai pea Nikola iina e lagolago au.
Faatuatuaga Fou, Fesili Fou
Ina ua ou faauu i le aoga maualuga, sa ou siitia atu i Iuta, ISA. Sa i ai Nikola iina, ma sa ia faatalitali mai ma le naunautai mo au ia ou oo atu iina ina ia mafai ona amata fai au lesona a faifeautalai. Sa i ai sa‘u fuafuaga ou te papatiso i lo’u aso fanau e atoa ai lou 19—i le na o le ono vaiaso le mamao—ma sa faamautinoa mai e Nikola ia te a‘u o le a i ai o ia iina faatasi ma a’u i le taimi atoa.
Ina ua amata ona aoao a‘u e faifeautalai, sa vave ona ou iloaina le laiti o mea na ou iloa moni e uiga i le Ekalesia. Sa ou faitau ma fiafia i le Tusi a Mamona, ae na faafuasei ona laua tau mai ia te au e uiga i le meaalofa o le Agaga Paia, le ata o le faaolataga, avea e faapei o le Atua, ma le anoanoai o isi mea fou. Sa matuai tele naua mea ia malamalama i ai i le taimi e tasi.
Ae na iloa lelei au e Nikola. Na fesoasoani mai o ia e faamalamalama mea na aoao mai e faifeautalai i se auala na ia iloa ou te malamalama ai. I na uluai lesona, o ana faamalamalamaga faapalepale o mafuaaga na sa ou nofo ai.
Na Iu ina Auai
Sa lagolagoina faaleagaga au e Nikola faapena seia oo i le aso na ou papatiso ai—ma mulimuli ane. Sa fesoasoani o ia i tagata o le uarota ma faifeautalai e fuafua ina ia mafai ona ou papatiso i lou aso fanau na atoa ai lou 19. Ina ua ou alu ae mai le vai ma vaaia le toatele o tagata sa taufai foliga fiafia mai ia te au, sa ou le toe lagonaina le tuuatoatasi. O le a le galo lava ia te au lena lagona o le iu lava ina ou auai i le Alii ma Lana Ekalesia.
O loo ou aoao pea mai le faatuatua ma le faauoga faifai pea a Nikola. Sa ia faaali mai ia te au mai le amataga e faapea, o le galuega faafaifeautalai e le manaomia ai se pine o le igoa. Na amata le galuega faafaifeautalai a Nikola i lona loto, ina ua ia aapa mai i se teineitiiti mai le itu i saute sa manaomia se ataata.
E nofo le tusitala i Iuta, ISA.