“E le tele ni mea ou te tutusa ai ma tagata o lau vaega talavou. E mafai faapefea ona ou lagonaina le fesootai atili ma i latou?”

Aapa atu i le Tasi

“Ou te lagona le fesootai atili ma isi pe a ou taumafai moni lava e faaalu se taimi ma i latou taitoatasi, ae le na o faatulagaga faalevaega. Afai e te manao e sue se tasi e te fegalegaleai faatasi, aapa atu i se tagata e foliga mai o latou manaomia se uo. Atonu e uma ane ua sili atu lou faamanuiaina ai nai lo i latou!”

Latyanna P., 17, Sigapoa

Faasoa Atu Mea e Te Fiafia i Ai

“O le toatele o tagata i lau vaega talavou e eseese mea latou te fiafia i ai. Ou te fiafia e fesili atu ia i latou e uiga i mea latou te fiafia i ai aua e faaalia ai ou te manatu atu ia i latou. Ona latou maua ai lea o se avanoa e fesili mai ai foi e uiga i mea ou te fiafia i ai. O le faia o fesootaiga ma tagata e manaomia ai le taimi—ia tumau ai pea!”

Erin F., 18, Iuta, ISA

Sue Mea e Tutusa Ai

“Afai e te manao ia maua se sootaga vavalalata ma lau vaega o uo, saili ni mea lelei, ma anoa e mafai ona outou faia faatasi, e tusa lava pe toalaiti i latou. E mafai ona tou maua se mausa po o se mea faapasi taimi tou te fiafia uma i ai. Ole atu mo se fesoasoani mai le Tama Faalelagi, ma o le a Ia tuuina mai ia te oe musumusuga.

Carla V., 12, Peru

Talisapaia Tou Eseesega

“O le tele o le taimi ou te faaaluina faatasi ma tagata o lau vaega talavou, o le tele foi lea o lou fiafia i mea latou te tulaga ese ai! Ou te aoao i le auala e auauna lelei atu ai ia i latou, lea e fesoasoani ou te latalata atili atu ai ia i latou ma Iesu Keriso. O i tatou uma o fanau a lo tatou Tama Faalelagi, o lea e tele atu mea tatou te tutusa ai nai lo le mea tatou te mafaufau i ai.

Sarah M., 16, Oregon, ISA

Faataitai ni Mea Fou

“Tau lava o le faauo ma talanoa atu pea ia i latou. Taumafai pea e fai ni mea fou ina ia faaaofia atili ai. O se tamaitiiti i le matou uarota e le fiafia tele i taaloga, ae matou te taaalo lava i taimi uma. Ona matou faia lea o mea e fiafia i ai o ia, e pei o ni togafiti faamaneta po o le togiina o kata. O le faataitaia o mea fou o se auala lelei lea e lagona ai le fesootai.”

Jarren M., 17, Nova Scotia, Kanata

Aapa Atu

“Aapa atu ma fesoasoani i se tasi i lau vaega talavou o loo i ai i se taimi o mafatiaga. Pe a tatou taumafai e avea ma se faataitaiga o le alofa o le Faaola, o le a fesoasoani tatou te atili fesootai ai i le tasi ma le isi.”

Joshua C., 20, Faleniu, Amerika Samoa

Ia e Amio ia te Oe Lava

“I le aluga o taimi atonu o le a e maua ni mea tou te tutusa ai, ae atonu e le o le taimi lava lena. I le taimi nei, e mafai ona e fesootai atu i gaoioiga ma mea e tutupu i le aluga o le vaiaso. Fiafia i gaoioiga! Filifili e auai, ma ia amio ia te oe lava!”

Hannah W., 18, Nova Scotia, Kanata