“Faatoilaloina o Auala a Satani,” Mo Le Malosi o le Autalavou, Ian. 2022.
Sau, Mulimuli Mai ia te A’u
Faatoilaloina o Auala a Satani
E faia e Satani mea uma na te mafaia e faasese ai i tatou. Faafetai ua tatou maua le fesoasoani faalelagi e aloese ai mai ana mailei.
E fiti e se fai maneta ona tamatamailima ma nimo ai se polo mai luma tonu o ou mata.
Seki a!
Ona ia toso mai lea o se lapiti mai se pulou umi e mafolafola le tumuai ma faia se mea e foliga mai e opeopea.
Awoi! Na faafefea ona ia faia?
Ua iloa e le au fai maneta le ala e faatalitonu ai tagata ua latou molimauina se mea faigata ae, o le mea moni, na pau le mea na latou vaaia o le mea na manao le fai maneta latou te vaai i ai.
E sa’o! E le iliina moni vaelua e fai maneta o latou tagata fesoasoani. Ua latou maua ni auala poto e maileia ai i tatou e mafaufau ua tatou vaai i se mea e lei tupu moni lava. O le mealilo o loo taoto i manatu sese ma taufaasese.
E ui ina faia nei mea uma ia faamālie ma faafiafiaga, ae o isi ituaiga o manatu sese ma taufaasese e matautia—i le faaletino ma le faaleagaga.
O se Tagata Faatupu Manatu Sese ma le Taufaasese
O Satani o le fili o le amiotonu uma ma e le manao ia mulimuli se tasi i le Tama Faalelagi ma Iesu Keriso. E manao o ia ina ia tatou le fiafia e pei o ia (tagai i le 2 Nifae 2:27).
Ina ia ausia lenei mea, na te faia mea uma na te mafaia ina ia tatou fesiligia ai pe le amanaia ai upumoni e faavavau. E galue ma le le malolo o ia e faanenefu i tatou ia talitonu o le lelei o le leaga ma le leaga e lelei (tagai Isaia 5:20). O le mafuaaga lea ua lauiloa ai o ia i nisi o taimi o le tama o pepelo ma le taufaasese sili (tagai Mose 4:4). Ma ua ia faia lenei mea mo se taimi umi lava.
O Le Pau
I le Faatoaga o Etena, sa ta‘u atu e le Atua ia Atamu ma Eva e aua ne’i aai i le laau e iloa ai le lelei ma le leaga. Afai latou te faia, e tatau ona la tuua le Faatoaga o Etena ma o le a iu lava ina feoti. Ae na tau atu e le Atua ia i laua e mafai ona la filifili (tagai Mose 3:16–17).
Ua manao Satani e faaumatia le fuafuaga a le Atua. Sa taumafai o ia e ala i le faaosooso o Eva e ai le fua faasaina. Sa pepelo o ia ma fai atu o le a le oti o ia (lea na feteenai tonu lava ma le mea na fetalai mai ai le Atua). Sa ia ta‘u atu foi ia te ia ni upumoni-afaafa (tagai Mose 4:11).
Mulimuli ane, na aai uma Atamu ma Eva i le fua ma tuliesea ai i fafo mai le afioaga o le Atua. Ua ta‘ua e tusitusiga paia lenei mea o le “oti faaleagaga.” Sa avea foi i laua ma tagata faaletino, o lona uiga e mafai ona la oti faaletino. Ua taua lenei mea o le Pau.
I le avea ai ma e tupuga mai ia Atamu ma Eva, o i tatou foi, ua vavaeeseina mai le afioaga o le Atua ma o le a oo i le oti faaletino. Ua tofotofoina foi i tatou i faigata o le olaga ma faaosoosoga a Satani.
Atonu e foliga mai o lenei mea o se mea leaga, ae o le Pau o se vaega taua o le fuafuaga a le Tama Faalelagi. E tuuina mai ai ia i tatou le avanoa e aoao ma tuputupu ae ai e ala i le faaaoga o lo tatou faitalia e filifili ai e fai mea lelei. Ma ona o Iesu Keriso ma Lana Togiola, ua mafai ai ona tatou salamo pe a tatou agasala ma saunia e maua le ola e faavavau. O mea uma na tutupu i le Pau, ua faasa‘oina e Iesu Keriso. Sa lei taofia e Satani le fuafuaga a le Atua.
Faatoilaloina o Auala a Satani
Oloo faaauau pea i le taimi nei e Satani ona taumafai e maileia ma faasese i tatou. O nisi nei o auala na te faia ai lenei mea:
1. Faaosoosoga
E fiafia Satani e tuu mafaufauga le mama ma le agaleaga i o tatou ala. E manao o ia ia ulu nei mea i o tatou mafaufau ma ia tatou faia. E mafai ona tatou tetee atu i lenei faaosoosoga e ala i le fai atu ia Satani e alu ese (tagai i le savali a Elder Stevenson i le itulau e 4). O se tasi o a tatou puipuiga silisili e faasaga i faaosoosoga o le tatalo e le aunoa (tagai Alema 13:28; 3 Nifae 18:15). E mafai foi ona tatou faitau ma suesue i tusitusiga paia. Latou te aumaia le Agaga i o tatou loto, faamautinoa mai ia i tatou mea moni, ma faamalosia i tatou e tetee atu i faaosoosoga i le lumanai.
2. Pepelo ma le Taufaasese
O nisi taimi e ta‘u mai ai e Satani ia i tatou mea e pei o le: “E te le faia lava se mea sao,” “Ua tele naua mea ua e agasala ai ina ia faamagaloina,” “E faigata ona suia,” po o le “E leai sou taua ma e leai se tasi e popole moni ia te oe.”
O pepelomea nei. Aua le talitonu i ai! O le mea moni lenei: E alofa le Atua ia te oe ma olioli ia te oe ona o oe o Lona atalii/afafine. Ese lou lelei! E tele naua ou gafatia, ma a e mulimuli ia te ia, e susulu lou lumanai! E tusa lava pe na e faia ni mea sese, e mafai lava ona e maua le faamoemoe ma, faatasi ai ma Keriso, e mafai ona outou suia mea mo le lelei.
E mautinoa lava o le a ta‘u atu e Satani ia te oe ia pepelo. E mautinoa foi o le a ta‘u atu e le aunoa e le Agaga ia te oe le mea moni (tagai Iakopo 4:13). O se tasi lena o mafuaaga e taua ai le taumafai ia maua pea le Agaga e faatasi ma i tatou.
E mafai foi ona tatou faailoa ma tetee atu i pepelo a Satani e ala i le faitau e le aunoa o tusitusiga paia ma savali mai taitai o le Ekalesia. E mafai ona e maua ni mau po o ni upusii faagaeetia e faamanatu atu ai ia te oe upumoni e tetee atu ai i pepelo a Satani. E mafai ona e taulotoina pe tuu i se nofoaga o le a e vaai soo atu i ai.
3. Faanoanoa
E fiafia Satani pe a tatou lagona le lotovaivai. E manao o ia ia tatou talitonu po o le a lava le mea o loo tatou faanoanoa ai o le a tumau ai pea. Ae e le moni lena mea.
Na aoao mai Elder Jeffrey R. Holland o le Korama a Aposetolo e Toasefululua e faapea, e manao Satani ia tatou talitonu i lenei mea ona “ua iloa [e Satani] e le mafai ona toe foi o ia i se lelei, e le mafai ona ia alualu i luma, i lalolagi e le uma, o le a le maua ai sona lumanai. O ia o se tagata pagatia ua noatia i tapulaa e faavavau, ma na te manao ia te oe ia pagatia foi. Ia, aua nei lolo atu i lena manatu.”1
E finagalo le Tama Faalelagi ma Iesu Keriso ia e fiafia. Afai tatou te liliu atu ia i Laua, e mafai ona La fesoasoani ina ia e onosaia tofotofoga ma maua le filemu ma le olioli.
Ua Tatou Iloa O Ai e Manumalo i le Iuga
Ua valaaulia i tatou e le Faola e “vaai ia te [Ia] i mafaufauga uma; aua le masalosalo, aua le fefefe” (Mataupu Faavae ma Feagaiga 6:36). A o tatou uai atu i lenei valaaulia, o le a malosi pea lava le alofa tunoa ma le mana o Lana togiola nai lo taumafaiga a Satani e faasese i tatou. E le tatau lava ona avea i tatou ma vete i auala a Satani. E mafai ona tatou maua le lototele ma le malosi e faatoilalo ai faaosoosoga a Satani ma onosaia luitau o le olaga.
Aua Le Atuatuvale o Outou Loto, saunia e Howard Lyon
Na fetalai le Faaola, “O A’u nei o le malamalama o le lalolagi; o le mulimuli mai ia te au, e le savali o ia i le pouliuli, a e ia te ia le malamalama o le ola” (Ioane 8:12). Na Ia fetalai mai foi, “E maua foi outou e le puapuaga i le lalolagi: a ia outou loto tetele; ua ou manumalo i le lalolagi” (Ioane 16:33).
E mafai e Iesu Keriso ona siitia i tatou i luga ma faamalosi i tatou e faasaga i soo se faiga e taumafai Satani e faaaoga e faasagatau mai ai ia i tatou. A tatou manatua le Faaola ma Ana aoaoga, e mafai ona tatou vaai atu i togafiti ma manatu sese o Satani ma vaai i “mea e pei ona i ai moni lava” (Iakopo 4:13).