“E a A‘u i Latou ma ua Ou Iloa i Latou,” Mo le Malosi o le Autalavou, Ian. 2022.
Sau, Mulimuli Mai ia te A’u
“E a A‘u i Latou ma ua Ou Iloa i Latou”
Atapue mai le Getty Images
Pe sa i ai se taimi na e lagona ai le le taua? Atonu na e lagonaina lenei lagona ina ua e mafaufau i le toatele o tagata o loo i ai i le lalolagi pe tilotilo foi i le tele o fetu i le lagi. Pe na i ai se taimi na e manatunatu ai pe silafia moni lava e le Atua o ai oe ma pe faape‘i lou olaga? Afai o lea, o loo i ai ia Mose se savali mo oe.
I se faaaliga vaaia, sa faaali atu ai e le Atua ia Mose mea uma lava o le lalolagi ma tagata uma o le a nonofo ai. Sa “le mafaitaulia lava e pei o le oneone o le matafaga” (Mose 1:28). Ona ta‘u atu lea e le Atua ia Mose sa Ia faia “lalolagi e le mafaitaulia” (Mose 1:33)—o Ana foafoaga e oo atu i talaatu o lenei lalolagi.
Atonu na lagona e Mose le lofituina ina ua ia vaai i nei mea uma. Atonu sa ia taumanatunatu: O gafea ou te i ai i le tele naua o foafoaga? Ma e mafai faapefea ona mata’itu e le Atua ia mea e tele?
Sa faigofie lava le tali a le Atua: “Ua faitaulia mea uma ia te a’u.” E faapefea? “E a a‘u i latou ma ua Ou iloa i latou” (Mose 1:35). Sa silafia e le Atua o ai Mose, e pei lava ona Ia silafia Ana fanau uma, faapea foi i Ana foafoaga uma. O i latou uma o Ana—o fetu, o le oneone, aemaise lava Ana fanau i le lalolagi. O i latou le mafuaaga atoa na Ia faia ai le lalolagi. O lo latou faaolataga e faavavau o le galuega aupito taua lea a le Atua.
“Aua faauta, o la’u galuega ma lo’u mamalu lenei—ia aumaia le tino ola pea ma le ola faavavau o le tagata” (Mose 1:39).
E pei lava ona aoaoina e Mose le tulaga e i ai o ia i le fuafuaga a le Atua, e mafai foi ona faamautinoa atu ia te oe e silafia oe e le Atua! O le fesoasoani ia e toe foi atu ia te Ia o Lana galuega ma lona mamalu lea. Aisea? Aua o oe e a Ia. Ma e leai se mea e le taua i lena mea!