“Aloese mai Moli o le Ava ma le Sailiga mo le Malamalama,” Mo le Malosi o le Autalavou, Iuni 2022.
Aloese mai Moli o le Ava ma le Sailiga mo le Malamalama
E mafai ona tatou aloese mai taunuuga le lelei faaleagaga ma faanoanoaga e ala i le auauna atu i le Alii, liliu atu o o tatou loto ia te Ia, ma aoao e alolofa ma faalagolago ia te Ia.
Atatusi mai le Getty Images
Sa ou faalogo i se tala malie e uiga i se kapeteni o se vaa feaveai vaalele o loo taumafai e faatautaia lana vaa i le taimi o se afa i le po. Na te vaai atu i se malamalama i se mea mamao e foliga mai o loo agai sa‘o atu ia te ia. Sa ia alaga atu i lana tagata o loo faafoeina le leitiō, “Fai atu i le vaa lena o loo sau e sui le alavaa i le 20 tikeri!”
Sa faia e le tagata o loo faafoeina le leitiō ma faatalitali mo se tali. “Kapeteni,” na ia fai atu ai, “o loo latou fai mai ia i tatou e sui la tatou alavaa i le 20 tikeri.”
Na alaga le kapeteni, “Faamalamalama atu i le tagata le la o loo faafoeina le leitiō ou te lē o fesili atu—Ua o’u faatonu atu. Sui le alavaa!”
Ua auina atu e le tagata faigaluega o le leitiō le fe’au, faatali mo sina taimi, ona tilotilo lea i luga. “Kapeteni,” na ia fai atu ai, “ua latou tausisi lava o i tatou e tatau ona liliu.”
Sa uu e le kapeteni le meafaalogo ma ee atu i totonu o le faaleotele leo, “Ou te lē iloa po o ai oe po o fea e te alu i ai ae e i ai se mea e tatau ona e iloa. O au o le kapeteni o se vaega o vaa feaveai vaalele a le neivi na malaga faatasi ma ni vaa tau se tolu, o ni vaa folau se tolu, ma le tele o vaa lagolago. O loo matou o atu sa‘o ia te outou ma o le a lē suia lava le alavaa!”
Faatasi ma se nenefu sa lagona atu ai e le Kapeteni se tali: “Malamalama, Kapeteni. Ae e i ai se mea e tatau ona e iloa. O i matou o se moli o le ava.
O Le Upumoni Sili Atu
E ui o lenei tala e lē masalomia lava o se tala fatu, ae e aoga. O le kapeteni o le vaa, faatasi ai ma faamatalaga i lana faatonuga, na lagonaina le tauamiotonuina atoa. Sa ia mautinoa o mea moni na ia iloa na avatu ai ia te ia le aiā tatau o le ala sao.
Ae na te lei iloaina i le taimi lea le upumoni sili atu. O le taimi lava na ia taliaina ai le ata telē atu, o le “molimau lē talafeagai” a le tagata e faafoeina le moli o le ava na matuai fetaui lelei lava.
O le taimi lava na ia iloa ai le upumoni sili atu, na suia ai mea uma.
Ioe, semanu e le amanaia e le kapeteni le lapataiga ma faatumauina lona alavaa, ma le talitonuga na sa‘o o ia. Ae o le faia o lenā mea o le a i ai ni taunuuga ogaoga, e faaoo ai ni faatamaiaga tetele ma oo ai i se faanoanoaga tele.
Pe o tatou faia ea lea mea e tasi?
O le mea e faanoanoa ai, pe a oo mai i le talitonuina ma le ua‘i atu i upu a perofeta, e lē o i ai i le lalolagi aoao se faamaumauga sili ona lelei. Ua tumu tusitusiga paia i faataitaiga na lē amanaiaina pe ta‘ufaatauvaaina ai e tagata taitoatasi ma malō ia upu a perofeta.
O le mea e faanoanoa ai, sa latou teena le fautuaga a le Atua ma tuliloa lo latou lava ala. Faatasi ai ma faamatalaga na latou taliaina, sa latou lagonaina le tauamiotonuina ma atonu foi e sili atu ona maualuga. Ae, e pei o le kapeteni o le vaa, sa latou misia faamatalaga taua ma le alagatatau ma le mea moni.
O le mea e tasi e mafai ona tatou mautinoa: e silafia e le Atua mea uma. E silasila o Ia i mea tatou te lē vaaia. Na te silafia le mea moni sili atu—tuanai, taimi nei, ma le lumanai. Ma o upu Na te tuuina mai i Ana perofeta e aofia ai lena upumoni sili atu.
Samuelu ma le Au Filisitia
Sa soifua le perofeta o Samuelu i le tolu afe tausaga talu ai i se taimi na o ese ai le fanauga a Isaraelu mai le mulimuli i ala o le Atua. Atonu na manatu tagata o lena taimi sa saunoa le perofeta mo na o ia lava pe faapea foi sa faatosinaina o ia i tu ma aga e lē toe taulia, ma ua matua tele o ia. Po o le ā lava lo latou faamoemoega, sa latou mumusu e faalogo i le perofeta, ma sa latou faataatiaese le fautuaga ma poloaiga a le Atua.
O le taimi lea sa tulai mai ai se fili malosi ua lauiloa a o siitaua atu Filisitia ia Isaraelu ma faatoilaloina i latou i le taua. Sa latou pueina foi le atolaau paia o le feagaiga—o le taimi muamua lea na tupu ai. O se maasiasi faaleatunuu.
“Aisea na faataga ai e le Atua le atolaau e pueina?” atonu sa latou fesili ifo ia i latou lava.
Sa taumanatunatu nisi pe na tuulafoaiina i latou e le Atua.
Sa faasolo ina faateteleina le leaga o mea. Na faateteleina le feteenaiga ma Filisitia, ma mafua ai le faanoanoa tele i le nuu o Isaraelu. Na leai ni fale o aiga ma mafatia i faigata, ma o le toatele o o latou aiga pele na fasiotia. Na iu lava ina faalotomaualaloina i latou lava ma tatalo malosi i le Atua, ma moomoo mo le toomaga ma le laveaiga.1
I lo latou faanoanoa ma le atuatuvale, sa latou o atu ai i le perofeta o Samuelu ma fesili po o le a se mea e mafai ona latou faia e mulimuli atili ai i le Atua ma Ona ala.
Faalogo i mea na ta‘u atu e Samuelu ia i latou: “Afai tou te foi atu i le Alii ma o outou loto atoa, ona tuu ese lea o atua ese ma [amioga agasala]2 mai totonu ia te outou, ma saunia o outou loto i le Alii, ma auauna atu ia te ia: ona laveai ai lea e ia o outou mai le lima o Filisitia.”3
Sa faalogo le fanauga a Isaraelu i le mea na fai atu ai Samuelu ma faia. Sa latou anapopogi, salamo i lo latou fouvalega faaleagaga, ma “na o le Alii e auauna atu i ai.”4 Ina ua o mai Filisitia e faasaga ia te i latou, sa tau faavavega e le Alii la latou taua, ma sa pauu Filisitia i luma o Isaraelu.5
Faia o lea Lava Mea Sese e Tasi
Ae tatou te lei faamasinoina tele Isaraelu anamua, atonu e lelei le fesili pe o i tatou lava, e lē ponā pe a oo i le mulimuli i fautuaga a perofeta.
Pe ua tatou faataatia ese ea e i tatou lava ia aoaoga a perofeta? Pe ua tatou teena ea mea na latou fai mai ai? Pe ua tatou filifili ea ua sili atu lo tatou iloa?
E faamanatu soo mai e le Tusi a Mamona ia i tatou ia taunuuga o le gauai atu i lo tatou natura faaletino i le totogi o le mulimuli i lo tatou Faaola. A tatou faia lea mea, o a tatou amioga e mautinoa lava e taitai atu ai i le lē fiafia, nofopologa, mafatiaga, ma le faanoanoa.
Ua tuuina mai e le Atua ia i tatou le meaalofa taua o le saoloto e filifili pe faapefea ona tatou mafaufau ma le ala tatou te amio ai. E mafai ona tatou teena afioga a le Atua po o Ana perofeta. Atonu foi tatou te manatu ua sili atu lo tatou ala. Atonu e foliga faigofie lenei mea ia i tatou—a itiiti mai i le amataga. Atonu foi e i ai se lagona lelei mo se taimi. Ae e lē mafai lava ona tatou sao mai taunuuga o a tatou faaiuga.
E mafai ona tatou aloese mai taunuuga le lelei faaleagaga ma faanoanoaga e ala i le auauna atu i le Alii, liliu atu o o tatou loto ia te Ia, ma aoao e alolofa ma faalagolago ia te Ia.
A o tatou faia lea mea, o le a tatou iloa ai le olioli moni ua folafola mai i tusitusiga paia ia i latou uma o e talitonu ma mulimuli i le Faaola.6
O le a tatou maua le filemu, faamoemoe, saogalemu, ma le malamalama.