“Lona Aiga, Lona Malosiaga,” Mo le Malosi o le Autalavou, Iuni 2022.
Lona Aiga, Lona Malosiaga
Ua iloa e Keli se mea se tasi pe lua e uiga i le auala e tausisia ai le vāvālalata o lona aiga.
Ata na pueina e Ntebaleng Twala ma faaaloaloga a le aiga
E tietie o ia i lana solofanua. E tu o ia i luga o lana solofanua. Ae e lē nao le pau lena. O lenei tamaitai e 12 tausaga mai Aferika i Saute e faigofie foi ona fepuna ma lana solofanua!
E manaomia ai se ituaiga o sootaga faapitoa i le va o le solofanua ma le tagata tietie e faia ia ituaiga o oso ma le saogalemu. Ma o Keli K. e vāvālalata lava ma lana solofanua, o Delta. Ae a e fesili po o a ana mafutaga e sili ona taua, atonu o le a ia tau atu ia te oe e uiga i lona aiga.
“E taua tele nai o’u tei ia te a’u,” o le tala lea a Keli. Ioe, e taua foi ona matua ia te ia. Ua faamalamalama mai e Keli e faapea, o nisi taimi e faigata ai mo le autalavou ona nonofo latalata i o latou matua pe a latou matutua atu, ae ua ia maua ni auala e fesoasoani ai. “Mo a’u, ua na o ni mea faigofie lava, e pei o le talanoa i ou matua po o le faaaluina o le taimi ma i latou ua faaleleia ai le matou mafutaga.”
O lena vāvālalata e faia ai se eseesega tele i lona olaga.
O Manu Feai ma Taimi Fiafia Faaleaiga
E pei ona fai mai Keli, o le nonofo vāvālalata o se aiga e amata i le faaaluina o le taimi o se aiga. O se tasi o auala latou te fiafia ai e faaalu faatasi le taimi o le vaavaai latalata atu ma patino ma nisi o manu aupito tetelē i luga o le paneta! “Matou te o i tietiega safari mo ni nai taimi i le tausaga,” o le tala lea a Keli. O le tele o manatuaga maoae e faaputuputu ae i le taimi o nei tietiega.
“O le manatuaga sili ona malie o le taimi lea na timuga tetele ai i se tasi taimi,” o lana tala lea. O le tietiega i le safari sa matuai saoasaoa lava, lea na mafua ai na maini timuga. O lea sa faapupuu faatasi ai lona aiga, ao taliē, e fai se ituaiga o talitā faaletagata e faasaga i le timu. Ma sa aogā! “Sa faamafanafanaina e le tasi le isi!” o lana tala lea.
O taaloga o se isi vaega tele o lona aiga, aemaise lava i nai ona tei. O se isi auala latou te faaalu faatasi ai le taimi, i le taaalo faatasi ma le faafiafiaina o le tasi ma le isi. I le avea ai ma uii o le toalima, ua iloa e Keli o le auala sili ona faigofie e fesootai ai ma ona tei matutua o le faia lea o le taumafaiga e aoao atili e uiga i a latou taaloga. “Ou te fiafia e matamata i o‘u uso matutua o taaalo lakapi po o le tāpolo. Ma ou te taumafai foi e aoao teisi i a latou taaloga ma a oo i a latou faataitaiga e mafai ona matou fegalegaleai ma taaalo faatasi.”
O le uso matua o Keli e fia tietie solofanua foi, o se auala sili lena ma faalenatura mo i laua e fesootai ai. E fiafia foi Keli e tamoe, ma e fiafia ona tei e lagolago o ia.
E lē gata i lea, e fiafia le aiga atoa e taaalo faatasi i kata ma isi taaloga. E pei ona saunoa mai Peresitene Dieter F. Uchtdorf, ao avea ma Fesoasoani Lua i le Au Peresitene Sili, “I sootaga faaleaiga o le alofa o le sipelaga moni lava o le t-a-i-m-i, taimi.”1
O Se Palanikeke Mafanafana ma se Tauau Malosi
Faatasi ai ma tagata o le aiga o Keli o nisi o ana uo sili ona maoae, latou te fesoasoani foi e faatumu avanoa pe a taia nisi o faigauo i ni patupatu. Mo se faataitaiga, e lē toatele ni tagata o le Ekalesia i le mea o loo nofo ai Keli. O nisi taimi o le eseesega i tulaga faatauaina i le va o Keli ma ana uo ua avea ma se luitau mo ia.
“A o ou laitiiti, sa pei na ou leiloa i le mea na mananao a‘u uo ou te avea ai,” o lana tala lea. “Ae o le faitauina o tusitusiga paia ma le tatalo na fesoasoani. Na ou liliu atu foi i lo’u aiga.
“I se tasi taimi sa ou fai atu ai i au uo e sui a latou musika leaga, ae sa lei aogā tele lena mea. Sa latou fai mai, ‘Afai e te lē fiafia i ai, alu i le fale.’ O lea sa ou tatalo ai ma ole atu i le Tama Faalelagi po o le a le mea e tatau ona ou faia. Sa Ia fai mai ia te a’u e valaau o‘u matua ma alu i le fale.”
Po o le a lava se mea e tupu, ua ia iloa e mafai ona ia faalagolago i lona aiga mo se fesoasoani. “O lo‘u tina ma lo’u tama, e i ai lava i laua iina.” Ma e faapena foi isi tagata uma o lona aiga! I se tasi taimi, na siitia ese ai uo e toalua a Keli. Sa faapitoa le faigata o lenei mea ona sa matuā latalata lava Keli i na uo. Sa toe faia foi e lona aiga le eseesega.
“Sa i ai lo‘u aiga iina mo a’u ina ua ou manaomia se tauau e tagi ai pe na o le talanoa lava,” o le tala lea a Keli e uiga i lena taimi faigata. “Latou te iloa lava i taimi uma le auala e fesoasoani ai ia te a’u ma na o le afifi lava o a’u i se palanikeke pe a ou manaomiaina.”
Faaosofia e Faavavau
Faatasi ai ma mea uma e fiafia o ia e nofo ai i Aferika i Saute—o le tau, o manu safari, o le malumalu i Johannesburg—o loo i ai foi ni nai vaega faigata e uiga i le ola ai e aunoa ma le toatele o isi talavou o le Ekalesia e lata ane.
Peitai, ua ia iloa o le talalelei ma lona faatuatua ia Iesu Keriso o lona malosiaga lea. “Ou te lē iloa po o fea o ou i ai pe ana aunoa ma le talalelei,” o le tala lea a Keli. “Ou te faafetai ona o loo i ai le Ekalesia iina. Ua faamanuiaina moni lava lo‘u olaga e tusitusiga paia. Ma o le a i ai pea le Tama Faalelagi iina. Ou te ola i o‘u tulaga faatonuina aua latou te fesoasoani mai ia ou lagona le fiafia ma le saogalemu. Ma ou te lē manao moni lava ia pei o tamaiti o ē oo i le tele o faafitauli. E sili ai lo‘u filifilia o le mea sa’o, aua ou te iloa e moni le talalelei.”
O loo i ai se isi uunaiga maoae ia Keli mo le ola ai i le talalelei—ma o lona alofa lena mo lona aiga. “Ou te iloa e mafai ona ou faatasi ma lo‘u aiga e faavavau pe afai ou te tumau i le ala sa’o,” o lana tala lea. “Ma ou te fia mau ma lou aiga.”