“O Lesona e 3 mai le Taua a Tavita ma Koliata,” Mo Le Malosi o le Autalavou, Iuni 2022.
Sau, Mulimuli Mai ia te A’u
OLesona e 3 mai le Taua a Tavita ma Koliata
E tofu uma i tatou ma “Koliata” e faafetaiai. E mafai ona tatou faatoilaloina i latou i le fesoasoani mai o le Alii.
Ata na tusia e Alex Nabaum
Sa feagai le fanauga a Isaraelu ma ni faafitauli. Faafitauli tetele.
Sa faapotopoto autau a Filisitia e tau ma Isaraelu. I se tasi taeao, sa sau ai i luma se fitafita sauai e igoa ia Koliata e faatauemu ia Isaraelu. Sa ia luiina i latou e tau ma ia. Ina ua faalogo Isaraelu i le alaga a Koliata, sa latou “faanoanoa, ma matatau tele” (1 Samuelu 17:11).
E leitioa—o Koliata e telē! Fai mai le Tusi Paia ua toeitiiti atoa le 10 futu (3 m) lona umi. Sa ia laeiina foi se pulou apamemea tele ma se ofutau mamafa. Sa ia te ia se talitā, tao, ma se pelu tele. (Tagai 1 Samuel 17:4–7.)
Mo le 40 aso, na luiina ai i latou e Koliata e tau. Sa leai se tasi na maua le lototele e faasaga atu ai ia te ia.
Seia oo ina sau se taulealea e igoa ia Tavita.
Na taunuu atu Tavita i le tolauapiga a Isaraelu e auina atu ni sapalai ae faalogo ai i alaga a Koliata. Sa faateia o ia i le vaaia o fitafita ua sosola ese i le fefefe. Ina ua manino mai ua fefefe tagata uma e tau, sa ofo atu Tavita e faasaga ia Koliata.
Sa ta‘u atu ia Tavita e leai se auala e mafai ai ona ia faatoilaloina Koliata—sa laitiiti tele o ia. Ae sa ia iloaina se mea latou te lei iloaina: o lona malosi e lē sau mai lona tino, ae mai lona Atua.
Faasaga Atu i Au Koliata
I o tatou olaga, tatou te feagai foi ma “Koliata”. O Koliata tatou te feagai e mafai ona avea ma se aofaiga o tofotofoga, luitau, ma faaosoosoga. O upumoni nei e tolu na iloa e Tavita na fesoasoani ia te ia e faatoilalo ai lana Koliata. Ma e mafai foi ona latou fesoasoani e faatoilalo ai a oe foi [Koliata].
1 O Le a Faatasi Le Alii ma Oe
Ina ua tau atu e tagata uma ia Tavita e lē mafai ona ia tau ma Koliata, sa tali atu Tavita ua uma ona ia tau ma se leona ma se urosa e laveai ai mamoe a lona tama. Sa tautino atu ma le mautinoa e Tavita, “O le Alii na laveai ia te a’u nai le lima o le leona, ma le lima o le urosa, o ia lava na te laveai ia te a‘u ai le lima o lena Filisitia” (1 Samuelu 17:37).
Sa iloa e Tavita o le a faatasi le Alii ma ia. Faatasi ai ma le Alii, e mafai foi ona tatou fetaiai ma o tatou Koliata ma le mautinoa.
2 O Le Faatuatua i le Atua e Aumaia ai le Lototele
Sa alu Tavita i se tamai ālia lata ane ma maua ai ni maa lamolemole se lima. Sa ia tuuina maa i lana ato faatasi ma lana maatā. Ona alu ai lea o Tavita e feiloai ma Koliata.
Ina ua vaai Koliata ia Tavita, sa taufaalili o ia i le laitiiti o Tavita. Sa ia fetuuina ma faamata‘uina o ia. Peitai, o Tavita, sa lei faanoanoa ma lē fefe. Sa ia tali atu, “Ua e sau ia te au ma le pelu, ma le tao, ma le tao leoleo; a o a’u, ou te alu atu ia te oe i le suafa o Ieova o ‘au, o le Atua o le itu taua a Isaraelu ua e faifai i ai” (1 Samuelu 17:45).
Na aoao mai Peresitene Dallin H. Oaks, Fesoasoani Muamua i le Au Peresitene Sili: “Sa i ai ia Tavita se faatuatua mausali i le Atua o Isaraelu, ma o lena faatuatua na tuuina atu ai ia te ia le lototele tele. …
“… E i ai taimi e tatau ai ia i tatou uma ona tutū e tetee atu ia i latou o e tauemu ma upuleaga. O nisi o i tatou, o nisi taimi, o le a feagai ma se mana faalelalolagi e malosi e pei o Koliata. Pe a tupu lena mea, e tatau ona tatou faataitai i le lototele o Tavita, o lē sa malosi ona sa ia te ia le faatuatua ma sa alu atu o ia i se galuega amiotonu i le suafa o le Alii o Au.”1
E mafai foi e le faatuatua ona fesoasoani ia te oe e faafetaiaia ou popolega ma le lototele.
3 Faatasi ai ma le Atua, E Mafai Ona E Faia Mea Faigata
Atonu ua uma ona e iloa le mea na sosoo ai. Sa uu mai e Tavita se maa mai lana ato ma tuu i totonu o lana maatā. Sa ia sasauina le maa, ma na tau i le muāulu o Koliata. Na paū Koliata. Ina ua vaai atu Filisitia ua faatoilaloina lo latou siamupini, sa latou sosola mo o latou ola.
A o lei faia lenei taua, o le toatele o tagata sa latou fai mai e lei taitai lava ona tutū Tavita. Ae sa faaali atu e Tavita “e leai lava se mea e tasi e lē mafaia e le Atua” (Luka 1:37).
E pei ona saunoa Peresitene Russell M. Nelson, pe a e feagai ma ou lava Koliata, “ua ia te oe le aiā tatau e ala i lou agavaa e maua faaaliga e fesoasoani ai ia te oe i au taumafaiga amiotonu. E mafai ona e aveina i ou luga le suafa o le Alii. E mafai ona e tatalo i Lona suafa paia. … O lou avanoa ma le agaga tatalo e fesoasoani ai e tutusa lava le moni e pei foi o le taimi na tau ai Tavita i lana Koliata.”2
Faatasi ai ma le fesoasoani a le Atua, e mafai ai ona e tu atu ma le faatuatua ma ia manumalo.