Ou te lē lagonaina se mea ao ou tatalo. E mafai faapefea ona ou faia ia anoa atili a’u tatalo?,” Mo le Malosi o le Autalavou, Iuni 2022.
Fesili ma Tali
“Ou te lē lagonaina se mea ao ou tatalo. “E mafai faapefea ona ou faia ia anoa atili a’u tatalo?”
Ia Lotomaualalo, Lotofaafetai, ma Faamaoni
“E paia le tatalo. O se tatalo anoa e lotomaualalo. Nai lo le na o le ole atu i le Atua mo ni mea, ou te ta‘u atu ia te Ia le mea ou te faafetai ai. E pei ona aoao mai Moronae, ou te taumafai e tatalo ma le faatuatua, ma se loto faamaoni ma le manatu moni i ai (tagai Moronae 10:4). O na tatalo e fesoasoani tele ia te a‘u e lagona ai se mea e loloto ma matuā moni.”
Angbo K., 20, Cte d‘Ivoire
Faaopoopo i ai le upu Ona
“Ou te fiafia e faaaoga le upu ona i a‘u tatalo. Pe a e faaopoopo atu le ona, o loo e faamatala atu i le Tama Faalelagi le mafuaaga o loo e tatalo ai. Mo se faataitaiga: ‘Faamolemole fesoasoani i la’u uo po o le tagata o le aiga e faamalolo ona ou te alofa ia i latou.’ E fesoasoani tele le faia o a‘u tatalo ia sili atu ona anoa ma patino.
Eliza G., 17, Maryland, ISA
O Le Tatalo e Valaaulia ai le Agaga Paia
“Tatalo pea i aso uma. Ole atu i le Tama Faalelagi e fesoasoani ia te oe ia atili nofouta i le Agaga Paia. E mafai foi ona e aoao atili e uiga i le Agaga Paia ma le tatalo i le polokalama o le Gospel Library—o le a mautinoa lava le fesoasoani tele!”
Elena J., 13, Kuatemala
Faalemū
“O nisi taimi tatou te tatalo ai e na o le tau lava ina fai. Tatou te tau atu na o mea tatou te faalogo o tatalo ai isi tagata, ma tatou te lē tautatala moni lava i mea o loo i o tatou loto. O le tatalo o se avanoa e talanoa atu ai i le Atua. Aua le faanatinatia. Faaalu se taimi e sasaa atu ai mea o loo i totonu o lou loto.”
Marseilles O., 15, Toga
Faafetai atu ia te Ia ma Fesili mo se Fesoasoani
“O le tatalo o se talanoaga ma le Tama Faalelagi, o lea ia talanoa atu ai ia te Ia! E mafai ona e faafetai atu ia te Ia mo se mea na e maua ai le fiafia. E mafai ona e ole atu i le Atua mo Lana fesoasoani. Pe a ou manatua e silafia a’u e le Tama Faalelagi ma e alofa ia te a’u, e faigata ona taofia le tatalo. O le iloaina na puapuagatia tele le Faaola mo a’u, o le mea itiiti lava e mafai ona ou faia o le faia lea o se tatalo mai le loto.
Ingrid R., 15, Pasila
Mafaufau ma Manatunatu Loloto e uiga i Au Tatalo
“E ui e mafai ona e tatalo i soo se mea i soo se taimi, ae e tatau lava ona e i ai i le tulaga sa‘o o le mafaufau. E tatau ona e tatalo ma le manatu moni ia lagona Lona Agaga. Mafaufau ma manatunatu loloto e uiga i au upu a o e tatalo. O tatalo uma e tatau ona tulaga ese ma eseese.”
Elyssa T., 15, Misuri, ISA
Aloese Mai Mea Faalavefau
“Taumafai e taulai atu tau lava o le tatalo ma ia leai se isi mea a o e tatalo. E manaomia ona tatou iloa o le tatalo o se meaalofa aua o loo tatou talanoa atu i lo tatou Tama oi le Lagi. E mafai ona tatou manatua faamanuiaga ua Ia tuuina mai ia i tatou.”
Rebecca J., 14, Initia
Fai se Talanoaga Anoa
“Ou te fiafia e mafaufau i la‘u tatalo o se talanoaga moni lava ma le Tama Faalelagi. Ou te lagona le fiafia pe a ou tatalo i lenei auala e pei lava ona ou lagonaina i le maea ai o se talanoaga lelei ma se uo. Ua ou iloa foi o le alu i se mea e faalilolio ma tatalo leotele e fesoasoani ou te taulai atili atu ai i le tatalo ina ia mafai ai ona ou faia ia sili atu ona anoa.”
Garret W., 12, Karolaina i Matu, ISA