“Tamaitai o le Faatuatua,” Mo le Malosi o le Autalavou, Iuni 2022.
Sau, Mulimuli Mai ia te A’u
Tamaitai o le Faatuatua
E ui sa latou ola i se taimi ua leva, ae sa faatuina e tamaitai mai le Tusi Paia ni faataitaiga o le faatuatua, auaunaga, ma faauōoga, lea e mafai foi ona maua i tamaitai talavou i aso nei.
Tepora
mai le Tusi Paia
Ina ua sauāina e sa Kanana ia Isaraelu, e toatele tagata Isaraelu na liliu atu i ala leaga. Ae o Tepora sa o se tamaitai faamaoni. O ia o se faamasino ma sa ta‘ua o se perofeta fafine (tagai Faamasino 4–5), o lona uiga sa i ai sana molimau i le Alii ma le agaga o faaaliga (tagai Faaaliga 19:10). Sa ia te ia se faatosinaga maoae ia Isaraelu. Sa ia maua musumusuga mai le Alii e fesoasoani e laveai ai Isaraelu mai sa Kanana.
O le faataitaiga a Tepora ua faaali mai ai ia i tatou faamanuiaga e oo mai mai le faalagolago ia Iesu Keriso.
Francisca
mai Kana ma Idaho, ISA
E pei o Tepora, na tuu atu e Francisca lona faatuatuaga i le Alii.
O Francisca e sau mai Kana. Sa auai o ia i le Ekalesia ina ua uma ona vaetamaina o ia ma lona tuagane masaga e se aiga i Idaho. E fiafia o ia e alu i gaoioiga a le autalavou, ae o nisi taimi e maua ai e Francisca o ia lava o fesili atu i le Atua pe e auai moni o ia.
“Ou te tauivi e saili lo‘u nofoaga i lenei lalolagi,” o le tala lea a Francisca. “Ae a ou manaomia le fesoasoani sili, o loo i ai Iesu Keriso iina e fesoasoani ia te a‘u e saili lo‘u ala. Ua fesoasoani mai Iesu Keriso ia te a‘u e ala i o‘u tauiviga ma ua fesoasoani ia te a’u e maua le filemu ma le mafanafana i lo‘u olaga. Ou te iloa e moni lenei Ekalesia, ma ou te alofa i lo‘u Faaola o lē na maliu mo i tatou.”
O Tepora ma Francisca o ni faataitaiga o le faatuatua mausali ia Iesu Keriso.
Ruta
mai le Tusi Paia
Ina ua maliu le toalua o Ruta, sa uunaia o ia e lona tina faaletulafono, o Naomi, e toe foi atu i lona aiga i lona lava atunuu ina ia mafai ona latou tausia o ia. Ae sa filifili Ruta e nofo ma tausi lelei ia Naomi. Sa faamaoni Ruta ma tautino atu e auauna atu i lona tina faaletulafono. Sa auauna atu Ruta ia Naomi i le tele o itu, e aofia ai le saunia o meaai mo ia (tagai Ruta 2:17–18).
Faitau atili e uiga ia Ruta ma Naomi i le lomiga lenei.
Daynalee
mai Massachusetts, ISA
E pei o Ruta, ua aoaoina e Daynalee le tāua o le auauna atu.
Sa amata ona volenitia Daynalee i se umukuka supo i le tolu tausaga talu ai. E ui o lona uiga o le lafoaia o nisi o ona taimi i Aso Toonai uma, ae na te vaai atu i ai o se avanoa mo ia e aoao ai ni mea fou ma fesoasoani ai i tagata e manaomia le fesoasoani.
O le volenitia i le umukuka supo na fesoasoani ia te ia e aoao ai ia sili atu ona faamaoni ma fesootai atu i tagata eseese, o le tala lea a Daynalee. “Ou te lagona le toafimalie tele ma le fiafia i le iloaina o loo ou auauna atu i isi,” o lana tala lea. “Ou te iloa e fiafia le Tama Faalelagi pe a ou auauna atu, ma ou te maua ai le fiafia.”
Sa taufai faaaoga uma e Ruta ma Daynalee le avanoa e auauna atu ai i isi. E fiafia le Atua pe a tatou filifili e auauna atu i Ana fanau.
Naomi
mai le Tusi Paia
O Naomi o le tina faaletulafono o Ruta. E lē gata ina sa auauna atu Ruta ia Naomi, ae sa fesoasoani foi Naomi ia Ruta. Sa faailoa atu e Naomi ia Ruta i tagata fou ma fesoasoani e tausia le pepe a Ruta (tagai Ruta 4:16). Sa la lagolagoina i le tasi ma le isi ma faatauaina le la faigauo.
Eunice
mai Filipaina
E pei o Naomi, sa aoaoina e Eunice le tāua o uo lelei.
A o lei auai Eunice i le Ekalesia, sa matamuli tele o ia. Ina ua ia maua se valaauga e auauna atu o se peresitene o le vasega a Tamaitai Talavou i lana uarota, sa faatuai o ia e talia le valaauga. Ae sa ia faatuatuaina le Alii ma taliaina le valaauga.
E ui sa matamuli o ia, ae sa lei faatali Eunice mo isi e o mai ia te ia. Sa ia faia le gaoioiga muamua e faia ni uo ma isi talavou. Fai mai Eunice, “O se tasi lenei o faamanuiaga o le talalelei toefuataiina a Iesu Keriso—o le i ai o ni uo e faavavau o e o le a tumau faatasi ma outou i le ala o feagaiga ma fesoasoani ia te oe e ola i le talalelei.”
E auina mai e le Atua ni uo e fesoasoani ia i tatou i taimi faigata. E pei o Naomi ma Eunice, e mafai ona e aapa atu i isi ma auauna atu ia i latou.