“Le Fefefe Faatasi,” Mo Le Malosi o le Autalavou, Iuni 2022.
Sau, Mulimuli Mai ia te A’u
Lē Fefefe Faatasi
E lei tele ni mea na maua e Naomi ma Ruta. Ae sa i ai le tasi mo le isi ma le faatuatua i le Atua.
Ata na tusia e Katy Dockrill
Na paū lona lalolagi atoa i lalo ifo o ia. O Naomi, o se fafine Isaraelu amiotonu i le Feagaiga Tuai, sa le gata ina maliu lana tane ae faapea foi lana fanau tama e toalua (tagai Ruta 1:2–5).
Ona o le taimi ma le nofoaga sa nofo ai o ia, o lona uiga na toetoe lava a mautinoa o se faalavelave tautupe mo ia. I lena aganuu ma le taimi, sa faigata mo se tamaitai ona faigaluega e tausia o ia lava. Afai e maliu le tane a se fafine, e tatau ona tausia o ia e lana fanau tama.
Ae ina ua latou feoti foi, sa tuua Naomi e aunoa ma se lagolago, sa nofo mamao ese mai lona aiga ma mai lona nuu. O lea na amata ai ona malaga o ia ma lana fanau teine faaletulafono i Isaraelu.
Peitai, i le mafaufau ai i le soifua manuia o lana fanau teine faaletulafono, na tau atu ai e Naomi ia i laua e tatau ona la toe foi atu i Moapi ina ia mafai e o latou aiga ona tausia i laua.
Ae sa la alolofa i lo la tina faaletulafono. Sa la tali atu, “E mautinoa lava o le a matou toe foi atu faatasi ma oe i lou nuu” (Ruta 1:9–10). Sa la mananao e nonofo faatasi ma Naomi.
E ui lava i lo la tetee, ae sa toe uunaia i laua e Naomi e toe foi i o laua aiga. Ina ua uma ni nai fetagisiga, sa filifili se tasi o afafine faaletulafono e alu ese.
Peitai, o le isi, sa piipii atili ia Naomi. Ona ia fai atu lea o ni upu ua avea ma se tasi o faataitaiga sili o le faamaoni i tusitusiga paia uma:
“A ua fai atu Ruta, aua e te finau ia te au ina ia ou tuulafoai ia te oe, ia le mulimuli atu ia te oe: aua o le mea e te alu i ai, ou te alu ai foi: o le mea e te nofo ai, ou te nofo ai: e fai lou nuu mo’u nuu, e fai lou Atua mo’u Atua” (Ruta 1:14–16).
O lenei tamaitai faamaoni ma le afafine faaletulafono sa igoa ia Ruta. Ma na te lei iloaina o lona faaalia o le faamaoni ma le alofa ia Naomi o le a amatalia ai se faasologa o mea na tutupu o le a manuia ai le lalolagi atoa.
O Mea na Feagai ma Ruta
Sei o tatou manino i se mea se tasi: E lei i ai ni tupe a Ruta sa teu ese. Sa lei i ai o ia i se tulaga e tausia ai Naomi i mea tautupe—po o ia foi. O le mea moni, o le ala sili ona saogalemu a Ruta o le toe foi atu lea i lona aiga e pei ona fai mai ai Naomi. O le pipii faatasi, o le a tatau ai ona laua tauivi mo se mea e ola ai. E oo lava i le iloaina o lenei mea, o le a le tuua lava e Ruta na o Naomi i lena taunuuga. Sa loloto lona lotofaamaoni.
Sa feagai Ruta ma nisi faigata. Sa liua o ia i le Atua o Isaraelu, o Iesu Keriso, i se taimi ina ua uma ona ia faaipoipo atu i lana tane. Sa sau o ia mai Moapi, lea sa tapuai ai tagata i isi atua. Sa naunau Ruta e malaga atu i se nuu ese (Peteleema) lea o le a avea ai o ia ma se tagata ese mai fafo ma se talaaga faalelotu ma se tausiga ese. O nei mea uma e aunoa ma se folafolaga o se fesoasoani po o se puipuiga.
Peitai, o le mea sa ia faia, o le faatuatua i le Atua ma le faamaoni ia Naomi.
Faamanuiaga mai le Faamaoni
Ina ua la taunuu i Peteleema, sa faapea atu Ruta o le a alu i fanua e faaputu ni meaai (ao mai saito na pauu i le eleele, ina ua tea ese atu le seleselega).
O le faaputuina o meaai i fanua na taitai atu ai Ruta e feiloai ia Poasa. O ia o se tagata taua sa aiga ma le toalua o Naomi. Sa lagona e Poasa le agaalofa mo Ruta. Sa ia faalogo i le faamaoni o Ruta ia Naomi ma le Atua o Isaraelu (tagai Ruta 2:11–12).
Sa lei leva ae nao fanua o Poasa na faaputu meaai ai Ruta, ma sa lava meaai a Ruta ma Naomi e aai ai. Na vaaia e Naomi se avanoa e fesoasoani ai ia Ruta. Sa ia fautuaina Ruta e tuuina atu o ia lava ia Poasa ia ono avea ai ma ana avā.
Sa tali atu Ruta e pei ona e faamoemoeina: “O mea uma e te fai mai ai ia te au o le a ou faia” (Ruta 3:5).
Sa faaipoipo Poasa ia Ruta (tagai Ruta 4:13), lea na maua ai le saogalemu ma le puipuiga mo Naomi ma Ruta. E sili atu foi, sa i ai so la atalii o se tuaa o Iesu Keriso (tagai Ruta 4:17 ma le Ioane 7:42).
Sa tuua nao Naomi ma Ruta i se tasi taimi e aunoa ma ni mea se tele e la te onaina. Ae sa i ai le tasi mo le isi. “O lou afafine i le tulafono, o le ua alofa ia te oe,” na fai atu ai nisi o fafine ia Naomi, “ua lelei o ia ia te oe e sili i tama tane e toafitu” (Ruta 4:15).
O mea na la maua, i le tasi ma le isi ma i le Alii, sa na o le pau lea o le mea sa la manaomia.