Lea Fuaitau i luga o Lea Fuaitau

Filifili

Sa uunaia e Iosua lona nuu e fai le filifiliga sa‘o—ia mulimuli i le Alii.

Iosua 24:15

15 Pe afai foi e leaga ia te outou ona auauna ia Ieova, ina filifili ia o outou i le aso nei po o ai tou te auauna i ai; po o atua na auauna i ai o outou tamā, o e sa i le la itu o le vaitafe, po o atua o sa Amori, e o latou le nuu ua outou nonofo ai; a o a’u nei ma lo’u aiga, matou te auauna ia Ieova.

filifili

O lo tatou tomai e filifili ai ma faatino mo i tatou lava ua ta‘ua o le faitalia. O se vaega taua o le fuafuaga a le Tama Faalelagi. O se tasi o faamoemoega o lenei olaga o le faaali atu lea o le a tatou filifili e usitai i poloaiga a le Atua ina ia mafai ai ona tatou avea atili e faapei o Ia. O le a faamasinoina i tatou e tusa ai ma a tatou filifiliga. (Tagai i le 2 Nifae 2:27; Mataupu Faavae ma Feagaiga 101:78; Aperaamo 3:25.)

i le aso nei

Sa uunaia e Iosua lona nuu e filifili “i le aso nei,” po o le taimi nei lava. E mafai ona tatou faia filifiliga taua i le taimi e tasi ona taumafai lea e tumau le tuuto atu ia i latou. (Tagai i le Salamo 37:5.)

auauna atu

I lenei fuaiupu, o le auauna atu o lona uiga o le tapuai, fesoasoani, usitai, ma tuuto atu oe lava i se tasi. E tatau ona tatou auauna atu i le Alii (tagai i le Mose 1:15).

atua

Ua poloaiina Isaraelu e auauna atu i le na o le Atua moni ma soifua, o Iesu Keriso (tagai i le Esoto 20:2–5). Na tuuina mai e Iosua ni faataitaiga o isi atua e lē tatau ona tapuai i ai lona nuu. O isi atua i o tatou olaga e mafai ona aofia ai oa, o manatu o isi, o isi mea e fiafia i ai—soo se mea e aveesea ai i tatou mai le Alii.

o a‘u ma lo’u aiga

Sa talanoa Iosua mo ia lava ma lona aiga. Na ia faapea mai e latou te auauna atu i le Alii. Sa manao o ia e taitai ma le amiotonu lona aiga ma aoao i latou e mulimuli i le Alii (tagai i le Mataupu Faavae ma Feagaiga 93:40).