“I Lagos Nigeria,” Mo Le Malosi o le Autalavou, June 2022.
O Le Auala Matou te Tapuai Ai
I Lagos, Nigeria
Atapue mai le Getty Images
Talofa! O lo‘u igoa o Mosaea O.
Ou te nofo i Lagos, Nigeria, ma lo‘u tina, lo’u tama, ma lo‘u tuafafine lalelei e fitu tausaga le matua, o Harriet. Ma te fiafia ma lo‘u tuafafine e tusitusi faatasi. E o mai o‘u matua mai ituaiga eseese—o lo’u tama e sau mai le ituāiga o Yoruba ae o lo‘u tina e sau mai le ituāiga o Edo. O lea ou te tautala faaPeretania, ae ou te tautala foi faaYoruba. Matou te fiafia lava e nonofo iinei i Lagos. O loo i ai matāfaga ma fale matagofie.
Meaai ma Mea malie faaNigeria!
Ou te fiafia i Aferika ona o meaai eseese uma ua matou maua. O ai ea e lē fiafia i meaai? Ou te fiafia e kuka ma ou faataitai ona faia ni meaai fou i le fale. O meaai faaNigeria e matuai felanulanuai lava. O se tasi o meaai e sili ona ou fiafia e fai o le Epkang Nkukwo, o se supo e faia mai le laau o le ufi, e pei o le talo. Ou te fiafia foi e fai supo uliuli i le ekó (po o agidi) o se puligi e faia mai le falaoamata o le sana.
Ou te lagona o le taumafa maloloina ua fesoasoani ou te malosi atili ai ma saunia mo faaaliga faaletagata lava ia. Ou te iloa e alofa le Alii ia i tatou ma silafia foi mea tatou te aai ai. E finagalo o Ia ia tatou ola maloloina ma galulue filigā i Lana galuega.
O mea ou te fiafia lava i ai o le faalogologo lea i musika, tusia o pese, tusia o solo, ma le faitauina o tusi lelei. Ou te fiafia e aoao le auala e ta ai le kitara ma le piano uila. O lo‘u tina o loo aoaoina a’u i le auala e ta ai viiga. E i ai foi sa matou faatoaga lapiti. O le tausia lelei o lapiti laiti e 13 ua avea ma se avanoa sili mo a‘u—ma o se malaga tele!
Faafetauiga i le Seminare
O se tasi o vaega e sili ona ou fiafia i ai o le avea ma se tagata O Le Ekalesia a Iesu Keriso o le Au Paia o Aso e Gata Ai o le faia lea o ni uo fou. Ou te fiafia i le avanoa e feiloai ai i tagata fou o lo‘u faatuatuaga. Ou te fiafia e alu i le seminare, ae ina ua ou faatoa amata, sa ou lagona le lē amanaiaina. O a‘u o le tamaitiiti aoga aupito laitiiti, ma sa iloa e isi tagata uma le tasi ma le isi. Latou te lei talanoa soo mai ia te a‘u. Sa ou tauivi faalilolilo ma le manatu maualalo ia te a‘u lava, ae sa ou tatalo, ma sa ou lagonaina moni lava le alofa o le Atua mo a‘u. Sa ou faia se sini ia faamasani atili i isi tamaiti aoga, ma sa oo ina ou iloa le telē o lo latou popole alofa ia te a‘u. Ou te iloa e finagalo le Atua ia tatou tuputupu ae ma maua ni sootaga anoa. Ua Ia saunia ni auala mo i tatou e faia ai lena mea e ala i polokalama a le Ekalesia.
Fesoasoani mai le Agaga Paia
O nisi taimi, e finagalo le Atua ia tatou tutumau. Fai mai leMataupu Faavae ma Feagaiga 58:4 “A mavae puapuaga e tele ona oo mai lea o faamanuiaga.” Afai e lē o sologa lelei mea uma ma e te lē o lagonaina le fiafia tele, tau lava o le tutumau ai iina ma o le a vave ona e vaai i faamanuiaga. O nisi taimi pau lava le mea tatou te faia o le tumau e oo i le iuga ma mulimuli i le Agaga Paia. Pe a ou lotomaualalo, e mafai ona ou lagonaina le fesoasoani mai o le Agaga ia te a‘u ma tau mai ia te a‘u le mea e tatau ona ou faia e foia ai faafitauli i lo‘u olaga. Ou te iloa o le faia o lenei mea o le a fesoasoani ou te lagona atili ai le mautinoa i le afioaga o le Atua.